Vaega 60

E aso atoa ma le po e tasi na asa ai e Meki ma le ali’i pologa meauli lo la auala i totonu o le vaomatua ae o la taunu’u loa i le vaega muamua lava o le alatele a le malo, peita’i o le isi fa’afitauli lea ua la fetaia’i nei, o luma atu o le isi pioga o le auala tele a le malo o lo o paka mai ai le isi Sipi a fitafita a le Tupu saua o le malo, ma e to’a 3 fitafita o loo tutu mai ai ma a latou fana, e foliga mai o loo leoleo le vaega lea o le vaomatua pe la te tuliosoa tu ai. E leai lava ni upu na toe tautala i ai le ali’i meauli pologa lenei, ae sa ia tago atu i lana aufana o loo fafa i lona papataua ma to mai, ona tu’u lea i ai o fulu a u e 2 ma meme’i loa, ma e lei misi lava ma fatafata o ali’i fitafita e to’alua sa tutu i le pito i tua o le Sipi ma pauu ai i lalo. O le taimi lava na pauu ai fitafita ia e to’alua i lalo, na pei ai o le pe’ape’a gaioiga a le isi fitafita sa totoe ai e ala i lona aapa ane i lana fana ma fa’apapa solo i luga o laau, ma ua le iloga se vaega e fa’apapa solo ai le fana a le tagata lenei, ma lona leo e le malolo i le e e leotele i luga, ana le uma lava pulu o lana fana e le uma lana gaioiga sa faia. Na tu le fitafita ma tau to lona sela ae o ona mata ua fetilofa’i solo i lalo o laau ma le isi itu o le vaomatua, pe na te iloa atu ai se tagata poo ni tagata fo’i o feoa’i ane ai.

Na fiu le fitafita e tau autilo na te le iloaina atu lava se tasi, e lei umi ae vaaia loa e le ali’i fitafita le savali atu o le ali’i pologa meauli mai le vaega o le togavao sa lafi ai, ma ta’i atu lana aufana o lo o i ai le fulu a u i totonu, ta’i sa’o atu lava i lona muaulu, ae o le fitafita i le taimi nei, ua amata ona gatete i le fefe ma ua foliga mai ua leai fo’i sona fa’amoemoega o totoe, ina ua ia vaaia le savali atu o le tagata pologa lenei ia te ia. “Fa’amolemole tu’u mai se avanoa ou te ola ai”, o le augani ane lea a le fitafita i le ali’i pologa ma ia tago ua fa’apalasi i lalo lana fana o loo u’u, ua leai uma fo’i ni pulu i totonu, ae o le ali’i pologa meauli i le taimi lea, ua na o le ata e e i luga ma fa’apea atu ana upu, “Aisea sa outou fa’apologaina ai le teineititi o Ianeta e aunoa ma sana agasala, ae aisea fo’i na outou faapologaina ai le tamaloa o Meki e aunoa fo’i ma sona sese sa fai”, e uma atu loa le fa’amatalaga lea a le ali’i meauli ae vaaia loa e le fitafita le oso mai o Meki mai le togavao sa lafi ai ma fa’alala mai le fana i lona lima, o le fana a ni isi o fitafita sa laua fasiotia i luma o le pa o loo si’omia ai le nofoaga e ulufale atu ai i le aai o tagata pologa. “Fa’amolemole tu’u mai se avanoa ou te ola ai”, pau lava lea o le augani a le alii fitafita lenei, ma tu fa’asasa’o lava i luma o lana ta’avale.

Na ona taunu’u lava o le alii pologa ma Meki i le vaega tonu o loo i ai le fitafita, ona la fa’atonuina loa lea o ia e ave le ta’avale ma latou aga’i atu i le falema’i tele o lo o taofia ai Ianeta, se’i momoli atu i ai le vai e togafiti ai lona gasegase, ona faia uma fo’i lea e le fitafita o le fa’atonuga e pei ona fa’atonuina ai o ia. “E i ai le ta’avale o lo o aga’i mamao mai, pei uma lava o se ta’avale a fitafita o le malo a le tupu saua o Eteuati”, o le musumusu atu lea a le ali’i auauna lea sa fa’atali mai i le falema’i i le fafine faiaoga o Lucy, ma te’i mai ai le fafine sa tau tulimoe i luga o le nofoa o loo i luma o le faitoto’a e ulufale atu ai i totonu o le falema’i. O le taimi lava na vaaia ai e le fafine le ta’avale a fitafita o loo aga’i atu, sa le mautonu lona mafaufau poo ai o lo o malaga atu i lea ta’avale, poo se tala fiafia o loo avatu ai ia poo fitafita fo’i a le tupu o loo latou taumafai e saili Ianeta ma auauna e to’alua. Na vaaia e le auauna le maligi lemu ifo i lalo o loimata o le fafine faiaoga o Lucy, ma ua lava lea e ta’u mai ai ua leai sona fa’amoemoe o totoe pe afai e taunu’u ane le ta’avale o fitafita o loo malaga atu ai, peita’i o se itu na faateia ai Lucy ma le auauna, ina ua taunu’u atu le ta’avale a fitafita o le malo, ae la vaaia ai Meki ma se tagata meauli o loo ti’eti’e atu ai, atoa ai ma se fitafita o loo ia aveina atu le ta’avale.