Ads by Google Ads by Google

CPL. Sitivi Faiai - Vetereni sa tautua i le US Marines


Vetereni a le US Marines Corporal Faiai, Sitivi mai Matuu ma Olosega Manu'a. [ata: Leua Aiono Frost]

O se tasi i alo o le atunuu ua mae'a lana tautua i le US Marines, ma o i latou sa fili fa'apitoa mai Ametika Samoa i le tausaga e 1973, Corporal Faiai, Sitivi, sa ia toe tau manatunatu i le o'oo'oga o le taua i Vietnam sa ia va'aia.

 

"O le taimi na amata ai le auaunaga i le Maligi Koa, e le'i faigofie i le va'ai i le to'atele o tagata ua sulufa'i ese mai le malo o Vietnam, o i matou la nei sa o atu i va'a ina ia la'u eseina mai le anoanoa'i o i latou, ua manatu Amerika e ao ina latou toe tu'uina i ai se avanoa e nofo lelei ai i o tatou laueleele, ona o a'afiaga o latou lotoifale i le taua na sili ona to'atele ai fitafita Amerika na maliliu ai,” o se amataga lea a Faiai e tusa o lana tautua mo le 8 tausaga i le US Marines.

 

"Na matou o atu i va'a fa'aopeopea atu i tai, ae la'u mai tagata i nai va'a laiti o lea malo, sa va'aia le mativa, o le faigata ona maua o se mea'ai, o le tele o tagata manunu'a ona o le taua, o fanau talavou ua leai ni aiga,” o a Faiai lea.

 

O Faiai, mai Matuu ma Olosega i Manu'a, o se sui muamua lea o le latou aiga e tauto i le Vaega Au, ma sa ia fa'ailoa ai, e le'i faigofie fo'i i nai ona matua lona matu'u ese atu mai lo latou aiga. O ona matua o Tuilape Faiai mai Matuu ma Olosega ma Suluiale'ese Toilolo Faiai mai Malaeloa.

 

O lo'o avea nei o ia ma totino o le Vetereni mo Taua i atunu'u ese, po'o le Veterans of Foreign Wars [VFW]. Sa aoga ma faauu mai i le Samoana High School i le tausaga e 1972 ma Tauto ai loa i le US Marines, o se tasi o le to'a 60 o i latou na fa'atauto. O nisi sa latou auai fa'atasi e aofia ai le susuga Tusi Suiaunoa ma i latou o lena vaitausaga.

 

Ua fa'aipoipo atu o ia i le tina o le aiga, Seulata Sauvao Faiai ma e to'a fa o la'ua alo. E to'atasi lava le teine ae to'atolu tama. O le tasi o tama o Luis Faiai, o lo'o avea ma Faife'au i le Ekalesia Aso Fitu o le Toe Afio mai i San Francisco.

 

O le lona lua o fanau tama o lo'o avea ma Leoleo i le Falepuipui i Witchita Falls i Texas ma le ali'i lona tolu o tama o Larry Byrd Faiai, lea e fa'aigoa i le ali'i ta'uta'ua i le pasiketipolo,  o lo'o tautua i le US Army ma o lo'o i ai nei i Iraq, ae o lo'o fa'amautu i le nofoaga a le US Army i Fort Polk i Lousianna.

 

"Peita'i o lo'u afafine lava e to'atasi, o ia lava lea e nofo mai i ma'ua tafatafa, o lona lea tofi ma e igoa fo'i i si o'u tina Sulufale'ese Faiai,” o se tala 'ata lea a le ali'i Vetereni.

 

"E taua ia te a'u lenei aso, ina ia manatua ai le tautua a i latou na o ae le'i toe fo'i mai i le malu o latou aiga, o i latou ia e mautinoa, e tele na'ua lo latou sao i le saogalemu ma le filemu ua tatou se'e ai i ma'a o malie. Fa'afetai mo i latou,” o a Faiai lea.

 

"O i matou fo'i ua toe taliu mai ma le manuia ma fa'atasi ma aiga, avea i matou ma sui e fa'afetaia le tapua'iga, fai pea ma molimau i na vaitaimi i le tautua toto ma le tautua tuavae sa alofaiva uma i ai fitafita o le Iunaite Setete ma ona Teritori, ina ia tausia le filemu i nu'u ese, ae maise ia le ofi mai taua ma fevaevaea'iga i lotoifale o si tatou malo."

 

"E manatua pea le tautoga e o'o i le oti, pe afai e tua ma ni a lenei auaunaga. O lo'o fa'aauau pea lenei tautua a alo talavou o lo'o i ai pea i so'o se nofoaga ale Vaega Au, ia te outou, fa'amalo le tautua, ma ia outou maua le alofa ma le agalelei o le Atua, e malutia ai outou se'ia o'o ina tou toe taliu mai i fanua ma le manuia. Fa'afetai mo lo'u avanoa,” o sana toe upu ia ma loimata, aua o lo'o ia nofo tapua'i ma le tatalo, ina ia manuia ma saogalemu faiva o si ona alo o Larry Byrd Faiai o lo'o i tafa o taua i Iraq.