E LE O OE O SE SULI MONI

Vaega 50

 

O le ta’aligoligoa o le po na matua logo ai atumauga o le vao maoa i le fa’ataitaio o le ali’i fitafita i le fiaola, ina ua matua tu tonu lava le fulu a u lona lua i lona fatafata, ma ua amata fo’i ona ia lagona le tau puni o lana manava, ae o le ali’i pologa sa ia fanaina le a u, e pei lava e le o i ai se mea o tupu i lona mafaufau i le taimi lea, ona o loo tu tu lelei lava i le pogisa ma toe fa’atulaga le isi fulu a u lea ua fa’amoemoe e fa’aumatia ai loa le ali’i fitafita ma le pisapisao i luga. Na ona meme’i lava i tua o le fulu a u mulimuli fa’amamulu loa ma alu atu ai lava ma tu tonu lava i le ua o le ali’i fitafita ma le toe lagona ai loa sona leo, sei vagana ai le fiti solo i lalo o le laau tele lea i le fia ola, ae o Meki i le taimi lea, ua tu i luga ma taumafai e sola ese peita’i e le mafai ona alu ese ona o loo loka lona lima aga’i i le ogalaau. “Se fa’amolemole poo ai oe”, o le fesili atu lea a Meki ma ona loimata, ao fa’atau pupula sa’o i le itu lea na fana mai ai fulu a u na manu’a ai le fitafita lea ua foliga mai ua na o le ta’atiatia o le a oti. “Fa’amolemole afai o oe o se tagata e mafai ona e fesoasoani mai ia te a’u, fa’amolemole ia e fesoasoani mai loa i le taimi lava lenei, ua matua ou mana’omia lava se fesoasoani”, e fai lava tala a Meki ma fa’atau pupula lava i le vaega pogisa o le vaomatua lea na te iloa sa fana atu ai fulu a u.

 

Ao augani atu Meki i le tagata lea mo se fesoasoani, sa fa’afuase’i ona ia fa’alogoina leo o ta’avale ma le pisapisao atu o fitafita a le tamaloa saua o Eteuati II, e foliga mai o loo aga’i atu e saili le itulagi lea na latou lagonaina mai ai le alu atu o le si’uleo o le tagata. Pau le vaega lea o loo iloa atu e le ali’i pologa, o le moli ga’o lea sa pese ai le ali’i pese i tafatafa, o loo mumu pea ma o loo maua ai sina malamalama, e lei toe fa’atali le ali’i pologa ae ua ia tago atu nei i le isi fulu a u ma fana ai le moli ga’o ma ta’ape ai lona tino, ma vaaia ai loa le pogisa atoa o le nofoaga, ma ua lagona ai loa e le tamaloa o Meki lona fefe ma le pala’ai, ina ne’i maua atu o ia e ni fitafita a le tupu saua o Eteuati II ona fasiotia lea o ia ona o le ali’i fitafita lea o loo ta’atiatia i ona tafatafa. Ua aga’i atu i le itula talu ona fa’alogoina leo o fitafita a le malo, peita’i e leai lava ma se fitafita ua latalata atu i le nofoaga o loo i ai Meki atoa ai ma le ali’i pologa lea o loo lafi mai i le isi itu. Ua mautinoa e le ali’i pologa lenei ua kilia mea uma mo i laua ma le ali’i lea sa pese mai i le isi itu, o lea na ia taumafai ai loa e fa’apao lana savali ina ia lagona mai ai e Meki o ia. “Sole, o ai oe?”, o le fesili lea a le ali’i pologa, ae na tali mai le tamaloa o Meki ma lona leo ua fefe ma gatete, “O a’u o Meki, lea sa taofia fa’apagota i totonu o le malo o Eteuati II”. E fetaui le uma ane o le tali a Meki ae ona vaaia loa se moli ga’o ua tutu e le tagata lea, ma ia vaaia ai loa, o le tagata pologa tonu lava lenei sa ia fa’asa’olotoina ese mai o ia mai le falepuipui sa loka ai. “Oi, o oe lea na e fa’asa’olotoina mai a’u”, o le fesili atu lea a Meki i le tagata pologa, ae sa luelue le ulu o le ali’i pologa lenei ma tali atu, “O a’u lava lenei, o le ala fo’i lena o lo’u tuliloaina mai o oe, ina ia fa’aauau la’u galuega o le fesoasoani lea ina ia toe fa’afo’i oe i lou aiga ma lou malo”, o le tali atu lea a le ali’i pologa ma tago atu i le fuifui ki o loo tautau mai i le taga o le ofu a le ali’i fitafita o loo ta’atia i ona autafa ma tatala ai le loka o loo loka ai lima o Meki. “Fa’afetai i lou agalelei ma lou fa’asaoina o lo’u ola. E le gata sa e fa’asaoina mai lo’u ola mai totonu o le malo, ao lea fo’i ua e toe fa’asaoina mai lo’u ola i lenei po mai lima o lenei ali’i fitafita saua”.

Comment Here