E LE O OE O SE SULI MONI

Vaega 84

 

Na punou le ulu o le tama’ita’i o Ianeta i lalo ao fa’aula atu o ia e le ali’i fomai o Lavi, ona ia sogi atu lea i le ali’i ma ia toe fo’i ai i lona nofoaga, ae o le fafine o Lucy i le taimi lea, ua le fia alu i lona nofoa, ae ua tu ai lava i le isi itu ma fa’atau pupula atu i le nofo mai o Ianeta i luga o lona nofoa. Na autilo mai Ianeta i lona Tina o loo tu atu, o lea na ia tula’i ai ma toe savali mai i le itu o loo tu atu ai ma ia toe fusi ma sogi atu ia te ia ma fa’apea atu ai, “E le mafai e upu ona fa’amatala lo’u loto ua tumu i le fiafia, ou te iloa fo’i o le mafua’aga lena ua le mafai ai ona matu ou loimata Tina, ae aua e te popole i se mea e tasi, a mae’a lenei fa’amoemoe ona tatou o loa lea ma lo’u Tama i le fale tatou te fiafia atili ai lava”. O le toe fa’amalosi ‘au atu lea a Ianeta i lona Tina, na mafai ai loa ona fo’i o ia i lona nofoa ao fa’agasolo pea le polokalame. E pei ona masani ai i tausaga uma o faauuga, e maua ai le avanoa o Ofisa maualuluga a le malo e oo atu ai o latou Pule ma fa’alauiloa le aofa’i o avanoa faigaluega ua mafai ona latou ofoina atu mo fanau aoga e ausia togi maualuluga mai mataupu e fesootai ma galuega a le malo. O le Tamaloa o Meki sa fai ma sui o le Ofisa o Leoleonana Su’esu’e a le malo e fa’alauiloa avanoa e 2 ua maua e i laua ua ausia togi maualuluga mai le vaega. O le fafine o Lucy, lea sa fai ma sui o le Aoga e Aoaoina Fanau e i ai manaoga faapitoa, sa faalauiloaina avanoa e 2 ua maua e i laua ua ausia togi maualuluga e avea ai ma Faiaoga i le aoga lea, atoa ai ma ofisa eseese uma lava a le malo, lea sa fa’alauiloa uma a latou avanoa ma fanau aoga ua latou mauaina.

 

Ina ua oo mai le fa’asologa i le Falema’i a le malo, o le ali’i foma’i ia Lavi sa fai ma sui e fa’alauiloaina avanoa e 2 mo i laua ua ausia togi maualuluga, lea e aofia ai Ianeta ma le isi fo’i tama’ita’i meauli sa fa’auluulu ia i laua le vasega fa’afoma’i a le vasega fa’au’u. I le taimi o saunoaga faapitoa a fanau aoga uma sa latou ausia togi maualuluga i mataupu taitasi, na maua ai loa le avanoa o Ianeta e fa’aleo ai lana meaalofa faapitoa, ina ua uma ona ia fa’afetaia ona matua e tusa ai o le lagolagoina o lana aoga, atoa ai ma le tausiaina o ia i aso e tele. Na fa’ailoa e Ianeta i le aofia, ua uma ona i ai lana meaalofa faapitoa mo ona matua, ae o le a faalauiloa i se taimi mulimuli. “Ae o le meaalofa lenei ua ou filifilia, e tuuina atu i se tasi o tagata faapitoa lava o loo i ai i totonu o lenei fale. O ia lenei sa ia fesoasoani i le fa’asaoina o lo’u ola i le taimi na ou ma’i tigaina ai i le falema’i. Ina ua ou malosi, sa ou saili ai loa se meaalofa sili ou te taui atu ai lou agalelei. E 6 masina o o’u galue e tu’u fa’atasi lenei mealofa mo oe. O le aso lenei, ou te tu’uina atu ai pepa nei i le ali’i foma’i sili mai le Falema’i a le malo, le susuga a Dr. Lavi”. Na tau le lagona se mea i totonu o le fale i le tau fai patipati uma o tagata, ao vaaia le savali lemu atu o le ali’i foma’i i luma ma ona foliga ua fa’ateia. Na taunu’u le ali’i foma’i i luma o vaega tonu o le stage o loo tu mai ai Ianeta, ona ia fa’atalofa lea ma sogi atu i le tama’ita’i, a o uu pea lava e Ianeta se teutusi tele lava i lona lima. “O le teutusi lenei, o loo i ai se ripoti sa tuuina mai i le falema’i a le malo, i se su’esu’ega sa faia, lea ua fa’amaonia ai, e mafua ona tutusa ituaiga toto o loo ia te oe ma a’u, e mafua mai i le tulaga lea, e tasi le Tina na o ta ola mai ai i lenei olaga, ma, i se isi faaupuga, o a’u o lou tuafafine moni lava”. Na ona uma lava o le tala lea a le tama’ita’i o Ianeta, ona ia tago atu loa lea ua fusi mai le ali’i foma’i o Lavi, ae o Lavi i le taimi lea, ua na o le tagi ma sisii i luga ona lima, a o tau fai pati pati uma atu le motu o tagata, o isi ua sisiva ma feei, ae o isi fo’i ua na o le laulaututu ma pati o latou lima i le fiafia, ina ua latou iloa, e le faigofie le tulaga sa i ai taumafaiga a le tamaitai o Ianeta e tau saili fa’amaoniga e iloa ai, o le ali’i foma’i ia Lavi, o lona tuagane moni lava lea.

Comment Here