Ads by Google Ads by Google

E LE O OE O SE SULI MONI

VAEGA 35

 

Na pei e pe le fatu o le teineititi pologa o Ianeta ina ua manino i lana vaai o Meki lea ua ta’ita’i atu i le vaega e fa’ataunu’u ai le fa’asalaga, ae o le taimi lea ua tau le lagona se leo i le pisapisao o tagata uli o loo sisiva ma alalaga mai i le isi itu o le malae, atoa ai ma le fa’aili o loo fa’afiafia i le vaega tonu o loo nonofo atu ai le Tupu o le malo ma ana tagata valaaulia fa’apitoa. E lei iloa e le teineititi o Ianeta, o le aso lea ua faia tonu ai le vili, o le aso fa’amanatu lea mo tagata pologa uma i totonu o le malo, o le mafua’aga fo’i lena o le tumu atu o tagata i totonu o le malae i lea aso, ona o lea ua sauni e matamata i fa’afiafiaga mai tagata uli o loo avea ma pologa i totonu o le malo, ae o le aso fo’i lea e lau ai fa’asalaga o paota ua mae’a ona fa’asala i le oti, i latou e sili atu ona matuia a latou solitulafono sa faia i totonu o le malo.

 

E tu fua le teineititi o Ianeta i le vaega lea o loo tu ai, ae ua matua popole lava lona loto ina ne’i vave ona fa’ataunu’u e le fitafita le fa’asalaga mo Meki a’o lea e le’i maua sona avanoa e toe talanoa ai i le tupu o le malo, le ali’i o Eteuati II. Na vaaia e Ianeta le aga’i mai o le au fa’afiafia to’atele lava a tagata pologa i luga o le malae, ma amata loa a latou fa’afiafiaga, ma ua vaaia ai le fiafia o tagata o loo matamata e aofia le Tupu ma isi ta’ita’i o le malo, ina ua latou molimauina gaioiga malie a tagata pologa e ala i a latou fa’afiafiaga o loo faia nei. O le taimi o le taumafataga na fa’alauiloa mai ai loa e le ali’i fitafita o loo ta’ita’i i le polokalame, le ali’i pagota lea ua fa’atulaga e fa’ataunu’u lona fa’asalaga i le aso lea, o le ali’i lea sa ia faia se gaioiga e fa’alumaina ai le Tupu ma lana faigamalo, ina ua ia fa’ataga ni tagata fa’atupu fa’alavelave e ulufale atu i totonu o le malo i le 10 tausaga talu ai, ma o le aso lenei sa tu’upoina e faataunuu aloaia ai lana fa’asalaga o le oti. “O le isi pagota o le a fa’ataunu’uina lona fa’asalaga o le oti i le aso, o le ta’ita’i lea o se vaega fa’apitoa sa latou taumafai e ulufale fa’amalosi mai i totonu o le malo ma le fa’amoemoe e ave fa’agaoi se tama’ita’i sa aumai fa’apologa iinei, ae na maua o ia ma lana vaega e ni isi o fitafita o le malo, ma pu’e fa’apagota ai loa o ia ma lana vaega, peita’i o lea ua mae’a ona faia le vili e saili ai le tagata e tatau ona amoina le fa’asalaga, ma ua maua ai le fa’aiuga, o ia lenei o le a amoina le fa’asalaga, ae o ia fo’i o le ta’ita’i o le vaega”.

 

Na ona mae’a lava o le fa’asilasilaga a le fitafita, ona toe amata loa fo’i lea o fa’afiafiaga a tagata pologa ma le fa’amoemoe, o le itula e 5:00 i le afiafi lea ua fa’amoemoe e fa’ataunu’u aloaia ai loa fa’asalaga o ali’i pagota e to’alua lea ua ma’ea ona fa’alauiloa o la suafa i luma o le malo atoa. Ua fiu le teineititi pologa o Ianeta e toe tau saili sona avanoa i luma o le Tupu i le aso lea ua le toe maua lava, ona o lea ua i ai nei le Tupu fa’atasi ma tagata maualuluga o le malo i lo latou nofoaga masani, ma ua pisi fo’i le malo atoa i le fa’amanatuina o le aso faapitoa mo tagata pologa o le malo. E toe 10 loa minute ta le itula e 5:00 i le afiafi, ae vaaia loa e le teineititi o Ianeta le savali mai o se ali’i fitafita ma tatala mai le ali’i pagota lea ua sauni e fa’amuamua lona fa’asalaga, ona ta’ita’i atu loa lea i le vaega e fa’ataunu’u ai le fa’asalaga, le vaega lea e sisi ai uo o pagota uma e le usita’i i le malo. Ua vaaia le nonoa o le mae’a i le ua o le ali’i pagota ma suani loa fo’i le fitafita e fa’ataunu’u le fa’asalaga, ae o le fo’i lea ua le toe i ai se leo e gase poo se tagata e pisa. Na ona ta tonu lava o le itula e 5:00 i le afiafi o le aso lea ae toso loa e le fitafita le mae’a ma vaaia ai le tautau mai o le fitafita muamua i luga o le vaega e fa’ataunu’u ai lona fa’asalaga, i ni nai minute mulimuli ane ai na vaaia ai loa le maliu o ia, ona aga’i atu fo’i lea o fitafita ua ave i tua le pagota ua maliu ae avatu i ai le ali’i pagota o Meki mo le fa’ataunu’uina o lana fa’asalaga.