Ads by Google Ads by Google

E LE O OE O SE SULI MONI

Vaega 89

 

“ Ua vaaia le fa’atumulia o le fale taalo lea ua faatulaga e faataunuu ai le faauga a le aoga maualuga o loo aooga ai fanau a tagata milionea. Ua vaaia le tau fai feiloa’i ma le fiafia o matua ma fanau aoga i le taeao ina ua aga’i atu i le lotoa. E oo lava fo’i i uo ma paaga, ua pei o se aso fiafia lea mo i latou uma, ona o lea ua fa’atoa toe maua lea o se avanoa e feiloa’i atu ai i uo ma aiga, faapea ai tagata milionea mai vaega eseese o le atunu’u. O se tasi o vaaiga mataina sa molimauina i lea aso, o le aga’i atu lea o fanau aoga ma matua ma laulaututu i luma o le ie tele o loo pipi’i ai le ata ma le igoa o Ianeta, o lo o tautau i luma tonu lava o le faitoto’a e ulufale atu ai i totonu o le fale taalo. I lalo ane o le ie i le isi itu o le pa, o lo o ta’atia ai le laulau ma faaputuga tusi o loo i ai. O loo saofa’i ai i tafatafa se tama’ita’i lalelei, o loo ia tali fesili a tagata o loo aga’i atu e fiailoa poo ai lenei tama’ita’i meauli o loo fa’apipi’i lona ata i luma o le faitoto’a o le fale taalo. “O se vaaiga ese lenei vaaiga ia te a’u. I le tele o tausaga talu ona ou aoga i lenei aoga, o se taimi muamua lenei ua ou vaaia ai lenei tulaga, o se tama’ita’i meauli lalelei lava ua fa’alauiloa lona ata i nofoaga e to’atele ai tagata papa’e”. O le talatalanoa to’alua lea a ni isi o tama’ita’i aoga o le vasega fa’auu.

 

Na aga’i atu se tasi o ali’i milionea e faiaoga ai lona atali’i i le aoga ma fesili i le tama’ita’i o loo saofa’i i luga o le laulau. “O ai lenei tama’ita’i o lo o fa’alauiloa lona ata i le aso o le fa’auuga a le fanau aoga?”. Na tali le tama’ita’i, o le tama’ita’i meauli o Ianeta, o ia o le tusitala sa ia tusia se tasi o tusi ua sili ona lauiloa i totonu o Faletusi eseese i totonu o le taulaga e fa’atatau i lona olaga finau atoa ai ma le fa’aeaina o ia. Na luelue le ulu o le toeaina milionea ona ia tago lea ma fa’atau le tusi ma faitau ai. Sa faapena fo’i ona gasolo atu isi matua ma tu’u fesili i le uiga o le ie ma le ata o loo faapipii ai, ona sosoo ai loa lea ma le fa’atau o le tusi ma faitau. Ua gasolo atu le to’atele o tagata matua, o tagata milionea, o uo ma paaga ma latou faitau i le faasalalauga i luga o le ie, sosoo ai ma le faitauina o le tusi, ma ua to’atele i latou ua malamalama i sina tala’aga puupuu e fa’atatau i le tama’ita’i o Ianeta. E latalata loa i le taimi e amata ai le sauniga o le faauuga ae taunu’u loa le ta’avale a Ianeta ma ona matua i le lotoa. O se vaaiga na fa’ateia ai i latou ina ua afe atu le latou ta’avale i totonu, ae latou vaaia le ie o lo o tautau mai i luma o le faitoto’a o le fale taalo o le a faia ai le faauuga, o lo o faapipii mai ai le ata o Ianeta ma le autu o lana tusi ua mae’a ona tusia. Na matua faateia le tama’ita’i i lea taimi, ua le gagana fo’i o ia. O nai ona matua i le taimi lea, sa tau i ai lava ni o la lagona popole i le taimi na latou aga’i atu ai, ina ne’i ese ni uiga o tagata papa’e e fa’aali atu isi a laua tama. Ae ina ua la vaaia le ie o lo o fa’apipi’i i luma o le faitoto’a, na suia atoa ai o la lagona i le fiafia ma le lototele.

 

Ua savavali fa’atasi atu le ulugali’i ma le tama’ita’i o Ianeta i le auala e aga’i atu i le faitoto’a, fa’atasi ai ma isi fo’i matua o le vasega fa’au’u. Ua avea le laulau o loo fa’atau ai tusi ma auala o le poloka laititi o le laina e aga’i atu ai i totonu, ae e lei umi ae taunuu atu loa Ianeta ma ona matua i luma o le laulau. O le fa’ateia tele o le tama’ita’i o lo o saofa’i i luma o le laulauina ua ia vaaia Ianeta ua ulufale atu, na mafua ai ona ia alaga leotele e fa’apea, “O lea ua sau o ia”. Na avea lea ma auala na tau fai tepe uma atu ai tagata i le faitoto’a, ma latou vaaia ai se tama’ita’i meauli o loo savavali atu ma ona matua. O le ali’i o Laneselota o sa tu mai i le isi tulimanu o le fale taalo, o ia lea na muamua tula’i ma pati pati ona lima e fa’ailoa ai lona talia fiafia o le ulufale atu o Ianeta, ma faapea ai ona tau fai tutula’i uma tagata e aofia ai matua ma fanau fa’au’u ma latou pati pati uma e fa’ailoa ai le agaga fiafia ina ua latou vaaia Ianeta i lea aso.