Ads by Google Ads by Google

E LE O OE O SE SULI MONI

Vaega 91

 

Na oo lava fo’i i matua o le tama’ita’i meauli o Ianeta, ua la tutu fo’i ma faasasaga atu i le itu o loo tu mai ai si a laua tama, ona pati pati fo’i lea o la lima e fa’ailoa atu ai o la agaga fa’agaeetia ma le fiafia i le faaeaea ua fa’aali e le aofia aemaise ai le mamalu o le vasega fa’auu aso ia Ianeta. A o le tama’ita’i o Ianeta i le taimi lea, ua na o le tu ma ia talotalo atu i le mamalu o le aofia e fa’ailoa atu ai lona fa’afetaia o le amanaiaina o lona taunu’u ane. Ua amata le sauniga o le fa’auuga, ma ua molimauina fo’i le matagofie o pesega ma taleni eseese a le vasega fa’auu i lea aso, ma o se tulaga na matua fa’afiafiaina ai matua na lolofi atu e molimauina taumafaiga a latou fanau. O luga o nofoa o le au valaaulia, o lo o vaaia ai le avanoa o nofoa e 2 e le o nofoia. Ua oo i le taimi o le saunoaga faapitoa o le sauniga o le faauuga, ona vaaia lea o le Fofoga o le aso ua tula’i i luga ma fa’alauiloa le Failauga Faapitoa mo le vasega fa’auu, o le susuga ia Laneselota. Ua tau fai pati pati uma le aofia, o isi ua tutula’i i luga ma tau fai autilo solo poo fea o loo i ai le Failauga Faapitoa, ona e le o saofa’i mai o ia i luga o nofoa o lo o i ai le au valaaulia faapitoa e pei ona masani ai sauniga tetele faapenei o fa’auuga a le aoga lenei. E lei umi ae vaaia loa e le aofia le savali mai o Laneselota mai le isi tulimanu o le fale, ma aga’i atu loa i luga o le pulela’a mo lana lauga fa’apitoa.

 

Ua leai se isi e toe pisa, poo se leo fo’i e toe gase, ae ua na o le sa-o uma o tagata ma fa’alologo poo le a se feau o le a momoli atu e le ali’i o Laneselota i lana lauga. Ua lauiloa le ali’i o Laneselota i totonu o le aai ma le aoga lenei, ona o ia lea na fa’auluulu i ai le latou tausaga fa’au’u, o ia fo’i o se tagata o ali’i ua lauiloa i totonu o le aai i tusi ua uma ona ia tusia, lea fo’i o lo o fa’aaogaina i aoaoga i totonu o le aoga maualuga. Ina ua mae’a ona fa’afeiloa’i e Laneselota le aofia ma fa’afetai mo le avanoa ua mafai ai ona filifilia o ia e fai ma Failauga Faapitoa, na ia fa’alauiloa aloaia ai loa lea o se tagata ua ia filifilia la te to’alua i luga o le pulela’a i le taimi o lana lauga faapitoa, o ia lea o Ianeta. Na toetoe a pau i lalo le faalo o le fale i le tau fai pati pati o tagata ma autilo solo poo fea le itu lea o loo tula’i a’e ai i luga Ianeta. I le pito lava i tua o le aofia ma matua, na vaaia ai le tula’i a’e i luga o Ianeta, ma savali punou aga’i i luma ma le fa’ateia o lona loto i lenei faaeaea ua faia e lenei ali’i ia te ia. E ui i le fa’ateia tele o le tama’ita’i, ae sa ia taumafai e fa’ailoa atu i le aofia e ala i ona foliga lona to’a pea ma le leai o se mea o tupu. Na atili ai ona toe pati pati le aofia ina ua taunu’u Ianeta i luma o le pulelaa o loo tu ai Laneselota, ona savali ane lea o le ali’i ma fa’afeiloa’i le tama’ita’i ona la tutu fa’atasi mai ai lea i luma o le aofia.

 

E lei toe fa’aali Laneselota i le taimi lea, ae ua ia fa’alauiloa aloaia matati’a ua mafai ona ausia e Ianeta, e le gata o ia o se tama’ita’i tusitala, ae o se tasi o tusitala ua matua iloga le ta’uta’ua o le tusi sa ia tusia, le tusi e fa’atatau i lona olaga ma le auala na tupu tupu a’e ai o ia o se tama’ita’i pologa, seia oo lava ina fa’aeaina o ia ma avea loa ma tagata ua aloaia ma fa’aaloalogia e le to’atele o tagata i le aai o loo latou tuaoi. Na fa’ateia le auvalaaulia ma le aofia ina ua faapea atu Laneselota, “O le mea ou te fiafia ai e fa’alauiloa aloaia la tatou failauga faapitoa mo lenei aso, o le tama’ita’i Tusitala ia Ianeta.” Ua fa’alologo uma le aofia ma tau fai tulimata’i la latou vaai i gaioiga uma a le tama’ita’i i lea taimi. E leai se leo poo se mea na toe gase. Na matua fa’amanuiaina matua ma le fanau fa’au’u i le matagofie o le lauga filifilia o le aso, lea na fa’aaoga ai e Ianeta upu fa’amalosi ma upu fa’alototele na te lu’iina ai loto ma mafaufau o tamaiti aoga uma o le vasega fa’au’u, ina ia finau latou te ausia sini e sili ona maualuluga i le lumana’i, ina ia mafai ai ona avea i latou o ta’ita’i o le malo i le lumana’i.