Vaega 92

“Fa’afetai lava mo le lauga matagofie i lenei aso,” o le tala lea a se tasi o tagata ma pa’i atu lona lima i le tauao o Ianeta. Na faliu Ianeta i tua ma ia vaaia ai e Fafine e tai foliga tutusa lona matua ma le matua o lona Tina o Lucy o loo sagi sagi atu ma ona foliga fiafia. Ona aapa atu lea o Ianeta ua fusi mai le Fafine ma fa’afetai atu i ai mo lana fa’amalosi ‘au. “Fa’afetai pe afai ua i ai se aoga o la’u taumafaiga i lenei aso mo oe le Tina aemaise ai le Vasega Fa’auu.” O le naunau o le Fafine lea i lona fia iloa atili o Ianeta, na mafua ai ona ia tago i lana ato ma tu’u atu se teutusi ua uma ona ia saunia, e fai meaalofa atu ai i le tama’ita’i meauli. “Vaai oe Ianeta, o la’u meaalofa lea mo oe, o le teutusi lea. O lo o i ai i totonu ma la’u numera e te vili atu ai taeao, ou te fia talanoa atili ia te oe, ae talu ai o lo o to’atele isi tagata o loo fia talanoa mai ia te oe, o le mafua’aga lea o le a ou le fa’alavelave umi atu ai.” E fai lava tala a le Fafine ma aapa atu ua fusi mai le tama’ita’i meauli ma sogi atu i ai, ona savali ese loa lea, ae o le taimi fo’i lea na vaaia ai le tau fai lolofi mai o ali’i ma tama’ita’i o le vasega fa’au’u ma feiloa’i atu i le tama’ita’i o Ianeta, e tusa ai o le lauga matagofie, ua lu’i ai o latou mafaufau e finau ina ia ausia togi maualuluga i le lumana’i.

O le mae’a ai ona feiloa’i atu o le to’atele o le vasega fa’au’u atoa ai ma matua i le tama’ita’i o Ianeta, na fa’atoa fo’i ai loa le tama’ita’i i le vaega o lo o paka mai ai le ta’avale a ona matua. Na popole tama’ita’i ina ne’i umi ona fa’atali ona matua ia te ia, ae o le itu na fa’ateia ai Ianeta, ina ua taunu’u atu i le vaega o lo o paka mai ai le ta’avale ae na oso fiafia mai lona Tama ma fusi o ia ma fa’apea atu i ai, “E leai se isi mea e sili ona gata mai ai lo maua fiafia, ina ua mafai ona avea oe ma maua Tama. E le gata ua e fa’atula’i se lu’i mo lenei aai ma lenei aoga, ae o lea fo’i ua tafiesea ai ma le fa’afitauli ua tele tausaga o tula’i mai i lenei aai, o le fa’ailoga lanu lea o tagata papa’e i tagata uli.” E fai atu lava tala a le tamaloa o Meki i lona afafine, ae ua na o le tu o le tama’ita’i o Ianeta ma ata, ona ia faapea atu lea i ona matua, “Fa’afetai fo’i i lo oulua alofa moni, ua lua manatu ai e avea a’u le teineititi meauli pologa, o se tasi o lo oulua aiga.” Na vaaia le maligi o loimata o le fafine o Lucy ao ia fusi Ianeta, ma ia musumusu atu i ai, “Ianeta, o oe o le ma tama na fanau mai i o ma manava. E le toe fa’aluaina oe i se isi lava mea o lenei olaga, ua ma fiafia fo’i ina ua vaaia le sagi sagi fiafia atu o fanau ma matua e lagolago oe i lenei aso.”

Ua tuli oso le aiga i totonu o le latou ta’avale ma aga’i lemu atu loa mai totonu o le lotoa ma le fa’amoemoe e ui atu i le faitoto’a tele o lo o aga’i uma atu ia i ta’avale. A o aga’i atu le ta’avale a le aiga, na fa’afuase’i ona taofi mai e Leoleo faitoto’a le ta’avale. Na vili i lalo e le tamaloa o Meki le tioata o le ta’avale ma fesili atu i le ali’i Leoleo faitoto’a, pe mana’omia se fesoasoani, ae na ata le Leoleo faitoto’a ma fa’apea atu ia Meki, “Fa’amolemole lau susuga, o le teutupe lea sa tu’uina mai e se tagata ia te a’u, ma le fa’atonuga ina ia tuuina atu ia te oe.” Na fa’afetai Meki i le Leoleo faitoto’a ona ia tago lea ua uu mai le teutusi ma tu’u atu ia Lucy, ona fa’aauau loa lea o le latou ta’avale aga’i atu i se tasi o fale’aiga, lea ua fa’amoemoe e fai ai sa latou taumafataga o le aoauli. O le naunau tele o le aiga e fia iloa poo le a lea teutusi, na tago atu ai le fafine o Lucy ua tatala, ae vaaia ai se tusi valaaulia faapitoa o loo i totonu. “Mo lau susuga Meki ma le faletua ia Lucy, aemaise ai lava le tama’ita’i Tusitala ia Ianeta, ua ou talosaga atu ma le fa’aaloalo tele lava, mo se avanoa tatou te talisua fa’atasi ai ma o’u matua i le fale’aiga o le Golden View o lo o i le itu i sisifo o le taulaga i le itula e 5:00 i le afiafi nanei, mo sa tatou mafutaga fiafia, atoa ai ma le talanoaina o se mataupu e sili ona taua mo Ianeta. Soifua, o Laneselota.”