Ads by Google Ads by Google

E LE O OE O SE SULI MONI

Vaega 36

 

O le taimi lava na ta’ita’i atu ai i le vaega e fa’ataunu’u ai fa’asalaga le tamaloa o Meki mo le fa’ataunu’uina ai o lana fa’asalaga, na tepa atu ai le Tupu o Eteuati II i le itu sa nofo mai ai le teineititi pologa o Ianeta ua leai se isi, ona autilo solo lea o le Tupu i isi tulimanu o le malae pe na te iloaina atu ai le teineititi, peita’i ua faigata ona ia iloaina atu o ia ona o le tumu o tagata o loo feoa’i solo i itu eseese o le malo i le fa’amanatuina o le aso fa’apitoa mo tagata pologa. Ua vaaia e le motu o tagata le savali atu o le fitafita mo le fa’ataunu’uina o le fa’asalaga a Meki, ona tu lea i luma o le vaega tonu lea o loo tu ai Meki ma lona ua lea ua uma ona nonoa ai le maea. E pei ona masani ai i soo se taimi e fa’ataunu’u ai fa’asalaga o pagota, se’iloga lava e sisi atu le fu’a uliuli e le fitafita o loo tu i luma o le nofoa o le Tupu, ona fa’atoa fa’ataunu’uina loa lea o le fa’asalaga, ona o le fa’ailoga lea e ta’u atu ai i le fa’aoosala, ua tu’uina atu e le Tupu le fa’atanaga e fasiotia ai se tagata o le malo.

 

Ua fa’atali le fitafita fa’aoosala i le taimi e sisi ai i luga le fu’a uliuli a le fitafita o loo tu i luma o le nofoa o le Tupu, peita’i o le Tupu o Eteuati II i le taimi lea, o loo tau autilo solo poo fea ua nimo i ai le teineititi pologa o Ianeta lea sa nofo mai i le isi itu o le maota. “Lau afioga e i le Tupu, o loo fa’atali le fitafita mo le fa’ataunu’uina o le sala, pe i ai se mea o loo e finagalo i ai”, o le fesili atu lea a le fitafita o loo tu i luma o le nofoa o le Tupu i le Tupu, ae na tali le Tupu, “Ia saili muamua mai le teineititi pologa o Ianeta ia te a’u, o lea ua ou le vaaia o ia mai luga o le nofoa sa nofo mai ai”, o le taimi lava na saunoa atu ai le Tupu i le fitafita, na sisi ai loa e le auauna le fu’a lanu mumu e fa’ailoa atu ai i le fa’ao’osala, e taofi le fa’atinoina o le fa’asalaga. O le vaaia e le motu o tagata o loo laulaututu solo i le malae o le fu’a mumu lea ua sisi i luga, na fa’alogoina ai le gugulu o le motu o tagata ma tu’u fesili solo pe aisea ua sisi ai le fu’a mumu ae le sisi le fu’a uliuli e fa’ailoa mai ai le fa’ataunu’uina loa o le fa’asalaga.

 

Ao gugulu le motu o tagata ae fa’afuase’i loa ona vaaia le tamo’e atu o le teineititi pologa o Ianeta i luga o le vaega o loo tu’u mai ai le tamaloa mo Meki, ma fa’apau fao i lalo tonu o le vaega ua fuafua e sisi ai le ua o le tamaloa ma augani atu i le fitafita ina ia alofa fa’aola Meki ae avatu o ia e fasioti e sui ai le tamaloa o Meki. Ua leai se isi e toe gagana i le taimi lea ae ua tau fai sao uma tagata ina ua latou vaaia le Tupu o Eteuati II ua tula’i mai lona nofoa ma savali atu i le vaega o loo fa’ataunu’u ai fa’asalaga o pagota, ina ua ia vaaia le teineititi o Ianeta lea ua tamo’e atu i le vaega lea. E fetaui le taunu’u o le Tupu i le vaega tonu ua sauni e fa’ataunu’u ai le fa’asalaga o Meki ae taia loa lana fa’alogo i le si’uleo o le augani a Ianeta ma tagi punou, “Lau afioga a le Tupu Eteuati II, fa’amolemole lava, pe mafai ona fa’asao le ola o lenei tagata, ae ua ou malie e ofo atu lo’u ola ina ia fasiotia e sui ai Meki”. Na tu le tamaloa saua o Eteuati II ma fa’atau pupula atu i le tootuli punou mai o le teineititi o Ianeta, ona ia fa’apea atu lea i ai i lona leo pau ma le leotele, “Ianeta, aisea ua e faia ai lenei mea ia te a’u ma lo’u malo. Sa ou tu’u atu le avanoa ia te oe e te ola fiafia ai i totonu o lo’u malo, ae aumai lenei tagata solitulafono ma le le anaana i le Tupu e fasiotia, ao lenei ua e fa’alavelave i le finagalo autasi o le Tupu”, o le saunoaga lea a le Tupu, ma ia fa’atonuina ai loa auauna ina ia toe ave Meki e taofia i le nofoaga sa i ai, a ia tu’uina atu loa le teineiteiti o Ianeta i le nofoaga o loo i ai tagata pologa uma i totonu o le malo.