Na atagia i le saunoaga fa’auilavea a le afioga i le ali’i faipule ia Lavea Fatulegae’e Palepoi Mauga i le taeao ananafi, lona le mana’o e faitio lava se isi faipule i fuafuaga fa’ataoto a le afioga i le ali’i kovana ma le faigamalo, tusa lava poo ni mataupu e fia malamalama i ai afioga i Faipule o loo fai ma sui o tagata palota ma le au totogi lafoga i le atunu’u.

“Aua tatou te faitio i le ali’i kovana ma le faigamalo, o galuega ma atina’e e pei ona fesiligia e ni isi o faipule, e le o ni galuega na nonofo lava Ofisa a le malo ma fai, ae o atina’e na fa’atulaga ma fuafua e le ali’i kovana, e le tatau la ona tatou faitio i le malo aua o tatou lava o le malo, aua fo’i le soona tu’ulafoaia saunoaga o loo fa’alogologo mai le au fa’asalalau”, o le saunoaga lea a Lavea e tali fuaitau atu ai i le saunoaga a le afioga i le ali’i faipule ia Faimealelei Anthony Fu’e Allen, lea na fa’aleo i le taimi o folafolaga a le maota o sui e fa’atatau i le tulaga o lo o i ai le mataupu i masini e su’e ai container ma uta mai fafo (Rapiscan), lea e oo mai lava i le taimi nei e le o mafai lava e Ofisa o le malo ona latou fa’amaninoina mai lenei mataupu.

Na taua e Faimealelei i lana saunoaga i le taeao ananafi le fa’atele lea ona ia tula’i i lenei tausaga ma fesiligia le mataupu e fa’atatau i Rapiscan, ona o loo maitauina pea le tele o se fa’aletonu o loo tula’i mai ai i le mataupu lea, ae tatau ona aami Ta’ita’i o Ofisa a le malo o loo gafa ma le fa’atinoina o galuega e fa’aaoga i ai masini, se’i oo mai e fa’amalamalama i le maota tulaga o le galuega.

“Aua le fa’amoea tatou i se tala lata mai e fa’atatau i masini ma le fa’aaogaina, ae tatau ona aami Ta’ita’i o Ofisa e oo mai se’i o tatou talanoa ma fetufaa’i i le tulaga tonu o loo i ai masini nei, aua afai o lea ua faalogo atu i le lavelave o isi mau fa’amatalaga e fa’atatau i le tele o le uafu e mana’omia ona i ai ina ia mafai ai ona fa’aaoga masini nei, lona uiga la e le o mulimulita’i tatou i le tulafono”, o le saunoaga lea a Faimealelei na mafua ai loa ona tula’i le afioga i le alii faipule ia Kitara Vaiau, o ia le ta’ita’ifono o le Komiti o le Pulega o Uafu ma Malaeva’alele, ma fa’atulaga loa le iloiloga e faia i le itula e 11:00 i le taeao o le aso Lulu o le vaiaso nei, lea o le a oo mai ai le Fa’atonusili o Pulega o Uafu ma Malaeva’alele faapea ai ma le Teutupe a le malo e molimau.

Na tula’i le afioga a Lavea ma fa’auilavea i le saunoaga a Faimealelei, atoa ai ma lona taumafai e fa’atonu le afioga ia Kitara i molimau sa’o e tatau ona valaau mo le iloiloga. Sa ia taua e fa’apea, e leai se mafu’aaga e valaau ai fua le Fa’atonusili o le Pulega o Uafu ma Malaeva’alele i le iloiloga, e le o i ai sana vaega e faia i masini Rapiscan, o le galuega lena a le Teutupe ma le Pule o le Ofisa o Tiute.

Sa ia taua fo’i le le tatau lea i se faipule ona faitio i le faigamalo ma le ali’i kovana, ae tatau ona galulue fa’atasi vaega e lua mo le manuia o le atunu’u.

Na fa’asa’o e le sui fofoga fetalai ia Fetui Fetu Jr le saunoaga a Lavea, ma ia taua ai le leai o se malosi o le isi faipule na te taumafai e fa’atonu pe a’oa’i le isi faipule i totonu o le maota.

“E le a’oa’ia e le isi faipule le isi faipule i soo se taimi e saunoa ai, e tonu lava le afioga i le sui mamalu i lona finagalo, e le o i ai fo’i se tulaga o fa’aletonu ai le saunoaga a le afioga ia Faimealelei e uiga i lenei mataupu, aua i lo tatou talionuga, e i ai lava fo’i taimi e sese ai le afioga i le ali’i kovana, e le sa’o pea lava i taimi uma, ae o le aoga lena na filifilia ai e le itumalo le faipule, ina ia saunoa ma fa’aleo mataupu e manuia ai le itumalo”, o le saunoaga lea a le sui fofoga fetalai sa lagolagoina e le afioga i le tama’ita’i faipule ia Vui Florence Saulo ma le afioga i le ali’i faipule ia Gafatasi Afalava.

Na taua e Vui e le a’oa’ia e le isi sui mamalu le isi sui mamalu, ae na saunoa Gafatasi e fa’apea, o loo i ai lava i le faipule le faitalia e saunoa ai, pau le tulaga e tatau i sui mamalu ona silasila toto’a i ai, ia saunoa mamalu ma ia silasila i le mamalu o le fono, atoa ai ma le taula’i o a latou saunoaga i le anavatau a le Fono Faitulafono na mafua ai ona fa’avae, o le fausia lea o tulafono mo le manuia o le malo.

Na taua e ni isi o afioga i faipule i le Samoa News ina ua mae’a le tauaofiaga ananafi, o latou lagona le fiafia i le auala na fa’aalia ai e le afioga a Lavea lona finagalo i luma o le maota, ma taumafai ai e puipui le afioga i le ali’i kovana.

“Ua atagia mai i lona finagalo sa fa’aalia o ia o le sui o le kovana i luma o le Fono, ma afai o le tulaga lena, lona uiga e le tatau ona galue i le Fono, ae tatau ona galue i le Ofisa o le kovana. O loo manino fo’i le Fa’avae o Amerika Samoa, e 3 vaega mavaevae o le faigamalo, o le mafua’aga lena e mana’omia ai le metotia o le fesiligia e le isi Vaega o le faigamalo o galuega a le isi Vaega, ina ia mautinoa o loo paleni le fa’atinoina o galuega”, o le saunoaga lea a se tasi o faipule.

Ae na saunoa le isi faipule e fa’apea, e mafua ona fesiligia so’o le mataupu e fa’atatau i Rapiscan, ona o tupe a tagata totogi lafoga lea ua toe totogi ai tupe o le Pone a le malo lea sa fa’atau mai ai e le kovana ma lana faigamalo masini nei mai fafo, e i ai fo’i le aia o tagata totogi lafoga latou te malamalama ai i auala e fa’aaoga i ai a latou tupe.