Ads by Google Ads by Google

E LE O OE O SE SULI MONI

Vaega 65

 

Na tau ese lagona a Meki ma lana au malaga ina ua latou taunu’u atu i le nofoaga o lo o i ai le falema’i tele i le taulaga, ae latou vaaia ai le to’afilemu o mea uma, e leai ni tagata o pisi pe vevesi i ni ma’i tigaina, e leai fo’i se fa’ailoga o lo o i ai ni ma’i tigaina i totonu o le falema’i. Na aga’i atu le solo to’atele a Meki ma lana au malaga, lea o lo o ta’ita’i atu e le teineititi pologa o Ianeta ma latou fa’aputuputu fa’atasi i tafatafa o le faitoto’a e ulufale ai i totonu, ona savali ane loa lea o se tama’ita’i tausima’i sa tiute ai i le potu pito lava i luma ma fesiligia le au malaga pe mana’omia se fesoasoani. “Se fa’amolemole lava, sa matou o mai e saili mai le gasegase o le tama’ita’i foma’i lea na aumai i se tasi o falema’i fa’aitumalo, lea na manu’a i se fa’alavelave na tula’i mai i le nofoaga o lo o i ai lea falema’i, ma ua matou maua tala, o le falema’i tele lenei o lo o fa’anatinati mai ai o ia mo se fesoasoani”, o le fa’amatalaga umi lea a le tamaloa o Meki lea ua fai nei ma sooupu o le au malaga. Na savali le teine tausima’i i tua e saili ni fa’amatalaga e fa’atatau i le gasegase lea o lo o saili e le au malaga lea, ae maua mai le tala, o le vaega o lo o i ai gasegase tigaina ua le toe aoga i ai se togafiti, o iina lea ua avatu i ai le foma’i o lo o tau saili e i latou nei.

 

“Faamalulu atu, o le foma’i o loo outou tau sailiina nei, ua auina atu nei o ia i le isi vaega o le falema’i, le vaega e taofia ai gasegase tigaina ua le toe aoga i ai se togafiti, e le fa’atagaina fo’i ni asiga i le vaega lea o le falema’i”, o le tala lea a le teine tausima’i na vaaia ai le fa’ateia o le teineititi o Ianeta ma ia fa’apea atu, “E a lau fa’amatalaga, lona uiga ua le toe aoga se togafiti i la’u foma’i”, ae na tali le teine tausima’i, “Malie oe tama’ita’i, ae o le fa’amatalaga lena sa tu’uina mai e le tama’ita’i foma’i pule”. E fai lava tala a le teine tausima’i ma faliu ma toe savali aga’i totonu o le potu o lo o galue ai, ae ua na o le laulaututu o Meki ma lana au malaga ma tilotilo le isi i le tasi, e foliga mai ua le iloa le isi la’asaga o le a fai. Na vaaia e le ulugali’i o Meki ma Lucy foliga le mautonu o le teineititi pologa o Ianeta, ma ua foliga mai ua alu tele lona mafaufau i lana foma’i lea na manu’a i le pulu fana. “Ianeta, aua e te popole, sei tatou koma teisi ane iinei ona tatou toe saili loa lea o le vaega tonu o le falema’i o lo o taofia ai lau foma’i, e le mafai ona tatou malolo se’i vagana ua tatou maua o ia”, o le fa’amalosi atu lea a le tamaloa o Meki i le teineititi o Ianeta, ae o Ianeta i le taimi lea, ua ta’u mai lava i ona foliga lona popole tele i le saogalemu o lana foma’i, aemaise ai le fa’amatalaga e le teine tausima’i lea na fa’ailoa ane ia te i liatou, o lana foma’i lea ua auina atu i le potu e taofia ai gasegase ua le toe aoga i ai se togafiti. “Vaai oulua nai o’u matua, ou te fa’afetai atu i lo outou alolofa ia te a’u atoa ai ma le lua saili o auala e fa’asao mai ai lo’u ola, ae ua mafua ona ou naunau ia toe maua le malosi o lenei tama’ita’i foma’i, ona o ia lea na mafua ai ona ou toe maua le ola, e ala i togafitiga sa ia ofoina mai mo a’u, ao fa’atali ai taumafaiga e saili mai le vai mai totonu o le nofoaga o tagata pologa ou te ola ai. Ua ou iloa, ua na o a’u lava o se teineititi meauli pologa, e le o a’u o se suli i le lua aiga poo se isi lava aiga o lenei olaga, o lo’u lava olaga o le ala mai i le pologa toe moe i le pologa, ae ua avea lo oulua agalelei ua mafua ai ona taua a’u o la oulua tama, ae fa’amolemole, ou te fia vaai atu lava i foliga o le foma’i agalelei sa ia tausia fa’amaoni a’u”.