E LE O OE O SE SULI MONI

Vaega 49

 

O le te’i o le ali’i pologa i le vaaiga lea ua ia iloaina atu na mafua ai ona tu lemu i luga ma taumafai e soso teisi aga’i i le paolo o le laau tele lea o loo tu ai, ina ne’i iloa mai o ia e le tagata lea ua ia vaaia lona ataata. Ua tu lelei le alii pologa ona tau mafai lea e fa’ato’ato’a lona mafaufau ona ua amata ona tau oso atu le ta ta gase o lona tino, ua amata fo’i ona tutupu musele o lona tino i le fefe, ina ne’i sese sana gaioiga e faia ona avea lea ma auala e maua ai laua ma le tagata o loo pese, ma oo ai loa le oti ia tei laua. Na fa’ato’ato’a le vaai a le ali’i pologa i lona fia iloa lelei atu o le tagata o loo tootuli ma pese, peita’i o loo faigata lava ona manino lana vaai poo Meki lea pe leai, ona e le o mafai lava ona kilia le mumu o le moli o loo pito i ona luma. E lei umi ae vaaia loa e le ali’i pologa le tolo tolo lemu ane o le tagata sa ia vaaia lona ataata i tua tonu lava o le laau lea o loo tootuli ai le tagata ma pese, ma manino ai i lana vaai, o le fitafita o le malo lea o loo tolotolo atu ma lana a’upega, ma ua atili ai ona fa’amalo le tu a le ali’i pologa ma tau taofiofi i totonu lana manava, ina ne’i lagona mai e le fitafita se mea e gase atu i le itu o loo lafi ai ona maua atu ai lea ma ia.

 

O le malie tele o pesega a le tagata o loo tootuli na mafua ai ona toe tu le fitafita, ma vaaia ai loa e le tagata pologa le saofa’i o le fitafita i lalo, ua fa’ata’atia lana a’upega i le isi itu o le laau, ae ua amata nei ona savali atu i le itu o loo fa’asaga aga’i i ai le tagata o loo pese, e foliga mai o loo naunau e fa’ailoa o ia i se auala filemu. O le taimi lava na aveese ai e le fitafita lana a’upega ma fa’ata’atia i tafatafa o le laau tele lea o loo tootuli ai le tagata ma pese, na aapa atu ai loa le ali’i pologa i le ato o loo fa’afafa i lona tua ua to mai i fafo lana aufana, fa’atasi ai ma le u sa gaosi mai i ivi o manu latou te tuliina i taimi o a latou tuliga ma tu’u i totonu o le aufana ma le fa’amoemoe, o le a ia fanaina ai le fitafita manu o lea ua tu’u ese lana a’upega mai ona lima. Ao pisi le tagata pologa e tau fa’atulaga lana aufana, sa ia vaaia le savali atu o le fitafita ma fa’ailoa o ia i le ali’i o loo pese, ma fa’afuase’i ai loa ona tu i luga le tagata o loo pese ma ee leotele ma sauni o le a tamo’e i le atoa, peita’i na peti e le fitafita le tagata sa to’otuli i se tama’i naifi sa uu i lona lima ma tu i lona suilapalapa, ma ia vaaia ai loa le sulu o le ali’i sa pese i lalo ma fa’ataitaio i lona vae, ae o le fitafita i le taimi lea o loo tu ma fa’atau pupula i le ee a le ali’i sa pese.

 

“E te toe ee leotele loa i luga o’u fasiotia loa ma oe i le taimi lava lenei”, o le fa’atonuga lea a le fitafita sa tu’uina atu i le ali’i sa pese na mafua ai ona le toe fa’alogoina sona leo i luga, ae ua na o le ta’atiatia ma fiti i le tiga o lona manu’a. Na vaaia e le alii pologa gaioiga a le fitafita o loo faia, na mafua ai loa ona ia iloa e foliga mai e na o ia lava le fitafita o loo i ai i le itu lea o le vaomatua. Ua tago le fitafita i filifili ma le loka o loo i totonu o le ato lea o loo fusi i lona sulugatiti ua aumai i fafo, ona ia savali mai loa lea ma loka ai lima ma vae o le ali’i sa pese, ona ia nonofo loa aga’i i le ogalaau o loo lata ane i le vaega o loo i ai, fa’atasi ai ma lana fa’atonuga sa tu’uina atu i ai, “O le sola ese mai lou matai o lona taunuuga o le oti, ma o le iuga fo’i lena o le a oo ia te oe, pe afai ae auina atu oe i luma o le tupu i le aso a taeao”. Na ona uma lava ona fai atu o le tala lea a le fitafita, tu loa i luga ma toe savali atu i le vaega o loo i ai lana a’upega, peita’i e lei lua ana la’a ae tu ai loa ma le fulu a u e fausia mai i le ponaivi manu i lona tua, ma pau ai i lalo, ae ua toe fa’asaga atu le ali’i pologa ma toe fana le isi fulu a u ma tu i lona fatafata, ma ua atili ai le fiti solo o le fitafita i le fia ola, ae o le ali’i sa pese i le taimi lea, ua nofo i luga ma fa’atau pupula i le mea lea ua tupu i le ali’i fitafita, ma ua lagona fo’i lona fefe i le taimi lea.

Comment Here