Ads by Google Ads by Google

E LE O OE O SE SULI MONI

Vaega 56

 

Na vaaia e le ali’i meauli le gatete o le ali’i sa ia fa’asaoina lona ola i le fefe, ma ua atagia mai ai fo’i e le o ia o se tagata e ono alu i ni taua. Na vaaia e le ali’i lea le savali sa’o atu o le ali’i meauli lenei i lalo o se tasi o laau tele lava o loo tu mai i le isi itu o le mauga o loo la i ai, ma ia vaaia ai se isi tagata o loo saofa’i mai ai i lalo o le laau, ona ia tago lea i fana e 2 sa tu’u atu e le ali’i meauli ia te ia fa’atasi ai ma toniga a fitafita e to’alua lea ua uma ona fasiotia, ona ia savali loa lea e aga’i atu i le vaega lea ua tuu mai ai le ali’i meauli, ae o se itu na matua fa’ateia ai le ali’i lea, ina ua ia latalata atu i lalo o le laau o loo tu mai ai le ali’i meauli, ma ia vaaia ai lona ta’ita’i, le tamaloa o Meki o loo saofa’i mai ai. E lei toe fa’atali le ali’i lea ae ua tamo’e atu nei ma le fiafia tele ma fusi mai i le tamaloa o Meki, ona ia tagi lea ma fesili atu i ai, “Meki, ta’utino mai e le fa’aumatia e lenei tagata lo’u ola i lenei vaomatua”, o le augani atu lea a le ali’i auauna lenei ia Meki, ae sa pei lava o se timu e pau i le tua o le pato i le fa’alogo a Meki, ona ua ia lagona lona fiafia ina ua la toe feiloa’i ma se tasi o ana auauna ua tele masina o la valavala. “O a mai si o’u to’alua o Lucy”, o le fesili muamua lava lea a Meki i le ali’i auauna lea, ae na tali le auauna, “O loo manuia o ia, o loo i ai o ia fa’atasi ma le isi auauna i se tasi o falema’i i totonu o le malo lenei, o loo fa’atalitali mai ai ma Ianeta lou afafine”, o le fa’amatalaga lea a le auauna na matua fa’ateia ai Meki. “E a lau tala, o ola mai pea si o’u afafine o Ianeta”, o le fesili fia iloa atu lea a Meki, ae na luelue le ulu o le auauna ma tali atu i ai, “Ioe Meki, o loo ola o ia, peita’i e le o toe umi se taimi o loo totoe mo ia ona oti loa lea, ona o se ma’i tuga ua a’afia ai lona soifua, o le mafu’aaga lena o lo’u oo mai i lenei vaomatua, o le sailiina atu lea o le vailaau lea e mafai ona togafiti ai lona ma’i. O le fa’amatalaga a le Foma’i o loo togafitiina le ma’i o Ianeta, e na o totonu lava o le nofoaga o tagata pologa e maua i ai le vailaau e tape ai le siama o loo a’afia ai Ianeta, ma afai e le maua atu, o lona iuga o le oti”.

 

E fai lava talanoaga a Meki ma lana auauna ae na o le fa’alologo o le ali’i meauli pologa e aunoa ma se ano ane i ai, ae ua ia lagonaina lelei le mafua’aga o le oo atu a le tagata lea i le vaomatua, o le sailiina lea o le vai e tineia ai le siama lea ua a’afia ai Ianeta. Ua atoa aso e 2 talu ona i ai Meki, o lana auauna ma le ali’i meauli pologa i totonu o le vaomatua, ua le mafai ona tuua e i latou le nofoaga ona o lea ua faia le tonu, o le a toe fo’i le ali’i meauli i tai i le aai e saili mai le vai lea e mafai ai ona toe maua le malosi o Ianeta, ma ua tonu fo’i i le fuafuaga a i latou nei, o le a latou toe fo’i uma i tai i le aai, ae a latalata loa i le nofoaga o tagata uli, ona faatali atu loa lea o Meki ma le auauna i le auvae mauga ae alu na o le ali’i pologa i tai e su’e mai le vai. Ua mautu le tonu a le au alii lenei i le osofaiga o le a faia, ma ua amata fo’i ona galue le ali’i meauli e gaosi aufana ma fulu a u latou te fa’aaogaina i le taimi o le osofaiga, ina ne’i latou fetaia’i ma ni fitafita a le tupu ae o loo i ai ni a’upega latou te fa’aaogaina. O le aso lea ua faamoemoe le ali’i meauli pologa e tatau ona alu ai le osofaiga, o se tasi o aso fa’apitoa i totonu o le malo, le aso e fa’aali ai tu ma aganu’u a ituaiga taitasi uma lava i totonu o le aai, lea e tuufua ai le nofoaga ae aga’i uma atu tagata i le nofoaga e fa’ataunu’u ai fiafiaga masani. E malu ane loa le afiafi o le aso lea ua fa’atulaga e faia ai fa’afiafiaga a tagata pologa, ae taunu’u loa ma le savaliga a le aualii nei i luga tonu o le mati’e lea e sosoo ma le nofoaga o tagata pologa, peita’i o le fa’afitauli lea ua latou molimauina, ua i ai le pa tele lava ua si’omia ai le lotoa atoa ina ia faigata ai ona toe soona ulufale i ai se tagata.