E LE O OE O SE SULI MONI

E vaiaso atoa o auaua’i mai tagata o uo ma aiga a le ulugali’i o Meki ma Lucy, peita’i e leai lava ma se isi e fetaui le ituaiga o lona toto ma le toto o le tama’ita’i o Ianeta. Ua mae’a fo’i le taotoga ma ua foliga manuia le teineititi, ae o le fautuaga a le ali’i foma’i o Lavi sa fa’auluulu i ai le vaega o foma’i sa faia le taotoga, e mana’omia nisi paina toto e fesoasoani ai i le fa’amalosia atili o le tino o Ianeta, ona o le tulaga tuga o lona gasegase. O lea ua siliga tali i seu se fesoasoani e maua mai i tagata o aiga o le ulugali’i o Meki ma Lucy, ma manatu ai loa le pulega a le falema’i, o le a fai se fa’asalalauga i luga o televise ma nusipepa e pei ona masani ai i latou i soo se taimi e tula’i mai ai se manaoga mo le fia maua lea o ni paina toto e fesoasoani ai i nisi o loo faia a latou taotoga i le falema’i, ina ia mafai ai e le atunu’u atoa ona fesoasoani atu i le manaoga. O se ali’i meauli e faiaoga i se tasi o aoga i le isi aai e fai si mamao mai le taulaga, sa ia mauaina le faasalalauga i luga o le televise i se tasi o po, e fa’atatau i se tama’ita’i meauli o lo o fia maua se fesoasoani i le toto, o lea na ia manatu ai loa e asiasi ane i le falema’i ma lona to’alua ma lana fanau teine matutua e to’alua, atonu e maua ai i se tasi o i latou se fesoasoani. “O le tulaga lea ua maitauina, e leai se isi o outou e tutusa le ituaiga o lona toto ma le toto o le tama’ita’i o Ianeta, sei vagana ai lau susuga a le faiaoga, toeititi lava tutusa lelei ituaiga o oulua toto ma Ianeta, ae o lau fanau e tau latalata ane lava i ai”, o le fa’amatalaga lea a le ali’i foma’i o Lavi sa fai atu i le ulugali’i ma le la fanau, ma vaaia ai i foliga o le ali’i faiaoga le fa’anoanoa, ona sa ia naunau lava e fia fesoasoani i lenei tama’ita’i meaauli o loo taofia i le falema’i.

 

“Se fa’amolemole lava lau susuga a le ali’i foma’i, pe mafai ona ou fesili atu i lo’u fia malamalama i isi tagata ua mae’a ona siaki a latou toto”, o le fesili atu lea a le ali’i faiaoga ia Lavi na talia fiafia e le ali’i foma’i ma fa’apea atu i ai, “Soo se mea e te fia malamalama i ai e mafai lava ona ou fa’asoa atu mo oe”, o le toe tali atu lea a le ali’i foma’i ia Lavi, ona fesili loa lea o le ali’i faiaoga lenei, pe fa’apefea tagata uma ia na malaga ane e tui a latou toto, poo a ituaiga tagata, poo ni tagata papa’e poo ni tagata uli fo’i, ae poo ai ni tagata na tau lalata ituaiga o latou toto ma le toto o le tama’it’ai o Ianeta. Na luelue le ulu o le ali’i foma’i ia Lavi i le taua o le fesili, ma ia tu’u muli ese atu ai loa i lona Ofisa e tau saili mai fa’amaumauga e uiga i le fesili a le ali’i faiaoga, ae ua aga’i ese atu fo’i le ali’i faiaoga ma lona aiga mo le fa’atinoina o faiva ma tiute masani o le aso, ae o le aoauli o le aso lava lea, na tago ai loa le ali’i foma’i o Lavi i le telefoni ma vili le ali’i faiaoga meauli lenei ma fa’ailoa i ai, “E te silafia lau susuga i le faiaoga, mai le silia i le to’a 100 o tagata na aga’i mai e siaki o latou toto, e na o tagata meauli lava e tusa ma le to’a 20 ua maitauina, e latalata lava o latou toto i le ituaiga toto lea e mana’omia mo Ianeta, se’i vagana ai lava lau susuga ma lau fanau e matua vava lalata lava ituaiga o outou toto ma le toto o le tama’ita’i o Ianeta, ae o tagata papa’e uma na ofo mai o latou tino e siaki, e matua vava mamao lava”, o le talanoa atu lea a le ali’i foma’i o Lavi i le ali’i faiaoga na toe fa’apea atu ai loa ma le isi ana fesili, “E i ai se mea taua lau susuga a le faiaoga ua mafua ai ona e mana’omia nei fa’amaumauga”, ae a tali le ali’i faiaoga. “E foliga mai i la’u fa’alogologo atu, pau ituaiga tagata e tatau ona saili i ai se fesoasoani mo le tama’ita’i mafatia, e na o tagata uli, o i latou ia o lo o matua sili ona latalata ituaiga o latou toto i le toto o Ianeta, lona uiga fo’i, ua tatau ona fesootai i matua o lena tama’ita’i ina ia aga’i atu e saili fesoasoani i le nofoaga o tagata uli, ae o la’u fesili mo lau susuga a le foma’i ma lo’u loto fa’aaloalo, talu ai o taua o tagata uli, fa’amata e le mafai ona siaki fo’i le ituaiga o lou toto pe le maua i ai se fesoasoani mo le tama’ita’i o Ianeta”.

Comment Here