Ads by Google Ads by Google

E LE O OE O SE SULI MONI

E pei ona masani ai le ali’i foma’i o Lavi i le fa’atinoina o ona tiute, soo se taimi lava e taunu’u ai se gasegase tigaina i totonu o le falema’i, e tu’uese uma lava ana galuega o lo o fai ae pisi loa i le togafitiina o le tagata fou. Na ona logoina lava o le ali’i foma’i ia Lavi e i ai le gasegase fou lea ua taunu’u atu mo togafitiga, tu’u ese uma loa ana galuega ae savali ane loa i le potu o loo taoto ai le teineititi o Ianeta ma latou fa’atasi loa ma teine tausima’i o loo i ai i le fa’agasoloina o togafitiga mo Ianeta. O le mae’a ai o ulua’i togafitiga mo Ianeta na aga’i ese atu ai loa le ali’i foma’i i ana galuega ae tu’u ai isi foma’i fa’apitoa e galulue i togafitiga masani. E le i leva ona alu ese atu Lavi mai le potu o loo tau togafitiina ai Ianeta ae taunu’u loa le ulugali’i o Meki ma Lucy ina ua logoina i laua e le aoga e fa’atatau ia Ianeta. “O le a se tulaga o i ai si a’u tama fa’amolemole”, o le nanati atu lea a le fafine o Lucy ma lona loto ua popole lava, ina ne’i toe a’afia fo’i Ianeta i le gasegase lea na a’afia muamua ai o ia. E nanati atu lava le fafine faiaoga o Lucy i lona fia iloa o le tulaga o loo i ai le gasegase a lana tama ae vaai atu lava e le o ano atu lava i ai foma’i. “Fa’amolemole lava, o le a se tulaga o loo i ai le gasegase o si a’u tama o Ianeta, o lea ma te fia iloaina poo tulaga lelei lona tino pe leai fo’i”, o le toe augani atu lea a le fafine o Lucy i le isi tama’ita’i foma’i o loo alu atu i totonu ma sau i fafo o le potu lea o loo taofia ai Ianeta.

 

“Tina, e le o mafai ona fa’amatu’uina atu ni fa’amatalaga e fa’atatau i le gasegase o si au tama, ona o lea o loo fa’agasolo togafitiga ma sailiiliiga a foma’i i le gasegase tonu lea o loo a’afia ai o ia, ae o le fautuaga a le foma’i, ia lava mai pea le onosa’i, se taimi ona toe talanoa atu lea”, e fai lava tala a le teine foma’i ma tapuni le faitoto’a, e le mafai e le fafine o Lucy ona toe tatala. Ua tau fai saputu ane nei le mau mafaufauga i loto o le ulugali’i, poo le a lenei ma’i ua toe aumai fa’atopetope ai Ianeta ae sa malosi lava o ia ma vaaia lona loto fiafia i lana aoga fou lea ua aoga ai nei. E fetaui le savali mai o le ali’i fomai o Lavi mai lona ofisa e toe aga’i atu i le potu o loo togafitia ai Ianeta, ae tau mai lana vaai i le tamaloa o Meki lea o loo saofa’i atu i le nofoa i le potu e fa’atalitali ai aiga o gasegase. “Talofa i lau susuga i le Ta’ita’i o Leoleonana a le malo”, o le fa’afeiloa’i ane lea a le ali’i foma’i o Lavi ia Meki, peita’i na vaaia e le ali’i foma’i foliga le mautonu o le tamaloa o Meki, “Talofa i lau susuga a le foma’i sili, o lea ma te nonofo atu ii e fa’atalitali ai se ripoti i le tulaga o le ma’i o lo’u afafine lea na fa’atoa aumai i ni nai itula ua mavae atu, fa’amolemole, o loo ma fia iloa poo le a tonu le gasegase na mafua ai ona aumai o ia ae poo faapei mai fo’i o ia i lenei taimi”, o le tali atu lea a Meki i le ali’i foma’i o Lavi na vave ai loa ona faia e le foma’i le fa’aiuga, ina ia onosa’i atu i fafo ae se’i alu i totonu o le potu e siaki le tulaga o Ianeta ona toe sau ai loa.

 

E lata i le itula o i ai le ali’i foma’i o Lavi i totonu o le potu, ae toe ulufafo mai loa o ia, ona ia valaau loa lea ia Meki ma lona faletua latou te aga’i atu i totonu o lona ofisa latou te talanoa ai. “Fa’amalulu atu i lau susuga ma le faletua ona o le umi o oulua fa’atali mo se tali e uiga i le lua alo, e fai lava si tuga o le gasegase o loo aafia ai Ianeta, o se manu’a na lavea ai o ia i ta’aloga, lea ua mafua ai ona piliki o ia i totonu, pau le togafiti e mafai ona matou faia, o le fai o le taotoga ae mana’omia ni paina toto e fesoasoani ai i lona tino pe a mae’a le taotoga, ae o le ituaiga toto lea e i ai lona toto, ae sili pe a oulua aga’i atu loa i le fale e saili ni a oulua uo e mafai ona fesoasoani mai, e o mai e siaki a latou toto pe tutusa ma le toto o laneta, ina ia mafai ai ona maua se fesoasoani mo ia, ae ua i ai le fuafuaga o le isi itula o loo lumana’i nei e amata ai loa lona taotoga”.