E LE O OE O SE SULI MONI

Vaega 43

 

Na ona toe liliu lava e le ali’i ave ta’avale o le latou ta’avale ma toe fo’i atu loa i le nofoaga tonu lea o loo ta’atitia mai ai ato pa’u ma le tagata o loo taoto mai i lalo o le laau, se’i vaai poo ai lenei tagata, ae poo se tagata fo’i o loo ia fia mana’omia se fesoasoani. Na tu mamao mai le ta’avale i le isi itu auala, ona fa’atonu lea e le fafine faiaoga o Lucy le isi ali’i o le au malaga e oso i fafo ma le ta’avale ae savali aga’i atu i le vaega o loo taoto mai ai le tagata i lalo o le laau, e fesili ma vaai poo ai o ia, ae poo ia mana’omia fo’i se fesoasoani. O le latalata atu o le auauna i lalo o le laau lea o loo taoto mai ai le tagata, na ia vaaia ai, o se tama’ita’i o loo taoto i lalo o le laau, ma ato pa’u o loo fa’atutu i ona tafatafa. O le popole o le auauna ina ne’i i ai se a’upega o le tagata o loo moe, poo se mailei fo’i e ono osofaia ai i latou e ni tagata fa’aaupegaina, na mafua ai ona aapa i lana a’upega ma sauni o le a osofa’i, ma fa’aauau pea lana savali, peita’i o taimi uma e la’a aga’i ai i luma, na te vaaia ai pea le taoto pea o le tama’ita’i lea o loo moe i lalo o le laau e aunoa ma se minoi pe gaioi fo’i. Na ona tago atu lava o le auauna i ato pa’u o loo tutu i tafatafa o le vaega o loo taoto ai le tama’ita’i lea ua sii mai ona ia toe fo’i lea ma ave atopa’u i le vaega o loo paka mai ai le latou ta’avale, se’i siaki poo a mea o loo i totonu o nei atopa’u, ae pe mafai fo’i ona tau maua ai i mea o loo i totonu o atopa’u nei le ituaiga tagata o loo taoto i lalo o le laau. Na pito mai i luga o le atopa’u muamua se ata o se tama’ita’i lalelei, ae o lalo atu o loo i ai lavalava ma ofu, e fa’apena fo’i i le isi atopa’u, o loo i ai lavalava ma ofu, o ofu uma o se tama’ita’i, o le mafua’aga lea na toe fa’atonu ai loa e le fafine o Lucy le auauna e toe fo’i i lalo o le laau e fafagu mai le tama’ita’i o loo moe ai, se’i vaai pe na te mana’omia se fesoasoani.

 

E fetaui le taunu’u atu o le auauna i le vaega tonu o loo taoto mai ai le tama’ita’i ae vaaia loa le minoi o le tama’ita’i e foliga mai o lea ua ala i luga. O le fa’alogoina e le tama’ita’i o Ianeta o se leo e foliga mai o se tagata o loo savali, na mafua ai ona ala i luga ma taumafai e tago atu lona lima i le atopa’u o loo pito atu i ona tafatafa, peita’i na fiu e autago lona lima e le tau atu lava i se atopa’u, o lea na ia nofo ai loa i luga ma autilo solo i ona tafatafa, ma ia iloa ai ua leai ni ana atopa’u sa ta’atitia i ona tafatafa. O le fa’ateia o le teineititi i le vaaiga lea ua ia vaaia nei na mafua ai ona tu fa’afuase’i i luga ma autilo solo i le togavao pe na te iloa atu se tagata, ae poo ai fo’i lea ua ia aveeseina ana atopa’u, peita’i na pei e taia le vaai a le teineititi o Ianeta i se vaaiga uiga ese ina ua tau atu lana vaai i se alii e ofu i se toniga Leoleo o loo fa’agatasi ma se laau ma lana fana o loo ta’i atu ia te ia. “O ai oe fa’amolemole”, o le fesili lea a le tama’ita’i o Ianeta ma toe nofo i lalo ua leai sona fa’amoemoe. “Fa’amolemole poo ai oe, ae o fea fo’i a’u atopa’u ia sa ta’aititia i tafatafa o le mea sa ou moe ai”. E le’i tali le auauna ae se’i vagana ai lona alu ese mai i le vaega o loo lafi mai ai ma savali aga’i mai ia Ianeta, ma ina ua ia iloaina e le o i ai se a’upega i le tino o le tama’ita’i, na ia toe sulu ai loa lana a’upega i lona fa’amoega ae ua savali mai ma tu i luma o le tama’ita’i ma fesili atu i ai, “Aisea ua e moe ai i lenei togavao na o oe. E i ai nisi tagata na outou o mai i lenei nofoaga pe na o oe lava”, o le fesili lea a le auauna ia Ianeta, ae na tagi le tama’ita’i ma tali mai e faapea, “E leai, e na o a’u lava i lenei togavao, sa momoli mai a’u e fitafita o le malo i ni nai aso e le’i mamao atu, ma latou tu’u ia te a’u i le nofoaga lenei ma le fa’aupuga, afai ae maua mai a’u e se tagata ma fesoasoani ia te a’u, ua ou ola, ae afai e leai se isi e fesoasoani ia te a’u, ou te oti ai lava i lenei nofoaga. Ae o a’u o Ianeta, sa aumai fa’amalosi a’u i le nofoaga lenei i ni tausaga ua mavae, peita’i ua finagalo o le Tupu o le malo ia Eteuati II ina ia toe fa’asa’oloto ia te a’u”.

Comment Here