Ads by Google Ads by Google

E LE O OE O SE SULI MONI

Vaega 39

 

Ua ola lava e pei o se pologa, ua masani i le olaga fa’a pologa, ua tautala ma gagana i gagana e tautatala ai tagata pologa, ua ai i meaai a le pologa, ua nofo fo’i ma moe i le nofoaga e moe ma taoto ai le tagata pologa, o le olaga lena o lea ua ola ai le teineititi o Ianeta, lea ua avea foi o ia ma teine matua i totonu o le nofoaga, i le tuana’i ai o tausaga e 5 talu ona nofo i totonu o le nofoaga. O le tausaga lea na fa’amanatuina ai le 50 tausaga o le Tupu o Eteuati II, na fa’afuase’i ai loa ona maua atu le tusi a le teine o Ianeta mai le Tupu, ina ia oo atu i lona maota i le taeao ona o loo i ai se mataupu o loo fia talanoa ai le Tupu ia te ia. “O le a lenei mataupu ua mana’omia mai ai a’u i le maota o lo’u ali’i le Tupu”, o le fesili fiamalamalama lea a Ianeta i le auauna na alu atu ma le poloa’i, ae na tali le auauna, “Fa’amalie lou loto Ianeta, ou te le malamalama i le mataupu ua finagalo le Tupu e talanoa mai ai ia te oe”. E lei lelei se moe a le teine o Ianeta i le po atoa, ao lumana’i ai le taeao lea ua fa’amoemoe e oo atu ai i luma o le maota o le Tupu, ona ua popole lona loto poo le a lenei mataupu ua finagalo mai ai le Tupu ia te ia.

 

E ta tonu loa le itula e 10:00 i le taeao na sosoo ai ae tu loa ma le ta’avale a le auauna i le nofoaga o tagata pologa ma piki mai ai loa Ianeta ma momoli atu loa i le maota o le Tupu, na vaaia a le tama’ita’i le matagofie o le toniga a auauna i lea aso, e foliga mai o loo i ai se aso fa’apitoa o loo fa’amanatu. “Ua manaia mai lou laei i lenei taeao lau susuga a le auauna”, o le tala fiafia atu lea a Ianeta i le auauna o loo ia fa’afoeina le ta’avale, ae na tali mai le ali’i ma ona foliga saua ma le fia tama leaga, “O le aso e fa’amanatu ai le aso soifua o le Tupu, e te lei iloaina lava lena tulaga”, o le tala lea a le auauna na matua te’i ai le fa’alogo a Ianeta ma ia toe tali atu ai i le auauna, “E leai la lau susuga, ou te le iloaina o le aso soifua lenei o le Tupu”.

 

“O le aso lenei e masani ona faia ai e le tupu le tele o fa’aiuga tetele i totonu o le malo”, o le fa’amatalaga leaa le auauna ia Ianeta. “Mo lou silafia Ianeta, e lua lava aso tetele i totonu o le malo lenei talu mai tausaga e tele, o le aso fa’apitoa mo tagata pologa o le malo, o le aso lena e fa’ataunu’u ai fa’asalaga o le oti mo tagata ua sili ona matuia a latou solitulafono i totonu o le malo, ma le aso soifua o le Tupu, o le aso lena e fa’asa’oloto ai e le tupu pagota ua ia manatu alofa i ai, ae le o pagota uma latou te maua lea fa’amanuiaga, se’i vagana lava i latou ua manatu alofa i ai le Tupu, ona fa’atoa mafai lea ona latou maua lea fa’amanuiaga”, o le fa’amatalaga lea a le auauna na matua fa’ateia ai lava le fa’alogo a Ianeta, ma ua le mau gagana ai le tama’ita’i, ae ua mafaufau loloto lava i le mafua’aga lea ua ala ai ona mana’omia mai o ia e le Tupu i lona maota. Na motu fa’afuase’i le talanoaga a Ianeta ma le auauna ina ua afe fa’afuase’i le ta’avale i le auala e aga’i atu i le maota o le Tupu, ma vaaia ai e le tama’ita’i le laulau tutu mai o auauna ma fitafita o le malo ma latou toniga matagofie i soo se vaega o le aai, ona savali mai lea o le isi auauna ma tatala le faitoto’a o le ta’avale ina ua taunu’u le ta’avale i luma tonu lava o le faitoto’a e ulufale ai i le maota o le Tupu. “Talofa Ianeta, ua leva ona fa’atali le Tupu mo oe i lenei taeao, ae ulufale mai”, o le fa’amatalaga lea a le isi auauna ma ona foliga fiafia ma la savavali to’alua atu loa ma Ianeta i totonu o le maota, lea na ulufale atu loa ae fa’afeiloa’i mai e le Tupu o le malo ia Eteuati II le tama’ita’i ma talia fiafia ai o ia la te tali sua fa’atasi. “Talofa lo’u afafine Ianeta, o se aso fa’apitoa lenei i lo’u olaga, ina ua mafai ona fa’amanatuina lo’u aso fanau i le aso, ae o loo i ai se mea lelei e ao ona ou faia mo se tasi i totonu o lo’u malo, ao le’i ta’uina atu lea mea lelei ia te oe, e ao ona ta talisua muamua ma oe i lenei taeao”.