Ads by Google Ads by Google

E LE O OE O SE SULI MONI

Vaega 74

 

Na umi se taimi o matamata le ali’i foma’i o Lavi i ata o le fafine meauli ma le tamaititi o lo o tu i ona tafatafa, ona ia tago lea ua teu le ata lea i totonu o lana ato, ae tuu uma faila i luga o lana laulau, ma ia ulufafo loa mai lona ofisa ae fo’i atu i lona aiga. Na ona taunu’u lava o le ali’i foma’i o Lavi i lona fale, fa’asasa’o loa i lona moega ma malolo loa ona ua alu le aso o pisi i galuega masani i totonu o le falema’i, peita’i ao moe le ali’i o Lavi, sa pei o se ata fa’asolo i lona mafaufau le ata o le fafine meauli ma le tamaititi o loo tu i ona tafatafa, ma ua avea ai o se mea e le toe galo i lona mafaufau. E usu lava le ali’i foma’i i lana galuega i le taeao na sosoo ai ae o loo fa’asoesa atu pea mafaufauga ia i lona loto, ma e foliga mai o loo i ai se feau o loo taumafai le ata e ta’u atu ia te ia. O le aoauli o le aso lea ina ua malolo Lavi mai galuega masani o le aso, sa fa’asolosolo ai loa lana vaai i luga o le itulau lea e fesootai ai uo ma aiga, le Facebook, ae tau ai lana vaai i ona ata sa pu’e i aso a’o laititi, ma fa’afuase’i ai ona toe fafagu mai i lona mafaufau le ata o le tamaititi lea o loo tu i tafatafa o le fafine meauli lea o loo autu i ai su’esu’ega a Leoleonana, ma tago atu ai loa le ali’i ua aumai le ata o le fafine meauli o loo i totonu o lana ato, ma fa’atusatusa i nis o ona ata sa pu’eina i aso ao laititi, ma o se vaaiga na fa’ateia ai le ali’i foma’i o Lavi, ona e leai se eseesega o foliga o le ali’i laititi lea o loo tu i tafatafa o le fafine meauli ma ni isi o ona ata sa pu’eina i aso ao laititi, ma ua avea lea tulaga ma itu ua ese ai lagona o le ali’i foma’i ua tupu a’e i lona loto, ma ia naunau ai loa e saili uma isi fa’amaumauga e fa’atatau i le fafine meauli lea na maliu i le falema’i, ina ia mafai ai ona tali nisi o fesili ua tau fai fetuleni mai i lona mafaufau.

 

O le feiloaiga lona lua a le ali’i fomai ia Lavi ma ali’i Leoleonana e to’alua i le aso na sosoo ai, na mafua fa’afiafiaina ai ali’i Leoleonana ina ua taunu’u atu, ae ua leva ona sauni mai le ali’i foma’i ma ripoti uma o loo laua mana’omia. O le masina muamua lava o le suesuega tele a Meki ma lana vaega faapitoa, na manino ai i fa’amaumauga ua latou maua, o le tele o sauaga sa faia fa’asaga i le fafine meaauli, atoa ai ma le le lelei o le tausiga o lona ma’itaga na mafua ai ona maliu o ia i le falema’i. E 12 tausaga le matua o le tama muamua a le fafine meauli ae fanau loa lana tama teine lea na fanau ma maliu ai lava le fafine i le aso na sosoo ai. O faamatalaga ua maua e Meki lana vaega, e eseese uma lava nofoaga na ave i ai e le ulugali’i o Pulusi ma Mekala le fanau a le fafine meauli, ae o le aso na sosoo ma le aso na fanau ai le pepe lona lua a le fafine meauli, na toe aami ai e le ulugali’i o Pulusi ma Mekala le ulugali’i sa foa’i i ai le tama matua a le fafine se’i feiloa’i atu i ai le fafine, aua ua iloa lelei lava e le ulugali’i o Pulusi ma Mekala, e i ai le mea e tupu i le fafine pe oo i le taimi e fanau ai o ia, ona ua la iloaina lelei lava faiga pologa atoa ai ma taumafaiga ina ia fasiotia o ia.

 

E pisi Meki ma lana vaega i le latou suesuega o loo faagasolo, ae o le taimi lea ua mae’a ai ona lesitala le teineititi o Ianeta i le aoga lea ua ave i ai o ia e ona matua fou o Meki ma Lucy e aoga ai, o se aoga e fefiloi ai tamaiti aoga ma ituaiga eseese e pei o papalagi, meauli fa’apea ai tagata eena ma fanau mai atunu’u Asia, ma o le masina muamua na ulufale ai Ianeta i le aoga, na filifilia ai o ia e avea ma sui o le au ta’aalo volipolo i le vaega o tama’ita’i, ona o se tama’ita’i e tele taleni eseese o loo i ai, ae o ia fo’i o se teineititi e tulaga ese lona atamai i mataupu e fa’atatau i su’esu’ega lautele. O se tasi o aso ao faagasolo ta’amilosaga o ta’aloga a aoga i totonu o le aai, lea fo’i sa auai ma Ianeta, na fa’afuase’i ai ona manu’a Ianeta i se manu’aga tuga, ma fa’anatinati atu ai loa o ia i le falema’i mo togafitiga, e taunu’u atu le tino manu’a o Ianeta ae o loo tiute le ali’i foma’i ia Lavi i le taimi lea.