Ads by Google Ads by Google

E LE O OE O SE SULI MONI

Vaega 42

 

I le vaivai tele o Ianeta i le tau ta toso solo o ana atopa’u mamafa na mafua ai ona moe vaivai ina ua taunu’u i lalo o se tasi o laau tele lava, ma ua pei lava o se tagata pologa ua atoa le vaiaso o galue i ni galuega mamafa e aunoa ma se meaai. Ua fofola e Ianeta le ie i lalo o a’a lapopo’a o le laau, ona afifi lea o isi ofu i le isi ie ae fai ma ona aluga, ma taoto ai loa i lalo ma moe loa. Sei o tatou liliu atu lava i le pisi lea ua matua pisi ai lava fitafita o le malo i le tau sailiina o le nofoaga lea ua sola aga’i i ai le tamaloa o Meki, ae pe na fa’apefea fo’i ona sao i fafo Meki mai le fale lea sa taofia ai o ia ma isi pagota ua oo i le taimi e fa’ataunu’u ai a latou fa’asalaga o le oti. O se ali’i pologa sa fesoasoani i ai Meki i le taimi ao avea o ia ma pologa i le aai lea sa nofo muamua ai Ianeta, o ia lea na ia fesoasoani i le fa’asolaeseina mai o Meki mai le nofoaga lea sa taofia ai o ia, ina ua ia alu atu e momoli meaai a pagota o loo taofia ai, ae talosaga ane i ai Meki mo se fesoasoani, ma gaoi ai loa e le ali’i pologa lenei le ki mai luga o le laulau ae tatala ai le faitoto’a ma mafai ai loa ona sola ese Meki, peita’i o le itu faigata lea ua fetaia’i nei ma Meki, ua le iloa e le Tamaloa poo fea tonu le vaega o le vaomatua lea ua aga’i atu i ai lana solaaga, ae ua lagona fo’i le vaivai o lona tino ma le fia ai ina ua atoa le po o sola ese mai le nofoaga sa taofia ai o ia, ma ua mana’omia fo’i e le tino le vaivai.

 

Manatua o lea ua taunu’u auauna e to’a 4 sa malaga fa’atasi mai ma Meki i le fa’asola ese ina atu o Ianeta, ao lea la ua tuua ai nei na o le tamaloa o Meki i le nofoaga o loo fa’apologa ai o ia, e fa’atali ai le aso e fa’ataunu’uina ai lona fa’asalaga o le oti. O lea la ua mautu tapenaga uma a le fafine faiaoga o Lucy ma auauna fa’apitoa a lona to’alua, o le a latou toe aga’i atu i le malo o loo taofia fa’apagota ai lona to’alua o Meki, e fa’aoo atu i ai se talosaga pe maua se avanoa e toe fa’asa’oloto atu ai o ia. Ua tapena le malaga a Lucy na auauna fa’apitoa e le tamaloa o Meki ma le fa’amoemoe afai e taunu’u atu i le malo o Eteuati II ae tula’i mai ai se fa’afitauli poo se fa’aletonu, ona latou sauni loa fo’i lea e tali atu i ai i ni osofaiga e tutupu mai ai. O le malu ifo o le afiafi o le aso e pei ona tuupoina e alu ai le malaga, na vaaia ai e auauna a le tamaloa o Meki le naunau o le fafine faiaoga o Lucy i le fia oo i le malo o le Tupu o Eteuati II se’i toe fa’asa’oloto mai si ona to’alua ua tele tausaga o taofia fa’apagota ai. Ao aga’i atu le ta’avale i luga o le alatele i le po lea, sa fa’afuase’i ona fa’alogoina e Lucy ma auauna a lona to’alua ripoti o loo fa’asalalau mai i le leitio, e fa’atatau i se ali’i pagota o loo tau sailia i totonu o le malo o tagata pologa, lea ua masalomia lona sola ese mai i le falepuipui, ma e i ai masalosaloga o loo sola o ia aga’i i le vaomatua i totonu lava o le malo.

 

“Talosia e le o si o o’u to’alua o Meki lea o loo fa’atatau i ai lenei ripoti, talosia o loo i ai pea lava o ia i totonu o le malo o tagata pologa, ina ia faigofie ai ona ou oo atu ma lavea’i mai o ia”, o mafaufauga faivavale ia a le fafine o Lucy ao aga’i atu pea le ta’avale i luga o le auala. E fetaui le tatafa ane o ata o le aso fou, ae latalata loa le ta’avale i atumauga o le nofoaga e aga’i atu ai le auala i totonu o le malo o tagata pologa, ma ua lagona fo’i e le fafine o Lucy lona fiafia ina ua ia talitonu, e le o toe umi se taimi ona latou feiloa’i loa lea ma si ona to’alua, peita’i a’o aga’i atu pea le ta’avale i le auala, na fa’afuase’i ai ona vaaia e Lucy ma le aumalaga se tagata o loo taoto mai i lalo o se laau tele lava ma ana ato o loo fa’atutu i ona tafatafa, o le fiamalamalama atili o le au malaga i le vaaiga lea ua latou iloa atu, na mafua ai loa ona faia le tonu e toe liliu mai le ta’avale se’i siaki poo ai lenei tagata, ae poo se tagata pologa fo’i e sau mai totonu o le malo o loo fa’apologa ai si ona to’alua o Meki, aemaise ai le teineititi o Ianeta.