Na nofo le tamaloa o Etimani ma toolima i luga o lana laulau ma toe to manatu mo ni nai sekone, ina ua mae’a ona fofola atu e le teineititi meauli lona fanoga o loo i ai, atoa ai ma lona talitonuga, e sili atu le aiga o Mekala nai lo le aumau fa’atasi ma tagata pologa. “Ianeta!, o se tagata meauli muamua lenei ua sau i le nofoaga lenei ua ia fa’asoa mai ni ona lagona ia te a’u e tusa ai ma le mea e mana’o i ai. Vaai oe, o le tagata pologa, e leai sona avanoa e ulufale ai i le maota o le Tupu, ae ona o a’u o Etimani II, o se tagata e talitonu i le Atua ma alofa i tagata, o le mafua’aga lena ou te aumaia ai i totonu o lo’u maota tagata pologa uma e ulufale mai i le aai, se’i ma talisua ma fa’ailoa i ai tulafono, ae ua lelei, taoto mai lou fanoga se’i o’u mafaufau i ai, ona toe avatu lea o se isi poloa’i mo sa ta feiloa’iga lona lua”, o le fa’amatalaga lea a le tamaloa o Etimani, ma ia fa’atonuina loa auauna ina ia laulau atu le taumafataga mo laua ma Ianeta.

Sei o tatou toe liliu atu lava i le ulugali’i o Meki ma lona to’alua faiaoga o Lucy. O lea ua aga’i ese mai le ulugali’i mai le fale o le fafine saua o Mekala i le afiafi lea ma le tuutuuga, ia la toe fo’i atu ua maua atu Ianeta i le fale, afai e leai, ona oo loa lea o le mataupu i se isi tulaga. E ta tonu loa le itula e 6:00 i le afiafi o le aso lava lea ae toe taunu’u loa le ta’avale a Meki ma Lucy i luma o le faitoto’a o le pa, e lei umi ae sosolo atu loa fo’i ma ta’avale uli e lua, o ta’avale ia a le Ofisa o loo pulea ma vaavaaia le fa’a faigaluegaina o tagata pologa i totonu o le malo. Ae o le itu na fa’ateia ai le tamaloa o Meki, o se taimi muamua lenei ua la aga’i atu ai ma Lucy ua tapuni mai le pa, fa’atasi ai ma ali’i Leoleo po e to’alua o loo tiute mai i le pito i totonu o le pa, e tofu i laua ma a’upega.

“E i ai se mataupu e mafai ona ma fesoasoani atu ai ia te oe”, o le fesili ane lea a le isi Leoleo po ia Meki lea o loo tu i luma o le faitoto’a o le pa. “Ioe fa’amolemole lau susuga i le ali’i Leoleo, o a’u o Meki, o le Pule o le Ofisa e vaavaaia tagata pologa i le malo, matou te fia talanoa ia Mekala ona o le mataupu e fa’atatau i le teineititi pologa o Ianeta”, e fai lava tala a Meki ma ia fa’aali atu lana pine e fa’amaonia ai o ia ma lona tulaga i le Leoleo faitoto’a. “Fa’amalulu atu i lau susuga Meki, e le o maua mai Mekala poo lona ali’i i le la maota i le taimi nei, e leai fo’i se teineiteiti pologa o i ai i le lotoa i le taimi nei”. E lei uma mai le tala a le Leoleo ae toe tuli tatao atu i le fesili a Meki, “E a lau saunoaga, afai la ua leai se teineititi pologa iina, o fea la ua ave i ai”, ae na toe tali le ali’i Leoleo faitoto’a, “Ua mae’a ona auina atu le teineititi pologa i le nofoaga autu o loo fa’a faigaluega ai le to’atele o tagata pologa o le malo, i le itu i sisifo o le motu, le nofoaga o loo i luga o atumauga”, e fai lava tala a le Leoleo faitoto’a ma savali aga’i atu i le maota o Mekala ma lona ali’i, ae ua tu tu ai nei na o Meki i fafo o le pa e pei o se tagata ua leai se fa’amoemoe. Na ona savali atu lava o le tamaloa i ta’avale uli a le Ofisa lea o loo paka mai i le isi itu ma talanoa atu i ali’i o loo i ai, ma faia ai loa le tonu o le a latou aga’i atu i le nofoaga lea ua fa’ailoa mai ua mae’a ona auina atu i ai le teineititi pologa o Ianeta.

Se’i o tatou toe fo’i atu lava i totonu o le aai lea o loo i ai tagata pologa, ma le maimoaga a le teineiteiti pologa o Ianeta lea ua fa’agasolo nei ina ua mae’a le taligamua ma le Tupu o Etimani II. O le nofoaga muamua lava na ave i ai e auauna a le Tupu ia Ianeta, o le fa’amatamata lea i nofoaga o loo fa’atinoina ai galuega a tagata pologa, ma na matua ofo le teineiteiti i le mamafa o galuega, ae o le to’atele naua fo’i o tagata pologa o loo galulue i le nofoaga tele lenei, e le gata o toeaiina ma loomatutua, ae oo lava fo’i i tagata malolosi, o talavou, fafine atoa ai ma tamaiti e pei o ia.