Vaega 85

Na umi se taimi o vavao tagata i le fiafia, ao tuu aloaia atu e Ianeta le teutusi sa uu i lona lima i le ali’i foma’i ia Lavi ma fa’apea atu ai ana upu, “Faafetai tele ia te oe si o’u tuagane i lou agalelei ma lou alofa, ua mafua ai ona ou toe maua le ola”. Na vaaia e le aofia le aga’i atu o le ulugalii o Meki ma Lucy ma fusi i le tama’ita’i o Ianeta atoa ai ma le ali’i o Lavi, ma latou laulaututu ai lava i luma o le stage mo se taimi umi. O le fa’aiuga o le sauniga o le fa’auuga, ina ua mae’a ona fa’alauiloa saunoaga faapitoa a fanau uma sa fa’auluulu i ai vasega taitasi, na fa’alauiloa aloaia ai loa ma le vaega muamua o le Tusi a le tama’ita’i o Ianeta lea ua mae’a ona tusia e fa’atatau i le tala’aga o lona olaga. E leai se mea na toe gase poo se isi na toe pisa, ao fa’aemo mai ata fa’asolo i taimi na amata mai ai le galuega o le tusi a Ianeta, e pei o ona ata ao laititi, o nofoaga eseese sa ola mai ai e aofia ai ma le fale lea ua nofo ai nei ma avea o lona aiga. Ua fa’asolo le fa’amatalaga a Ianeta i le taimi ao nofo pologa ai i le aiga o Mekala ma Maselusi, i le tama’i fale sa nofo ai ma tau savali i le aoga, o le fala sa moe ai, o le aluga ma le ie afu, atoa ai ma le laulau ma le tama’i nofoa palapala sa fa’atu i le ogatotonu o le fale, e fai ai ana meaai ma su’esu’e ai ana mea aoga. “E lei faigofie le amataga o lo’u olaga, sa ou ola pologa, moe i loimata, ala i loimata, leai se isi e fesoasoani mai ia te a’u, ma ua oo mai ai le manatu ia te a’u, ua sili ai ona ou oti”. O tagata sa sili ona taula’i i ai le vaai a le aofia, o le ulugali’i o Meki ma Lucy lea ua avea nei ma matua o Ianeta, atoa ai ma lona tuagaine foma’i ia Lavi, lea fa’atoa iloa le la sootaga ina ua matutua i laua.

Ua fa’asolo le talaaga o le tamaitai meauli ma le autu moni na ia filifilia ai le autu e pei ona fa’aautuina ai lana ulua’i Tusi ua tusia, ona o lona manatu e fa’aiiloa i le lalolagi le olaga pologa sa ola mai ai, ma le agalelei o ona matua lea ua mafua ai ona suia lona olaga. O se tala’aga e fa’amomoi loto i le fa’alogo a le to’atele. O nisi sa na o le fetagisi ma mafaufau alofa, aisea latou te lei iloaina ai lenei tamaitai i taimi ao ia manaomia se fesoasoani. I le fa’aiuga o le tala’aga o le olaga o Ianeta, na ia taua ai loa e fa’apea, ua ia iloa nei, e ui i le autu o lana Tusi e pei ona fa’alauiloaina nei, ae o lea autu ua na o se autu lava, ae o Meki ma Lucy, ona matua moni lava ia na fanau mai ai i lenei olaga. “O la’u meaalofa sili lenei mo oulua, o la’u tusi lenei o le a fa’atauina atu i Faletusi eseese i totonu o le malo, o se tupe e maua mai ai, ou te tuuina atu atoa lava mo oulua o’u matua pele”. O kopi e 500 o le Tusi sa saini ai le lima o Ianeta i le aso o le fa’auuga, na mafai ona fa’atau ma la’u e tagata i o latou aiga. O nisi o ulugali’i e le gata ua fa’atau a latou tusi, ae ua saini siaki ma meaalofa tupe ma tuuina atu i le tama’ita’i o Ianeta.

Sa i ai i totonu o le fale se alii talavou atamai lava, o ia o le ali’i o se tasi o tagata milionea i le malo, o ia fo’i o se tagata sa ia tusia ni tusi se 2 e fa’atatau i olaga o manulele ma manuvae o le vaomatua. O lona auai atu i le fa’auuga i lea aso, sa ia fia iloa pe i ai ni isi mai le vasega fa’au’u e i ai le naunau i le avea ma tusitala i le lumana’i, ae na matua fa’ateia o ia ina ua fetaui lona auai ane i le faauuga ae faalauiloa ai loa ma le ulua’i tusi a le tama’ita’i o Ianeta. Na faatali le ali’i milionea se’i mae’a ona feiloa’i uma atu tagata ia Ianeta ma ofo atu i ai meaalofa, ona ia fa’atoa alu atu lea e feiloa’i i ai. O le taimi lava na aga’i atu ai Ianeta ma ona matua faapea ai le ali’i foma’i o Lavi i le vaega o loo paka ai a latou ta’avale, na fa’afuase’i ai loa ona fa’avava atu le ali’i talavou lenei ma fa’apea atu, “Talofa oe le tama’ita’i Tusitala”, na faliu mai i tua Ianeta ma ia iloa ai se ali’i lalelei e le masani ai o loo tu atu i ona tua, ona ia ofo alofa atu fo’i lea i ai ma fa’apea atu, “Faafetai lava, ae malo fo’i le soifua maua i lau susuga”.