E LE O OE O SE SULI MONI

Vaega 98

 

Na atili ai ona pati pati le motu o tagata aemaise ai le ulugali’i o Meki ma Lucy faapea ai ma matua o Laneselota i le taimi na vaaia ai le maligi fa’avai ifo i lalo o loimata o Ianeta, ina ia fa’alototeleina ai o ia e fa’aleo sana fa’amatalaga i luma o le aofia. E le i toe i ai se mea na toe gase poo se isi na toe gagana i le taimi na amata ai le fa’amatalaga a le tama’ita’i o Ianeta. Sa ia faafetai i ona matua fai lea ua avea nei ma ona matua moni, le ulugali’i o Meki ma Lucy, i lo la alolofa fa’amaoni ia te ia ma le naunau e avea o ia ma la tama moni. “Fa’afetai i lo oulua alolofa i lenei tama’ita’i pologa ma le ola mativa ..” Na fa’aauau le fa’amatalaga umi a le tama’ita’i e fa’atatau i lona olaga pologa, ma le mafua’aga na ala ai ona avea Lucy ma Meki ma ona matua, ona o le taimi na fa’apologaina ai o ia e le fafine saua o Mekala, e aofia ai le sasa o ia ao matamata tamaiti aoga, atoa ai ma le lafo atu o upu mamafa e fa’a maasiasi ai o ia i luma o tamaiti aoga, aemaise ai ma lana faiaoga, le fafine o Lucy, lea ua avea nei ma ona Tina. Na matua maofa tagata sa fa’alogologo i le tulaga pologa sa oo i ai le olaga o Ianeta, e le gata i lona tupu tupu a’e i totonu o le aiga o le fafine milionea o Mekala ma lona to’alua o Pulusi, ae fa’apea fo’i i le taimi na fa’afuase’i ai ona ave fa’agaoi o ia ma faapologa i totonu o le aai o tagata uli, lea o lo o pulea e le Tupu saua ma le fasioti tagata o Eteuati II.

 

O se tasi o itu na fia faalogologo i ai le aofia aemaise lava matua o Laneselota, o le taimi na toe fo’i mai ai Ianeta i ona matua ma maua ai le avanoa e fa’aauau ai lana aoga. Sa na o le pupula to’a o tagata fa’alogologo ao fa’amatala ma loimata e Ianeta le taimi na aga’i atu ai le tamaloa o Meki, o le Leoleo nana sinia lea i totonu o le malo ma lana vaega faapitoa e saili mai o ia mai totonu o le malo o tagata pologa, ae na avea ma itu na pu’e faapagota ai o ia e fitafita a le Tupu saua o Eteuati II, ma taofia ai o ia i le falepuipui mo le vaiaso atoa e fa’atali ai le taimi e fa’aoo ai le fa’asalaga o le oti ia te ia, ina ua ia taumafai e foua le malo. “O se ali’i meauli sa faapologaina fo’i i totonu o le maota o le Tupu o Eteuati, o ia lea sa ia tatalaina le faitoto’a o le fale na loka ai Meki, ma amata mai ai loa iina le solaaga seia oo lava ina la mauaina a’u ma matou o ese mai ai loa mai totonu o le aai o tagata uli ..” O le fa’amatalaga lea a Ianeta na vaaia ai le maligi ifo i lalo o loimata o le tamaloa o Meki, ona ia tu lea i luga ma savali atu ua fusi lona afafine ma musumusu atu i ai, “Ianeta, aua e te toe mafaufau fua i mea ua tuana’i ma le mafatia o lou mafaufau. Pau lo’u lagona ua i ai, o le loto fiafia ina ua fa’ai’uina ma le manuia lau aoga, ma ua avea fo’i oe o se tama’ita’i ua matua ma aga’i atu i tulaga manuia lou olaga.”

 

O le fa’aiuga o le fa’amatalaga faaumiumi a le tama’ita’i o Ianeta, sa ia fa’afetaia ai loa le ali’i o Laneselota ma lona loto fesoasoani i le ulua’i taimi na fa’atoa la feiloa’i ma masani ai. E le gata ua atili ai ona lauiloa o ia e tagata, ae ua mafai ai fo’i ona salalau atu se vaega tele o kopi o lana ulua’i Tusi sa tusia i Fale Tusi eseese a le malo, ma ua oo lava fo’i i aoga eseese uma i totonu e aofia ai aoga mo tamaiti papa’e ma tamaiti uli, ua latou fa’aaogaina uma lana tusi o se vaega o a latou aoaoga. “Avea ai fo’i lenei avanoa ou te fa’afetai atu ai i matua o Laneselota, i lo oulua finagalo malamalama ia te a’u, aua o a’u nei, ua na o se tama’ita’i meauli pologa e le taualofa ma amanaia e tagata. Ae o lenei aso, a o molimauina e uo ma aiga faapea ai matua, ou te fiafia ai e fa’ailoa atu lo’u naunau ina ia avea Laneselota o se uo mamae ia te a’u, ma ia amata fo’i i le aso nei ona aloaia la maua mafutaga.” O le fa’amatalaga mulimuli lea a Ianeta na vaaia ai le tau fai fiafia o la aiganalua ina ua aloaia le laua faigauo i luma o uo valaaulia ma matua, ma ua vavala mai ai fo’i ma le tulaga manuia o lona olaga i le lumana’i, ina ua mafai ona fa’auo atu o ia i le ali’i o milionea o Laneselota.

Comment Here