E LE O OE O SE SULI MONI

Vaega 86

 

Na tago atu le lima o le tama’ita’i o Ianeta ma faafeiloa’i le aao o le ali’i talavou lea, ona faapea mai lea o le tala a le tagata lenei, “O a’u o Laneselota, ou te sau mai se tasi o aai e fai lava si mamao mai le nofoaga lenei, ae ua fa’amanuiaina a’u ina ua ou oo mai i le fa’auuga i lenei aso, ae fa’alauiloa aloaia ai loa fo’i ma lau ulua’i tusi sa e galue ai mo se taimi umi lava”. Na vaaia e le ulugali’i o Meki ma Lucy le sagisagi fiafia o le ali’i o Laneselota i le galuega sa gapatia ai Ianeta, o lea na faapea atu ai loa le tamaloa o Meki, “Talofa Laneselota, faafetai mo lou susu mai e molimauina le fa’amoemoe a le au fa’auu i lenei aso, ae ou te vaai atu e i ai lava lou faanaunautaiga i le tusi ua faalauiloa i lenei aso, pe afai e tusa ai ma lou finagalo, ae tatou feiloa’i i le fale’aiga o loo i luma tonu o le faletupe a le malo i le taulaga i le isi itula e tasi o loo sosoo nei, tatou te faiaiga ma talatalanoa atili ai iina, e a lena tonu,” na talia ma le agaga fa’afetai e le ali’i o Laneselota le valaaulia ma latou tuu tala ai loa ma le ulugalii.

 

Ona faapea fo’i lea ona faia o le tonu a le ulugali’i ma le ali’i foma’i ia Lavi, o le a latou taape ma le tonu latou te toe feiloa’i i le faleaiga i le taimi e pei ona fuafuaina. E na o lagona o le fiafia na momoli e le ulugali’i ia Ianeta ina ua latou taunu’u i le fale i lea afiafi, ona o le tulaga sa ia ausia i lana aoga, atoa ai ma le tusi lea ua fa’alauiloa. O totonu o le ato lea o loo uu e le tama’ita’i o Ianeta, o loo i ai uma tupe ma siaki sa maua mai i tusi e 500 ua uma ona faatau atoa ai ma meaalofa na ofo atu e le to’atele o tagata sa i ai i le fa’auuga, ona o le fa’agaeetia o latou loto i le maoa’e o le tulaga na mafai ona ia ausia. “Vaai oulua matua, e le mafai e upu ona faamatala lo’u fiafia, ae o la’u mealofa faatauva’a lenei mo oe, o tupe uma e maua mai i le tusi lenei, ou te ofo atu e fai mealofa ai mo oulua”. Na maligi loimata o le tamaloa o Meki i le alofa, ona ia faapea atu lea i lona afafine, “Vaai oe Ianeta, taoto mai le tupe ma au mealofa iinei e teu ai, se taimi ona tatou toe talatlaanoa lea i ai, ae o le a tatou sauni loa ma aga’i atu i le fale’aiga, ina ne’i fiu Lavi ma Laneselota e fa’atali mai tatou.

 

E fetaui le saofafa’i o le aiga o Ianeta i lalo ae latou vaaia loa fo’i le aga’i atu o le ali’i o Laneselota, e muamua atu i luma ae mulimuli atu ai ni ali’i e foliga mai o ni Leoleo ofu savali i ona tua, ana le mae’a lava ona fa’atalofa Laneselota ma laneta ma ona matua ma latou saofafa’i i lalo, e le solomuli ese ali’i tino ese ia e to’alua ma saofafa’i mai i le isi laulau e le mamao ese atu ma le laulau lea o loo nonofo ai le ulugali’i. O fafo i le vaega e paka ai ta’avale, o loo paka mai ai se ta’avale tele lava ma isi fo’i ali’i tino ese e to’alua o loo tutu ai i tafatafa. E fetaui le fa’afeiloa’i atu e Ianeta o Laneselota ae vaaia loa le savali atu o le ali’i foma’i o Lavi ma latou saofafa’i fa’atasi i luga o le laulau, ma amata loa le latou talanoaga, a o fai fai malie atu taumafataga mo le afiafi. Na vaaia e le uluagali’i o Meki ma Lucy i lea afiafi le tulaga ese ua i ai le fiafia o Ianeta, e le tutusa ma le tele o tausaga o le latou mafutaga. Ma ua avea ai lea tulaga ma itu ua atili ai le fiafia o le ulugali’i. “O le a sau galuega o lo o faia i lenei vaitau ali’i Laneselota”, o le fesili lea a le tama’ita’i o Ianeta a o latou talatalanoa i luga o le laulau, ona fa’amatalatala fo’i lea e le ali’i lana galuega o loo faia, atoa ai ma le aiga e sau ai o ia. Na momotu faafuase’i le talanoaga ina ua toe fesili Ianeta, “Ae o ai ali’i pei ni leoleo e to’alua ia na tutu mai i ou tua i le taimi na e taunu’u mai ai”, na ata le ali’i o Laneselota ma fa’apea atu, “O alii e to’alua ia, o auauna ia a lo’u Tama matou te malaga i soo se mea ou te alu i ai mo le puipuia o lo’u saogalemu. O a’u, ua na o a’u lava le atali’i a se ulugali’i milionea i totonu o le malo, o a’u fo’i o se Tusitala sa ou tusia ni tusi se 2 e fa’atatau i olaga o meaola o le vaomatua, ona o la’u matata lea sa ou aoga ai, ma o se lagona faifia tele ia te a’u lo’u maua o lenei avanoa tatou te mafuta ai, ma ou molimauina lau ulua’i tusi lea ua fa’alauiloa i le aso”.

Comment Here