Veaga 61

Na ona tu lava o le ta’avale a fitafita o le malo o le tamaloa saua o Eteuati i luma o le falema’i, ae vaaia ai loa e le fafine o Lucy ma le auauna le oso atu i fafo o le tamaloa o Meki ma se fagu o loo uu i lona lima, ona ia savali sa’o atu loa le ma feiloa’i i lona to’alua ua tele masina o la valavala. “O a mai Ianeta si o’u afafine pele”, o le fesili muamua lava lea a le tamaloa o Meki, ae o le fafine o Lucy i le taimi lea, ua leai se mea e gata ai lona fiafia ina ua ia toe vaaia foliga o si ona to’alua. “Honey, o lo o taoto si ou afafine i luga o le moega, o loo faatalitali atu pea i le taimi e maua mai ai le vai e togafiti ai lona ma’i”, o le tali fiafia atu lea a le fafine faiaoga o Lucy ma lona mautinoa, o le fagu o lo o u’u e lona to’alua o le vai lea e togafiti ai le ma’i o si ana tama ua tele aso o tigaina ai. “A o le a lena fagu e u’u i lou lima”, o le fesili fia iloa atu lea a le fafine faiaoga o Lucy, ae na tali le tamaloa o Meki, “O le vai lea e togafiti ai le gasegase o si o’u afafine”, na ona uma atu lava o le tala a le tamaloa o Meki, ae oso atu loa ma lona to’alua ua aveese mai le fagu mai lona lima ma savali fa’anatinati atu loa i totonu o le ofisa o le foma’i ma tu’u atu i ai le fagu. “O le vai lea na maua mai i le malo o tagata pologa e togafiti ai le ma’i o si a’u tama”, o le talanoa fiafia atu lea a le fafine faiaoga o Lucy i le foma’i a Ianeta, peita’i na vaaia e le fafine le ese o foliga o le foma’i.

“Se fa’amolemole pe i ai se mea ua tupu ua mafua ai ona e mata fa’anoanoa i lenei aso, a o lea ua maua mai le vai e togafiti ai le ma’i o si a’u tama”, o le toe fesili atu lea a le fafine faiaoga o Lucy, ae na tali le tama’ita’i foma’i, “Vaai oe Lucy, ua leva ona ou fia talanoa atu ia te oe i le tulaga pagatia ua i ai le ma’i o Ianeta, ae sa ou popole ina ne’i avea ma itu e fa’avaivai ai lou loto ao tau saili ai se vai e foia ai lona gasegase, o le tulaga ua i ai le gasegase o Ianeta, ua le toe fo’i i se lelei, ua le toe aoga ai fo’i se togafiti mo ia, pau le tulaga lea ua oo i ai, o le fa’atalitali i le taimi e i’u ai lona soifua”, o le fa’amatalaga lea a le foma’i na matua fa’ateia ai le fafine o Lucy, ma ia savali fa’anatinati atu ai loa i totonu o le potu o loo taoto ai Ianeta, ma o se tulaga na fa’ateia ai o ia, ina ua taunuu atu i totonu o le potu ma ia vaaia ai foliga o Ianeta, o foliga lava ua le toe i ai se fa’amoemoe. “Ianeta si a’u tama, nofo mai i luga, o lea ua fo’i mai lou Tama ma le vai e togafiti ai lou gasegase, se fa’amolemole nofo mai i luga”. Na avea le faataitaioi o le fafine o Lucy i luga o le moega o Ianeta ma itu na lagona mai ai e le tamaloa o Meki ma le ali’i meauli o loo la faatali mai i fafo, ma alu atu ai loa le la tuli i totonu o le falema’i, peita’i na faateia i laua ina ua tatala atu le faitoto’a ae tau le la vaai i se vaaiga uiga ese e le fia vaai i ai, o le fafine o Lucy o loo taoto i luga o le moega o Ianeta ma fa’ataitaio.

Na ese laguna o le tamaloa o Meki i lea taimi, ua le mau gagana o ia, ua le iloa foi se gaioiga se faia. O lea na ia savali atu ai ma popo le tauau o lona to’alua ma musumusu atu i ai, “Suga Lucy, o le a le mea ua tupu, alu ese ae se’i fa’ainu le vai a le teine ua tatau ona fa’ainu ua leva ona tigaina i lona ma’i”, e fai atu lava tala a le tamaloa o Meki ma tago atu ua aveese mai lona to’alua ae ua ia taumafai e fa’ainu le vai i le gutu o si ona fafine, peita’i o taimi uma lava e fa’ainu atu ai e toe pua’i mai ai i fafo le vai atoa, ma ua lava lea vaaiga e ta’u mai ai ua le o i ai se isi faamoemoega mo Ianeta. A o taumafai Meki ma lona to’alua e tau fai se gaioiga e fesoasoani ai i le teineititi meauli pologa o Ianeta, ae fa’afuase’i loa ona taunu’u ane i ai ma le ali’i pologa lea na sosoloa fa’atasi mai ma Meki atoa ai ma le foma’i i totonu o le potu, ma la vaaia ai le tulaga pagatia o lo o feagai ma lenei aiga.