E LE O OE O SE SULI MONI

Vaega 34

 

Na umi se taimi o nofo pea le teineititi pologa o Ianeta ma punou i lalo ua le gagana, ona o le fa’ateia o lona loto i le fa’aiuga lea ua tu’uina atu e le Tupu ia te ia, ma ua iloa fo’i e le Tupu lagona mafatia o le teineititi o Ianeta i le fa’aiuga ua ia tu’uina atu. Ua vaaia e le Tupu le maligi o loimata o le teineititi o Ianeta ona ia manatu lea, e sili ai pe a alu ese ma le potu ina nei mateia e le teineititi le tupua lea o loo ia taumafai e togi atu. “Ianeta, ua ou vaaia lou mafatia i le fa’aiuga ua ou tu’uina atu, ae pei ona ta tu’u tala, o lou manaoga lea sa tu’uina mai ia te a’u i le taimi sa tala talanoa ai, o le a e nofo iinei e avea oe ma pologa, ae o le a fa’asa’oloto Meki ma ana auauna, ae talu ai ona o lea ua soli tulafono a le malo, ua ou manatu ai o le a fasiotia na o le to’atasi ae fa’asaoloto le isi vaega e totoe ai, aua o le tulaga sa’o lava e tatau ona i ai, e tatau ona fasiotia uma i latou e to’alima na maua ua latou ulufale fa’amalosi mai i totonu o lo’u malo”, e fai lava tala a le Tupu ma tu i luga ua savali i le pito i tua o lona potu, ae o Ianeta i le taimi lea, ua na o le punou lava i lalo ma tagi i le popole o lona loto ina ne’i mae’a ane le se’i ae maua ai o Meki e fasiotia.

 

“Auauna, laulau mai le ma taumafaga ma Ianeta, a mae’a, ona tapena loa lea o i latou e to’alima o loo taofia ina ia avatu i le nofoaga e masani ona fa’ataunu’u ai fa’asalaga masani a le malo, mo le faia lea i ai o le vili poo ai o i latou lea o le a fa’asalaina i le aso, ae o ai fo’i o le a fa’asa’oloto ma toe fo’i atu i lona aiga”, o le fa’atonuga lea a le Tupu ma vaaia ai loa le pisi atu o auauna i le tapenaina atu o le taumafataga ma Ianeta.

 

O le malu ane ai o le afiafi i le aso lava lea, na vaaia ai loa le fa’atumulia o le malae e masani ona fa’ataunu’u ai fa’asalaga a le malo, i ta’ita’i fa’apea ai tagata eseese ua lolofi atu latou te molimauina le vili lea o le a fa’ataunu’uina i le tamaloa o Meki ma ana auauna na maua ua latou ulufale faamalosi i totonu o le malo ma le fa’amoemoe e gaoi faamalosi ese atu le teineititi pologa o Ianeta. I totonu o le fale lea e masani ona fa’a’taunuu ai fa’asalaga, na vaaia ai e Ianeta Maki ma ana auaunaga o loo tutu mai, o loo fusi uma o latou foliga ma le latou toniga e tasi e fa’ailoa mai ai pagota o loo fa’apologa i totonu o le malo. E lei umi ae savali mai loa ma le auauna faapitoa a le Tupu ma amata loa le vili, o le tagata o le a tu i ai le vili, o ia lena o le a fasiotia e tusa ai o le fa’aiuga ua mae’a ona tu’uina mai e le Tupu, ae o le isi vaega e to’afa e totoe ai o le a toe fa’afo’i atu i latou i lo latou malo. Ua amata le vili ma ua leai fo’i se tasi e toe minoi poo se leo e toe gase. E lei umi ona faia le vili ae tu tonu loa le vili i le tagata o loo lona 3 i le laina, ona fa’atonu loa lea e le Tupu ana auauna fa’apitoa ina ia ta’ita’i ese mai le tagata lea ua tutonu ai le vili i le vaega e fa’ataunu’u ai le fa’asalaga, ae o isi tagata e to’afa o loo totoe ia toe fa’afo’i i le fale o loo taofia ai, ina ia tapena loa i latou mo le toe momoliina atu i le nofoaga e saili ai lo latou auala mo le toe aga’i atu i lo latou aai. Na vaaia e le tupu le gatete o le teineititi o Ianeta ao nofo ai i luga o lona nofoa i le taimi na ta’ita’i mai ai e auauna le tagata lea ua tu tonu ai le vili ma ona foliga o loo ufi pea, ae na matua fa’ateia le teineititi o Ianeta ina ua tatala ese ofu o loo ufi ai foliga o le tagata lea ua tu tonu ai le vili, ma manino atu ai i lana vaai, o le tamaloa o Meki lea ua tu tonu ai le vili.

Comment Here