Ads by Google Ads by Google

E LE O OE O SE SULI MONI

Vaega 79

 

Na tu tu teine foma’i fa’apea ai ma ni isi o le aufaigaluega mo ni nai sekone, talu ai le fa’ateia o i latou i le tala a le latou foma’i sili lea ua tu’uina atu. “E a lau saunoaga lau susuga a le Foma’i Sili, ua e mana’o e tui lou toto e te fesoasoani ai mo Ianeta”, o le fesili atu lea a se tasi o teine tausima’i, o ia lea e galulue fa’atasi lava ma le ali’i foma’i ia Lavi mo le 6 tausaga talu ona la galulue i le falema’i tele lea a le malo i le taulaga. “Ioe, ua ou nofo ma mafaufau ua toeititi mae’a uma mai tagata o le aai e ofo mai la latou fesoasoani mo lenei tama’ita’i meauli, ae foliga mai ua siliga tali i seu se fesoasoani mo ia, o le mafua’aga lena ua ou manatu ai ua tatau ona ou tula’i e saili se auala e fesoasoani ai i lenei tama’ita’i pologa, aua o le tatou galuega tonu lena na mafua ai ona filifilia i tatou e le malo tatou te galulue i le falema’i tele lenei, e le gata o le fesoasoani e togafiti tagata mama’i, a ia tatou sailiina fo’i ni isi auala e mafai ai ona maua e i latou le fesoasoani”, o le tali atu lea a Lavi na atili ai ona talitonu lana aufaigaluega, ua matua naunau lava le ali’i foma’i e ofo atu lana fesoasoani mo le teine meauli o Ianeta.

 

E mae’a loa galuega o le aso ae tofu loa le ali’i foma’i o Lavi i totonu o le potu e tui ai toto o tagata e aga’i atu e fia fesoasoani mo tagata mama’i. “Talofa i lau susuga a le foma’i sili, e i ai se mea ou te faia mo oe”, o le fesili lea a le ali’i talavou o lo o pulea le fale tui toto i le falema’i, ae na tali le ali’i foma’i, “Ua ou sau e siaki lo’u toto pe mafai ona ou fesoasoani mo le teine meauli o Ianeta”, e lei toe gagana le ali’i pule i se upu ae ua ia fa’atonuina loa lana aufaigaluega ina ia auina atu loa le ali’i foma’i i le potu e fa’atino ai le siaki, ma ia tu’uina atu fo’i lavalava e fa’apitoa mo soo se tasi e ulufale atu i le potu tui toto, e aofia ai le tusiaina i lalo o ona fa’amaumauga, aemaise ai o fa’amatalaga uma e fa’atatau ia te ia. O le mae’a ai o le siaki a le ali’i foma’i, na ia aga’i atu ai loa i le isi potu e fa’atalitali ai le fa’aiuga o lana siaki, pe tutusa lona toto ma le toto o loo mana’omia, ma afai e tutusa, ona auina atu loa lea o is i le potu fa’apitoa e tui mai ai le paina toto. E lei umi se taimi na galulue ai le aufaigaluega ae maua le faaiuga o le suega, e tutusa lelei le ituaiga toto o loo moomia mo Ianeta ma le toto o le ali’i foma’i ia Lavi.

 

“Lau susuga a le foma’i sili, o lea ua maua mai le fa’aiuga o le suega, e tutusa lelei lou toto ma le toto o loo moomia mo le tama’ita’i meauli o loo tigaina i le falema’i”, o le tala lea a le ali’i pule o le faletoto na vaaia ai le maligi o loimata o le ali’i foma’i a o punou i lalo. E le i gagana le ali’i foma’i i se upu i le taimi lea, ae ua tula’i ma savali atu loa i le potu lea e fa’atinoina ai le vaega lona lua o le galuega, mo le tuiina lea o paina toto mo le tama’ita’i meauli ia Ianeta. E silia i le 3 itula na i ai Lavi i le falema’i i le afiafi lea, ma ua mae’a fo’i ona tu’uina atu paina toto sa mafai ona ia ofoina mai, ona ia fo’i ai loa lea i le fale ina ua leva le afiafi ma sauni ai loa e malolo. Ao lei tuua e le ali’i foma’i ia Lavi le fale, sa ia tusia se tama’i tusi puupuu mo Ianeta, ona ia tu’u lea i le ali’i faigaluega sa tuiina lona toto ma fai i ai, “a oo i le taimi e tu’uina atu ai paina toto nei i le tama’ita’i meauli o loo ia mana’omia se fesoasoani, ona tu’u fa’atasi atu ai lea ma le tusi lea fa’amolemole”.

 

Ua fo’i le le ali’i foma’i i le cale ma ua lagona fo’i lona vaivai i le tele o le toto o lona tino ua alu. E le i toe ma’imauina lava e le ali’i se isi taimi e toe ala umi ai i lea afiafi, ae na mae’a loa ona fai lana tausiga, taele loa ma fo’i i lona moega e malolo, ae o le taimi lea o lo o pisi ai lava le aufaigaluega a le falema’i i le tau togafitiina o le tulaga tigaina ua i ai le gasegase o Ianeta. Na fa’ateia le ulugali’i o Meki ma Lucy ina ua le toe taunu’u ane i le falema’i, ae logo ane e teine tausima’i le tulaga tigaina o lo o i ai si a laua tama i lea po.