Ads by Google Ads by Google

E LE O OE O SE SULI MONI

Vaega 97

 

Sa na o le tu tu o le tama’ita’i o Ianeta ma luelue lona ulu ma ona foliga ataata, a o fa’asoa atu lava le Tina o Laneselota e fa’atatau i le olaga o Ianeta. E fai talanoaga a le to’alua lea, ae o lo o faalogologo lava ma le toto’a matua o Ianeta, le tamaloa Leoleo nana o Meki ma lona to’alua faiaoga o Lucy. Na vaaia e le ulugali’i o Meki ma Lucy lagona fa’ateia o Ianeta, e foliga mai ua te’i o ia i le mata’utia o le maualuga ma le fa’aaloalogia o le aiga o Laneselota. E le gata o ia o le atali’i e tupu a’e i se aiga milionea, ae e matua tulaga ese le mamalu ma le amanaia o lona aiga e tagata o le malo ma le tama’i aai lea o loo latou nonofo ai. Na vaaia e Lucy foliga tau fa’aletonu o Ianeta i luga o le laulau, o lea na tago atu ai le fafine ma uu le lima o si ana tama ma musumusu atu i ai, “Ianeta la’u pele, o e fiafia i lenei aso, e foliga mai i la’u vaai e i ai se mea o lo o tupu,” na faliu le tama’ita’i i lona Tina ma tali atu i ai ma ona foliga fiafia, “Ioe Tina, ua lagona lava lo’u fiafia, se’i vagana ai lava le fa’ateia o o’u lagona i le tulaga maoa’e e fa’atatau i le fa’aaloalogiaina o lenei aiga e tagata uma, aemaise ai lava matua o Laneselota”. E amata talanoaga a Lucy ma Ianeta ae amata loa ona pisi mai tama’ita’i faigaluega mo le kilivaina mai o meainu ma taumafa i luga o le la’oai, ae o le taimi lea o lo o talanoa to’atolu ai le tamaloa o Meki ma matua o Ianeta i le isi itu o le laulau, ma faasagasaga i le taoto mai o le gataifale ma le matagofie o le taulaga. O le isi itu o le laulau o lo o talanoa ai Ianeta ma lona Tina, ae o Laneselota o lo o pisi i le tau fa’atulagaina mai o le faili e fa’afiafia i le taligasua a aiga e lua.

 

Ua fa’agasolo le fiafia ma ua feiloa’i atu fo’i le isi i le tasi, ma ua lagona ai le mafanafana o le mafutaga i le va o aiga e lua. Ina ua oo i le taimi faapitoa o talanoaga aloaia, na tula’i ai loa le ali’i o Laneselota ma fa’alauiloa aloaia Ianeta ma ona matua, atoa ai fo’i ma le fa’alauiloaina o ona matua atoa ai ma lo latou aiga. Ua fa’agasolo le fa’amatalaga a le ali’i e fa’atatau i le ulua’i taimi na la feiloa’i ai ma Ianeta i le aso o le fa’auuga a le Iunivesite sa aoga ai Ianeta, lea sa ia mautauina ai le tulaga maualuga o togi sa maua e le tama’ita’i mai le vasega fa’au’u. Na faailoa e le ali’i o Laneselota i lea feiloaiga le mafua’aga na ala ai ona ia manatu e fa’amasani atili ia Ianeta, ona o le tulaga i le avea ai o ia ma tusitala o le tusi lea ua avea ma tusi ua lauiloa i totonu o aoga a le malo, lea o lo o fa’amatala ai e le tama’ita’i lona olaga pologa seia oo ina fa’aeaina o ia ma avea ma tama’ita’i na fa’auluulu i ai le vasega fa’au’u. Na tau fai pati pati uma tagata sa i ai i le feiloaiga i lea aso i le fa’amatalaga a le ali’i o Laneselota, ma latou fa’atali poo le a le isi vaega fa’aiu o lana molimau.

 

“Ua ou manatu la i lenei aso, o se taimi lelei lenei ma talafeagai mo a’u ma Ianeta, e fa’ailoa ai tulaga uma e fa’atatau i le olaga o le tagata aemaise ai mea e fiafia ai i le lumana’i. Ae ou te lei tuuina atu lenei avanoa mo Ianeta, ou te faapea atu ma lo’u agaga moni ma le faamaoni, ua ou mana’o ina ia aloaia i le aso lenei la’u talosaga o le a tuuina atu, a o molimauina e o ma matua, ina ia fai ma pine fa’amau o lenei fa’amoemoe. Ianeta, ou te fia faailoa atu la’u filifiliga ua i ai, ina ia avea oe ma a’u uo tama’ita’i.” Na tau fai pati pati tagata sa i ai i le aiga faapitoa, e oo lava fo’i i matua o le ali’i o Laneselota ma matua o Ianeta, ua laulau tutu i latou ma fa’aalia lo latou lagona fiafia atoa ai ma le taliaina o le fanoga a le ali’i o Laneselota. Na vaaia le tula’i lemu o le tama’ita’i o Ianeta i luga, ona tepa lea i lona Tina ma ata atu i ai, fa’atoa savali ai i luma o le pulela’a mo lana tautalaga. O le taimi lava na tu ai le tama’ita’i i luma o le pulela’a, na toe faalogoina ai le tau fai pati pati o tagata, ae o Ianeta i le taimi lea, ua na o le punou ma le maligi o ona loimata.