E LE O OE O SE SULI MONI

Vaega 83

 

Ua na o le gasolo atu o matua, uo ma le auvalaaulia ma tau le latou vaai i ie tetele nei o loo faapipii i luma o le fale, ona fesili lea ma talatalanoa i le uiga o le ie o loo tusia ai le autu ma le igoa o Ianeta. E oo lava fo’i i le ulugali’i o Meki ma Lucy, sa matua faateia lava i laua ina ua la vaaia le ie ma le autu o loo tusia ai, atoa ai ma le ata o si a la tama o Ianeta o loo tusia ai. “Faamolemole lava, o le a le uiga o lenei ie ma faaupuga o loo tusia ai, atoa ai ma le ata o Ianeta o loo faapipii ai i tafatafa” o le fesili fia malamalama atu lea a le fafine o Lucy i se tasi o tamaitai faiaoga o loo tu i luma o le faitoto’a ma tufa polokalame i le au valaaulia. “Tina, o le uiga o le ie lenei, o le autu lea o se Tusi sa tusia e le tama’ita’i lenei o Ianeta, e fa’atatau i le talaaga o lona olaga, lea ua fa’amoemoe a mae’a le faauuga, ona taualuga ai loa lea o le polokalame i le tatala aloaiaina o lana Tusi, ma fa’alauiloa aloaia ai loa le tu’uina atu i totonu o Fale Tusi eseese i le malo mo le fa’atauina ai”. Na vaaia e le tama’ita’i faiaoga le tu o le fafine o Lucy ma ona foliga ua matua te’i lava, ona ia le ulufale lea i totou ae ua toe solomuli ma aga’i atu i le vaega tonu o loo fa’atautau mai ai le ie, ona ia talosaga lea i se tasi o Tina sa latalata atu i ona tafatafa, na te pu’eina atu lona ata i lana talafoni feavea’i a o tu ai i lalo o le ie. Na vaaia e le Tina sa ia pu’eina le ata le maligi o loimata o le Lucy, ona ia fesili lea i ai, “Tina, e i ai se mea o le ie lenei o faaletonu ua mafua ai ona e tagi,” na tu le fafine o Lucy mo sina taimi ona ia faapea atu lea i ai, “Vaai oe, e leai, o loo lelei mea uma i le ie, ae ona o lo’u alofa i le tama’ita’i sa ia tusiaina le autu o loo i luga o le ie lenei, o le mafua’aga lena o lo’u tagi”.

 

Ua saofafa’i le ulugali’i o Meki ma Lucy i le la nofoa ua mae’a ona tusia ai o la igoa, faatasi ai ma le numera e piki ai le la taumafataga, lea ua mae’a ona tauaao atu e le tama’ita’i o Ianeta. Ina ua maea ona momoli e Ianeta ona matua i o la nofoa, na alu ai loa ua tu mai i le isi itu o le fale, ma vaavaai i le taimi e ulufale atu ai lana malo valaaulia faapitoa, le ali’i foma’i ia Lavi. O le fa’ateia o le vaai a Lavi i le ie o loo tautau i fafo, lea o loo faapipi’i ai le ata o Ianeta ma faaupuga o loo i ai, na mafua ai ona tuai lona ulufale, ae ua ia taumafai e saili se isi na te fa’amatalaina atu le uiga o le ie lea, peita’i ua soo tagata o loo laulaututu i fafo na ia fesili i ai, e leai ma se isi na te iloa le uiga o le ie, o lea, na ia ulufale pogisa ai lava i totonu o le fale ma lona fia iloaina o le uiga o le ie lenei. Na iloa mamao mai e le tama’ita’i o Ianeta le ulufale atu o le ali’i foma’i o Lavi, ona ia savali telea’i mai loa lea i le faitoto’a e fa’afeiloa’i o ia, ma tu’u atu i ai lana fa’asolo e fa’ailoa ai le talia ma le fiafia o lona oo atu. “Susu mai lau susuga a le foma’i, ua mae’a ona faatulaga lou nofoa i le isi itu o le fale, ona o le itu lea ua faapitoa mo matua a le vasega fa’au’u, ae o le isi itu lea ua faapitoa mo malo valaaulia faapitoa”. E savali fua le alii foma’i ae ua ia naunau e fia nofo i le itu o loo i ai matua a le vasega fa’au’u.

 

O se fa’auuga na mafua filogia i loimata, ona o le maualuluga o togi ua mafai ona ausia e le vasega fa’au’u, i mataupu ma matata eseese ua mafai ona latou pasia, lea fo’i o le a aga’i atu e galulue ai ma tautua o latou aiga. O le tama’ita’i o Ianeta, o ia lea sa ia maua togi maualuluga mo le vaega a i latou o lo o ave le latou faa foma’i, ma ua fa’amoemoe a mae’a le 2 tausaga lea, ona toe aooga lea mo le isi 2 tausaga ina ia atoatoa ai mataupu mo le su’eina o le fa’ailoga faafoma’i, ma aloaia ai loa le avea o i latou ma foma’i. E lei matu loimata o le ulugali’i o Meki ma Lucy i le loto fiafia, ina ua ausia e Ianeta lenei tulaga maoa’e e fa’atatau i lona olaga tauivi. O le tagata lava na mulimuli atu i le laina mo le fa’aulaina o Ianeta e ese mai i ona matua, o le ali’i foma’i o Lavi, lea na ia musumusu atu i le tama’ita’i e fa’apea, “Malo toa, ua ou talitonu i lou loto finau”.

Comment Here