E LE O OE O SE SULI MONI

Vaega 66

 

“ .. e leai fo’i se aoga ou te ola ai pea i lenei olaga pe afai ou te le toe vaaia foliga agalelei ma le loto alofa o lenei foma’i ia te a’u, ae sa sili ai ona ou oti i le tele o fa’afitauli na oo ia te a’u nai lo lo’u inu i lenei ipu oona”. Na pei o se maliu lea o loo fai i totonu o le potu o loo mapu i ai Meki ma lona aiga, ina ua vaaia e le uluali’i fa’apea ai le auauna ma le ali’i meauli pologa foliga fa’anoanoa o le teineititi pologa o Ianeta. E oo lava fo’i i le fafine faiaoga o Lucy ua vaaia fo’i lona loto mafatia ina ua maua mai le ripoti e fa’atatau i le tulaga pagatia ua i ai le tama’ita’i foma’i sa ia tausia lelei Ianeta. “Vaai oe Ianeta si a’u tama, ua ou lagonaina lagona mafatia ua e oo i ai i lenei aso, ou te iloa fo’i e le mafai e se tasi ona toe liliu le taimi ma le fa’alavelave na tula’i mai, lea ua mafua ai ona tula’i mai le fa’alavelave i le tama’ita’i foma’i sa ia agalelei ma tausi ia te oe, e pei lava oe o sana tama, ae atonu e i ai fo’i mafua’aga e ala ai ona tutupu mea fa’apenei. Sa taumafai malosi si ou Tama o Meki ma ana auauna latou te tete’e atu i fitafita a le tupu saua o Eteuati II, na aga’i fa’amalosi mai ma taumafai e osofa’i le falema’i ona o le naunau lava e fasioti ia te oe, peita’i, o lea ua fa’asaoina lou ola ae ua avea ma itu ua manu’a ai le Samaria Agalelei sa ia faia mea lelei uma mo oe. Ia e lototele ma toa lou loto, ae o lo’u manatu, ua tatau ona tatou aga’i ese ma lenei nofoaga, ina ne’i toe maua mai lava i tatou e fitafita a le tupu saua, ona o lea tatou te i ai pea lava i eleele o le aai o tagata pologa, ona tula’i mai ai loa lea o sei si tulaga e sili atu ona pagatia tatou te le fia vaai atu i ai”, o le fa’amalosiga umi lea a le fafine faiaoga o Lucy i le teineititi o Ianeta, ma ia tago atu ua fusi mai le teineititi ma fa’alagolago i lona fatafata.

 

E lei umi ae vaaia loa e le aiga le toe matala mai o le faitoto’a o le potu o loo latou fa’atali ai, ma latou vaaia ai se ali’i foma’i meauli ma ona foliga fiafia ua fa’aali atu i le aiga. “Talofa Meki ma lou aiga, malo lava le onosa’i i lenei taimi o le aso”, o le fa’atalofa ane lea a le ali’i foma’i talavou lenei i le aiga o Meki, ma sa fa’apea fo’i ona tali fiafia atu i ai le aiga, se’i vagana ai lava le teineititi pologa o Ianeta o loo vaaia pea lava ona foliga fa’anoanoa. “Vaai oe Meki ma lou aiga, ou te iloa o loo outou nonofo fa’atasli mo se ripoti i le tulaga o le fa’alavelave e pei ona a’afia ai le tama’ita’i foma’i sa galue i le isi lala o le falema’i lenei, ae mo lo outou silafia, ua siliga taliiseu lava se togafiti mo ia, ona o le tulaga tuga o le manu’a sa a’afia ai lona tino, ua mafua ai ona maliu o ia i ni nai minute e le i mamao atu, ae ua tatau nei loa ona outou sauni e toe aga’i ese atu ma le nofoaga lenei, ona o lea ua logo mai e le taitai o le falema’i lea sa outou i ai, o le la fa’atoa o ese mai lava ta’avale a fitafita a le tupu saua o Eteuati II e tuliloa mai ia te outou”. Na ona mae’a mai lava o le tala lea a le ali’i foma’i, tago loa i le teutusi o loo afisi i lona lima ma tu’u atu i le teineititi o Ianeta ma fai atu i ai, “O le teutusi lea sa tu’uina mai e le tama’ita’i foma’i ia te a’u ma lana fa’aupuga, ia ou tu’uina atu ia te oe”, e fa’afetai atu lava Ianeta ma aapa atu lona lima ua aumai le teutusi ona latou aga’i ese atu loa lea ma le falema’i ma tulioso i le latou ta’avale, ma fa’anatinati ese atu loa ma le aai ona o lea ua tuliloa mai i latou e fitafita a le tupu saua o Eteuati II. O se faigamalaga mata’utia lea ua aga’i atu i ai le tamaloa o Meki ma lona aiga, ona o lea ua matua popole lava lona loto ina ne’i maua mai i latou e fitafita ona tula’i mai ai loa lea o se tulaga faigata i le aiga. Manatua fo’i o le po lea o lo o aga’i atu ai le solaaga a Meki ma lona aiga, ae fetaui le tafa ane o ata o le taeao ae taunu’u loa le sola’aga i luma tonu lava o le pa o le fale lea na nofo muamua ai le teineititi o Ianeta, le fale o loo nonofo ai le fafine saua o Mekala ma lona to’alua o Pulusi.

Comment Here