Ads by Google Ads by Google

E LE O OE O SE SULI MONI

Vaega 93

 

E leai ma se isi o le aiga na gagana ina ua uma ona lau e le fafine o Lucy tusitusiga o loo tusia i totonu o le card sa i totonu o le teutusi. Ua na o le tau fai tilotilo solo o le isi i le tasi. Ua tilotilo atu le tama’ita’i o Ianeta i ona matua, ae ua tilotilo atu fo’i i ai ona matua, ona fai ai lava lea o le gaioiga lea a le aiga mo ni nai sekone, ae na fa’ateia i latou ina ua fa’apea atu se leo malu, “O le a se meainu e mana’omia mo lo outou aiga”, na faliu le tamaloa o Meki i ona tafatafa ma ia vaaia ai le tama’ita’i faigaluega o le fale’aiga, o loo tu atu i tafatafa o le laulau lea o loo nonofo ai lo latou aiga i totonu o le fale’aiga, ma lana toniga ua manaia ma ua leva ona sauni o ia e auauna atu mo le latou aiga. Na ata le tamaloa o Meki, ona fa’apea atu lea i le tama’ita’i faigaluega, “Aumai ni fagu juice se 3 mo matou fa’amolemole lava”. Na luelue le ulu o le tama’ita’i faigaluega, ona faliu lea ma savali aga’i i tua, ao le aiga o Meki i le taimi lea, ua alu le latou tali-e, e pei o se mea malie lea sa tupu, i le umi ona latou fetilofa’i solo ae galo ai le teine faigaluega ua leva ona tu i o latou tafatafa mo le fa’amauina i lalo o le latou oka.

 

“O le a sou manatu i le tusi lea na e faitauina”, o le fesili tofotofo atu lea a Meki i lona to’alua, ae o le fafine o Lucy, ua na o le nofo ma fa’anunumi lona muaulu, e pei o loo taumate e tupua faigata. Na faliu le fafine i ona tafatafa o loo nofo ai Ianeta, ona ia fesili lea i ai, “Ae o le a sou manatu siaula Ianeta i l tusi lea na ou faitauina, o le a le uiga o lenei tusi.” Na vaaia e Ianeta foliga o ona matua, e foliga mai o lo o i ai se tali o loo la fia fa’alogo ai lava mai ia te ia, aemaise ai, o loo fa’ai’u le tusi a Laneselota i le talanoaina lea o se mataupu taua e fa’atatau ia te ia. Na ata Ianeta ona faapea atu lea i ona matua, “Vaai oulua nai o’u matua peleina, e i ai lo’u talitonuga na o a’u, atonu ua fia talanoa mai Laneselota ia te oulua mo se mafutaga fa’aleuo ma a’u nei, ae o le a mautinoa atili le agaga o le ali’i milionea pe afai tatou te feiloa’i i le afiafi nanei.” O le tali atu lea a Ianeta i le fesili a lona tina, ae fetaui loa ma le fo’i ane o le tama’ita’i faigaluega ma a latou fagu juice, sosoo atu ai lava ma le oka o le latou taumafataga mo le aoauli, ma vaaia ai loa le aai fiafia o le ulugali’i ma le la tama ina ua mae’a mai le fa’auuga sa latou fa’atasi atu i ai.

 

I le ogatotonu o le taligasua a le aiga, na fa’afuase’i ai ona fesili Ianeta i se fesili na tau le mafai e ona matua ona tali, “Aisea lava ua filifili ai e Laneselota a’u e fai ma tagata e fiafia i ai. Ae a ou vaavaai atu i le to’atele o tama’ita’i papa’e o loo latou feofeoa’i ma talatalanoa, ona ou manatu ai lava lea o a’u, ua na o a’u lava o se tama’ita’i fa’atauva’a, mativa ma le taualoa, ua na o a’u o se tama’ita’i meauli sa ola mai i se olaga pologa.” Na fa’afuase’i ona le ‘ai a le tamaloa o Meki, ona aapa atu lea i le solo pepa ua aumai ma solo ai ona gutu ma ona lima, e foliga mai o se lauga o se fa’aulufalega lea o le a alo atu i ai. Na vaaia e Meki foliga le mautonu o si ona afafine ina ua fa’atoa mae’a ona fai lana fa’amatalaga e fa’atusatusa ai o ia ma le ali’i o Laneselota. “Vaai oe Ianeta, atonu e sa’o lava oe i ou mafaufauga. E fa’apena fo’i o’u manatu i le tele o taimi, a ou nofo ma vaavaai i lo’u tagata ma fa’atusatusa i isi tagata o le galuega, ona ou faapea lea, ua na o a’u lava o se tagata fa’atauva’a toe le taualoa. Ae i le silafaga a le Atua, e tutusa ai tagata uma i lona alofa. O ai na iloa o se agelu lenei tama o Laneselota,” E lei uma lelei atu le tala lea a Meki ae vaaia le tau fai togi atu o ulu  o laneta ma le fafine o Lucy ia te ia, e foliga mai ua tete’i i lana fa’amatalaga. “Ua mafua ona ou fai atu atonu o Laneselota o se agelu, e na o le agelu a le Atua na te faia gaioiga faapenei, o lona alofa i soo se tagata, tusa lava poo le a le manatu o le lalolagi i lena tagata. Ou te iloa, afai o se manatu lea o loo ia Laneselota, o le avea o oe la’u pele Ianeta ma ana uo, atonu o le finagalo fo’i lea o le Atua.”