E LE O OE O SE SULI MONI

Vaega 99

 

Ua salalau le tala e fa’atatau i le faigauo a le ali’i milionea o Laneselota ma le tama’ita’i meauli ia Ianeta. Ua soo ai tulimanu e fa o le malo. O se tala na fa’ateia ai le to’atele o tagata milionea e masani lelei ma malamalama i le aiga o Laneselota, e o o lava fo’i i tama’ita’i lalelei sa fa’amemelo o latou lagona e fia fa’aipoipo atu i le ali’i milionea, e leai se isi o i latou e le i fa’ateia i lenei tala, ma ua amata loa ona latou taumafai e saili ni auala e fa’aleaga ai le mafutaga lea ua fa’atoa amata. O le tuana’i ai o le ulua’i 2 masina talu ona fa’amauina le faigauo a Laneselota ma Ianeta, na maua atu ai se valaaulia a le ali’i o Laneselota mai se tasi o Fa’alapotopotoga e galulue mo le manuia o tagata matitiva i totonu o le malo, e avea ai o ia ma Failauga Faapitoa i se tasi o a latou sauniga tele lava, e taualuga ai se polokalame sa mafai ai ona fesoasoani atu i aiga matitiva. Na mafua ona maua le avanoa o Laneselota e avea ai ma Failauga Faapitoa, ona o ia le tagata na pito tele ai lava lana foa’i e fesoasoani ai i le fa’atupeina o lenei polokalame. Soo se taimi lava la e manatu ai Laneselota na te valaaulia Ianeta ina ia la auai i se fa’amoemoe taua, e malaga ai lava le ali’i i le fale o le tama’ita’i e logo aloaia i ai sona fanoga, na te le fa’aaogaina telefoni poo isi fo’i auala o fesootaiga fa’aonaponei.

 

Na fa’ateia Ianeta ao taaalo ma nisi o ana uo i le lotoa o le latou fale ina ua valaau atu lona Tina e alu atu i le feau. Na tamo’e faavave atu Ianeta i lona fia iloa o le feau, ae fa’ailoa atu i ai e lona Tina, o loo i luma o le pa le ta’avale a Laneselota na alu atu e fia feiloa’i atu ia te ia. Na lagona le fiafia o Ianeta ma fa’anatinati atu ai loa i luma o le faitoto’a o le pa, ma ia vaaia ai le ta’avale a lana manamea o loo tu mai ai, ma auauna o loo tutu i autafa o le faitoto’a o le ta’avale. Na ona vaaia lava e auaua ua savali atu Ianeta, ona la tatalaina loa lea o le faitoto’a o le ta’avale, ma ulufafo mai ai le ali’i o Laneselota ma feiloa’i fiafia atu ia Ianeta. “E te lei faailoaina mai lava ia te a’u e te malaga mai i se taimi o lenei aso?”, o le fesili atu lea a Ianeta ma ona foliga fiafia, ae sa luelue le ulu o le ali’i milionea ma tali atu i ai e fa’apea, “E moni lava oe, ae fa’apea lava taualumaga o le olaga, a i ai se mataupu taua e moomia ai ona ta feiloa’i, ona fa’apena lava lea ona fai, ou te savalivali mai e asi mai oe ma fai se tala tala.” Ua le mafai le fia fa’alogo atu o Ianeta poo le a le mataupu taua ua fia talanoa atu ai Laneselota ia te ia, ae poo se mataupu fo’i e fa’atatau ia laua poo nisi mataupu fa’alemalo.

 

“O le faaiuga o le vaiaso nei lea e faia ai se tasi o fa’atasiga tele lava i totonu o le taulaga o loo valaaulia ai a’u, mo le fa’ai’uina o le polokalame sa fa’agasolo e tufatufa atu ai meaalofa mo e tagata matitiva. O le mafua’aga lena o lo’u oo mai, e valaaulia faapitoa ai oe ina ia ta malaga fa’atasi i lea valaaulia.” Na luelue le ulu o le tama’ita’i o Ianeta i lona fiafia tele, ma ia fa’ailoa atu ai loa ia Laneselota, o le a ia sauni i le taimi ma le aso lea ua fa’atulaga la te malaga ai. Ua fa’amavae Laneselota ona toe fo’i lea ma ana uo, ae ua fo’i fiafia atu nei Ianeta ma fa’amatala i lona Tina le autu o le malaga atu o lana uo, atoa ai ma le valaaulia lea ua maua ai lona avanoa e malaga fa’atasi atu ai ma Laneselota i le fa’atasiga tele o le a faia i le fa’aiuga o le vaiaso. Ua oo i le aso e pei ona tuupo ina mo le fa’amoemoe, ma ua leva fo’i ona tapena Ianeta e fa’atali ai le taunu’u ane o lana manamea. O se sauniga muamua faapitoa muamua lenei ua malaga atu i ai Ianeta e aunoa ma ona matua, ona o lea ua la malaga ma Laneselota. Na vaaia le fa’atumulia o ta’avale i le vaega e paka ai ta’avale, e oo fo’i i totonu o le fale lea e faia ai le fa’atasiga, e iloa mamao atu lava i fafo le fa’atumulia o totonu i tagata ua aga’i atu e auai i lenei fa’amoemoe tele. I fafo o le faitoto’a o loo fa’apipi’i ai ni laupapa tetele se lua. O le isi laupapa o loo lolomi ai le ata o le ali’i o milionea o Laneselota ma faalauiloa ai o ia o le Failauga Faapitoa, ae o le isi ie o loo tusia ai faaupuga nei, “E le fa’atagaina ni tagata meauli i totonu”.

Comment Here