Ads by Google Ads by Google

E LE O OE O SE SULI MONI

Vaega 48

 

E savali tau tolotolo fua le tagata pologa lenei i le tau autiloina o le vaega tonu o loo sau ai le leo o le tagata o loo pese i le ta’aligoligoa o le po, ae o loo lagona lava i lona tino le li’a ma le fefe, ina ne’i fa’afuase’i ona pu’e fa’apagota o ia e fitafita a le tupu taua o Eteuati II, ona mautinoa ai loa lea ua maua le iuga o ia, i lona sola ese mai lea i totonu o le malo, atoa ai ma le tau sailiina o le tagata na ia fa’asola ese mai le tamaloa pagota o Meki lea o loo tau sailia pea i le taimi lea. O lagona popole ma le fefe o le ali’i pologa na mafua ai ona toe tu ma to laititi lona sela, ona ia autilo solo lea pe na te iloaina atu se isi malamalama e latalata ane i le nofoaga lea o lo o i ai, peita’i na fiu e tau autilo e leai lava se isi na te iloaina atu, ae o le taimi fo’i lea ua amata ai ona mamao le leo o le tagata sa ia fa’alogo o pese i lana fa’alogo. O le popole o le ali’i pologa atoa ai ma le tau oso ane o lona fefe, na mafua ai ona ia toe tula’i i luga ma fa’aauau lana savali tau tolotolo aga’i atu i luma, e aga’i atu i le laau tele lea na ia iloa atu ai le pupula mai o le malamalama o se moli, peita’i na fa’afuase’i ona lilo atu i lana vaai le malamalama ma ua faigata ai loa ona ia toe faia se isi gaioiga.

 

O le le mautonu o le mafaufau o le ali’i pologa i le tulaga lea o lo o i ai o ia i le taimi lea, na mafua ai loa ona ia saofa’i ifo i lalo o le tama’i laau lea o loo tu ai ma koma ai loa mo sina taimi puupuu, se’i tau toe fa’alogologo pe na te toe lagonaina atu le leo o le tagata lea sa ia fa’alogoina o loo pese mai i le nofoaga lea e le mamao ese atu ma ia. Pe tusa o le itula tau ona saofa’i le ali’i pologa i lalo o le laau ma tau fa’alogologo i le leo o le tagata sa pese, ae fa’afuase’i loa ona ia toe fa’alogoina le leo lava lea o le tagata ua toe pese mai, ae o le taimi la lea, ua fai fo’i si tau mamao o lana fa’alogo i le itu o loo aga’i mai ai le leo. Na tu i luga le ali’i pologa ma tau autilo poo fea le itu o loo sau ai le leo, peita’i ao ia tau autilo, sa ia iloaina atu se malamalama o loo tau pulapula mai i lalo o se laau tele lava, e foliga mai i lana vaai o lea ua amata ona tau malamalama teisi ane le pupula o le moli, ma e foliga mai o lea fo’i ua vavala mai i lana vaai o loo i ai le tagata o loo i ai i le nofoaga lea e sau ai le pupula. E lei toe fa’atali le ali’i pologa ae ua fa’anatinati atu loa lana savali e aga’i atu i le vaega tonu lea ua ia mautinoa o loo mumu mai ai le moli, atoa ai ma le leo o le tagata o loo pese. Na fa’ateia le ali’i pologa ina ua ia taunu’u atu i le vaega tonu lea e latalata atu i lalo o le laau tele lea, ma ia vaaia ai se tagata o loo saofa’i i lalo o le tafu’e o le laau o loo tootuli ma pese, ae o ona luma o loo tutu ai se moli ga’o.

 

Ua le iloa e le tagata pologa sana gaioiga e faia i le taimi lea, ua lagona le fefe ma le popole, ina ne’i avea le vaaiga lea ua ia iloaina atu o se mailei e pu’e fa’apagota ai o ia e fitafita o le malo. Ao fefinaua’i le mafaufau o le ali’i pologa i le tonu e tatau ona fai, sa fa’afuase’i ona oo ane se lagona ia te ia, e sili pe a fa’atali teisi ina ne’i ona vave vave ae avea ma auala e lamatia ai lona ola. Na manino i le vaai a le ali’i pologa o le tagata tonu lava lea sa ia fa’asa’oloto mai totonu o le falepuipui, lea o loo tootuli ma pese mai i lalo o le laau. O tagata pologa i totonu o le vaega lea o Aferika, e masani i latou i le fa’aaogaina o a’upega e tuli ai manu, e aemaise lava i laau maai e fa’aaoga pei ni a’upega, o a’upega fo’i na o loo fealua’i ma le ali’i pologa lenei, lea o loo manatu e puipui ai o ia ina ne’i osofa’i fa’afuase’i atu le fili ia te ia ae o loo i ai se a’upega e tua i ai. Ao nofo nofo ai pea le ali’i pologa i lalo o le laau ma tau vaavaai pe na te iloaina atu se tagata e ese mai i le ali’i o loo tootuli, na fa’afuase’i ona ia vaaia i le ataata o le moli se isi tagata o loo aga’i atu i le vaega tonu lea o loo tootuli mai ai le tagata o loo pese.