Vaega 47

Na pei e puni le tata o le fatu a le fafine faiaoga o Lucy i le fa’amatalaga a le teine tausima’i lea ua fa’ailoa ane ia te ia, atoa ai ma lana fa’amatalaga, e le o toe tele se malosi o le tama’ita’i pologa o Ianeta o loo totoe. Na Lucy mo nai sekone ona ia toe fesili lea i le teine foma’i pe i ai lava se isi auala e mafai ai ona maua se fesoasoani mo si ana tama, pe afai ae fa’atali se ta’avale e aumai ai paina toto mai le falema’i tele o loo lata ane, ae na tali le teine foma’i, “Tina, e mafai ona fai le tullaga, ae pei ona fai atu, e le o toe iloa poo le a le malosi o loo totoe i lona tino, ona o lea ua foliga mai i le suega sa faia ua matua maualalo lava lona toto, ua mana’omia vave fo’i se fesoasoani i le isi 30 minute o loo totoe”, e le’i uma lelei atu le fa’amatalaga a le teine foma’i ae fa’apea atu loa ma le fafine faiaoga o Lucy e fa’apea, “Fa’afetai tele lava i lau susuga a le tama’ita’i tausima’i, ae o le a matou aga’i atu loa i le aai atonu e maua ai se fesoasoani mo si a’u tama”. E fai lava tala a le fafine faiaoga o Lucy ma valaau atu i auauna ina ia toe si’i atu Ianeta i totonu o le ta’avale ma latou aga’i ese atu loa. E pei ona silafia, o le nofoaga lea o loo i ai le falema’i muamua lea na tau atu i ai Lucy ma lana aumalaga, o loo si’omia lava e atumauga o le aai o tagata pologa, ma o loo tiute solo ai fitafita ma leoleo a le tupu o Eteuati II i nofoaga eseese, mo le mata’ituina o ni tagata ese e aga’i atu i totonu o le malo. E lei atoa se 40 minute talu ona alu ese mai le ta’avale ae vaaia loa e Lucy ma lana aumalaga n ta’avale fitafita se 2 o loo fa’alava mai i le pioga o le auala, e foliga mai o loo faia sa latou siaki mo ta’avale fegasoloa’i, peita’i e le’i taofia le latou ta’avale ae sa fa’aauau pea la latou malaga ma taunu’u ai i le falema’i tele o loo ogatotonu i le aai, ma maua ai loa le fesoasoani mo le tama’ita’i pologa o Ianeta.

“Fa’amolemole lau susuga a le teine tausima’i, ua mana’omia lava se fesoasoani mo si a’u tama, e le o toe umi se malosi o totoe i lona tino, ua leva fo’i ona vaivai o ia ma ua mana’omia se fesoasoani”, o le talanoa atu lea a le fafine faiaoga o Lucy i le tama’ita’i tausima’i, ae o le taimi lea o loo taula’i le vaaia le teine tausima’i i foliga o Ianeta ma ia vaaia ai tulaga fa’aletonu ua i ai lona soifua. “Fa’ataoto ane i luga o le moega lau tama”, e fai lava le fa’atonuga a le teine tausima’i ma aapa atu ua to mai fagu vailaau atoa ai ma masini e fa’apipi’i ai le masini e fa’amanava ai le teineititi o Ianeta, ma toso atu ai loa o ia i totonu o le potu tigaina mo isi togafitiga. “Fa’amalulu atu ia te oe le tina ma le au malaga, e le mafai ona i ai se tasi o outou i totonu o le potu o loo taoto ai Ianeta, e mana’omia e foma’i se taimi mo a latou togafitiga, ae mapu mai pea i fafo e fa’atali mai ai se isi ripoti lata mai i le tulaga o lona soifua maloloina”, e fai lava tala a le teine tausima’i ma ia aapa atu ua tapuni le faitoto’a, ona laulaututu ai lava lea o le fafine faiaoga o Lucy ma auauna e to’alua i fafo ma foliga le mautonu. “O lea ua mapu mai Ianeta i le falema’i, ou te talitonu fo’i o le a maua se isi fesoasoani mo ia, ae o le a se tulaga o Meki e pei ona tatou malaga mai ai, e tatau ea ona tatou fa’aauau e saili mai o ia pe tatou nonofo pea iinei se’i maua mai se tonu mautu mo Ianeta”, o le fesili lea a le isi auauna na matua faigata lava i le fafine faiaoga ia Lucy ona tali.

Na umi se taimi o tu tu le fafine faiaoga o Lucy ma fa’atau pupula i le faitoto’a o le potu lea o loo taofia ai Ianeta i totonu, ma ua vaaia le amata maligi o ona loimata, ua lava lea e ta’u mai ai ona lagona mafatia ma le le mautonu ua i ai. “Vaai oulua, ua maligi o’u loimata ona e taua uma Meki ma Ianeta ia te a’u, sa ou faapea ou te le toe vaai ia Ianeta, ae fa’afetai o lea ua mafai ona toe maua mai o ia, e tatau fo’i la ona ou mautinoa ua toe maua lona malosi, ae o Meki, ou te le o mautinoa le tulaga ua oo i ai lona ola, ina ne’i misi atu Meki misi atu ma Ianeta, ona leai lea o se uiga o lenei olaga ia te a’u”.