Ads by Google Ads by Google

E le lava se tupe e fa’atau ai uila afi fou mo Leoleo


[ata: foa'i]
ausage@samoanews.com

Na atagia i le iloiloga a le Komiti o le Paketi a le maota o sui i le vaiaso nei, e le o lava se tupe e fa’atupe ai le fa’atauina o uila afi fou e 11 mo le Ofisa o Leoleo.

 

O ripoti sa tuuina atu e le Komesina o Leoleo atoa ai ma le Sui Teutupe a le malo, na atagia atu ai i le Komiti o le Paketi le le tutusa o fa’amaumauga o loo tauaaoina e ia ofisa a le malo, ma faia ai loa le fa’aiuga a le Komiti e fa’atali sa latou fa’aiuga se’i vagana ua manino lelei mai ripoti i le aofa’iga o le tupe o loo i ai e fa’atau ai uila afi fou mo Leoleo.

 

O le Komesina o Leoleo, tofa Le’i Sonny Thompson ma le Sui Teutupe a le malo, le Faletua ia Tina Onosa’i Va’a na valaau e molimau i le iloiloga sa valaauina e le Komiti o le Paketi a le Maota o Sui, mo le talanoaina o le mataupu e fa’atatau i le pili a le faigamalo e talosagaina ai le fa’aaogaina o le tupe e tusa ma le $198,621 e fa’atau ai uila afi a Leoleo.

 

E pei ona taua i le tino o le pili taufaaofi mai le faigamalo, e 11 uila afi o le ituaiga fou o le 2018 Harley-Davidson o lo o fuafua e fa’atau mai i le teugatupe a le Ofisa o Leoleo o loo maua mai i le ta’i $10 lea e totogi e tagata uma e ta’usala e le Fa’amasinoga i le le usitaia o tulafono tau ta’avale afi i luga o le alatele.

 

E pei ona taua i le tusi a le kovana ia Lolo Matalasi Moliga sa tuuina atu i le Fono e lagaolagoina ai le pili, o lo o taua ai e fa’apea, e $27,946 le tau o le uila afi e tasi, ae 4 uila afi o loo mana’omia e le Ofisa o Leoleo e fa’atau mai, lea e tusa le tau aofa’i ma le $111,784.

 

Ae i totonu o le tino o le pili lea ua i luma nei o le Komiti o le Paketi a le Maota o Sui, o loo taua ai uila afi e 11 o loo talosaga le malo e fa’atau, o le mafua’aga lea na fesiligia ai e le Ta’ita’ifono o le Komiti o le Paketi a le maota o sui, afioga Vailiuama S. Leasiolagi le afioga i le Komesina o Leoleo, pe fia sa’o le aofa’i o uila o loo mana’omia e lona Ofisa.

 

Na faamanino e Le’i, e 4 uila afi o loo talosagaina e fa’atau, ona fa’aopoopo lea i uila afi o loo i ai nei, ona maua ai lea o uila e 10 e fesoasoani i le galuega a ali’i ma tama’ita’i Leoleo o loo fa’atinoina i le atunu’u.

 

Ina ua fesiligia Le’i i le tulaga o le tupe e fa’atau ai uila afi, na saunoa ai le Komesina e faapea, e tusa ai o le ripoti sa tuuina atu e lana aufaigaluega ia te ia, o loo lava le tupe e fa’atau ai uila afi e fa o loo mana’omia.

 

Ae na taua e le Sui Teutupe e fa’apea, e na o le $103,000 ma ona tupu le tupe o loo i totonu o le teugatupe a le Ofisa o Leoleo o loo fa’amoemoe e fa’atau mai ai uila afi o loo mana’omia, lona uiga e le taitai atoa pe a fuafua atu i le tau aofa’i o uila o loo mana’omia.

 

Na avea le eseese o numera ma moilimau ma itu na faia ai loa e le Komiti le fa’aiuga, ina ia toe tolopo le faia o sa latou faaiuga se’i toe fa’asa’o mai ripoti mai le Komesina ma le Sui Teutupe a le malo.

 

Ae i le talanoaina ai o le tautua a ali’i ma tama’ita’i Leoleo i totonu o le atunu’u, na fa’aleo ai e le to’atele o afioga i Faipule le tulaga mataina ua molimauina i le auaunaga a Leoleo i le taimi nei.

 

Saunoa le Sui Fofoga Fetalai ia Fetu Fetui Jr e fa’apea, o taeao uma lava pe a usu mai i le galuega, na te molimauina ai lava le to’atele o ali’i ma tama’ita’i Leoleo faatasi ai ma ta’avlae ma uila afi o loo tiute i vaega eseese o le auala, ma o se vaaiga lea ua atagia mai ai le siitia o le tulaga ua i ai le tautua a le Ofisa o Leoleo.

 

Na taua e isi Faipule le agaga fa’afetai, ona o le auala o loo faamalosia ai tulafono i luga o le alatele, e le gata i le lelei ae ua vaaia fo’i le galulue fa’atasi o Leoleo ma le atunu’u.

 

O ni isi o manaoga e pei ona tuuina atu i le Komesina, o ni uila afi mo le Ofisa o Leoleo i Fagaitua, e pei ona saunoa i ai le afioga i le ali’i Faipule ia Lavea Fatulegaee P. Mauga, atoa ai ma le siitia o tulaga o Leoleo i Manu’a e pei ona talosagaina e Fetu.

 

Saunoa Le’i e fa’apea, o itu uma lava ia o loo galulue i ai le Ofisa ma le fa’amoemoe o se taimi o lenei tausaga e fa’atinoina ai nei suiga uma mo le siitia pea i luga o le auaunaga a Leoleo i le atunu’u.