Ads by Google Ads by Google

Avea atina’e tetele ma auala e toe fo’i ai to’atele tagata i Manu’a


Ni isi o le itumalo o Manu’a i le taimi na la’u ai a latou uta ina ua fa’atoa taunu’u le malaga a le va’alele o le Polenisia i le malae va’alele i Fitiuta [ata AF]

Ni isi o le itumalo o Manu’a i le taimi na sauni ai e malaga mai i le va’alele o le Polenisia mai Fitiuta mo Tutuila. [ata AF]
ausage@samoanews.com

“O le motu lenei ma eleele o lo o matou nonofo ai, o lo matou tofi lea mai le Atua, ae ua mafua ona tuua e le to’atele o tagata Manu’a o latou tofi ma lo latou fa’asinomaga mai le Atua, ona o le sailiina o manuia mo aiga, ae afai o lea ua vavala mai fa’amanuiaga e ala i le tele o atina’e ua fuafua le malo e fausia i totonu o le Itumalo, ou te ta’utino atu, o le a to’atele tagata Manu’a o le a toe fo’i mai i o latou aiga i le lumana’i”, o le saunoaga lea a se tasi o Tama matua mai Faleasao i le mae’a ai o le sauniga e tatala aloaia ai le galuega tele lea sa fausia e le Ofisa o le Pulega o le Eletise ma le Suavai (ASPA), o le faaaoga lea o le malosi e maua mai i le La e gaosi ai le eletise.

 

E ui e le i to’atele ni isi o le itumalo na maua le avanoa latou te molimauina ai le tatalaina o le ulua’i galuega lenei i Manu’a fa’apea ai totonu o le teritori atoa o Amerika Samoa, peita’i o sui na mafai ona auai i le molimauina o lenei sauniga taua, sa latou fa’ailoa i le Samoa News le fa’agae’etia o i latou ina ua mafai ona fa’ataunu’uina ma le manuia lenei fa’amoemoe ua tele tausaga o tau fuafua mai.

 

Na taua e le Tina matua ia Asenati Ale i le Samoa News lona agaga fiafia ina ua amata ona ia molimauina ni isi o atina’e tetele i totonu o le Itumalo, talu mai le tele o tausaga na soifua a’e ai i Manu’a.

 

“E le tairai fa’atusatusaina Manu’a ma Tutuila i tulaga o atina’e, e saoasaoa atu le olaga aemaise ai o tulaga tau i le atina’e o pisinisi, aiga ma le malo i Tutuila nai lo Manu’a, o le mafua’aga fo’i lena ua tuua ai e le to’atele o aiga Manu’a e aofia ai ma lo’u aiga eleele ma aiga i le itumalo, ae malaga atu e aumau i Tutuila ona o le naunau lava ia mafai ona maua le tele o tautua e le o mafai ona oo mai i Manu’a, peita’i o suiga ua vaaia i atina’e i le taimi nei i totonu o le itumalo, ua lagona ai le malosi o le loto e fa’aauau pea ona nofo i Manu’a, o lo matou tofi na auina mai e le Atua”, o le saunoaga lea a le Tina ia Ale.

 

Ina ua fesiligia e le Samoa News ia Ale na te fa’ailoa ni isi o atina’e fou ua mafai ona fausia i Manu’a, na soisoi le Tina matua ma ia saunoa e fa’apea, “Ua tofu galuega le tele o tagata Manu’a, ua tatalaina uma fo’i iinei (Manu’a) tautua a Ofisa ma Matagaluega eseese uma lava a le malo o lo o i Tutuila, aemaise ai ua faigofie auala o femalagaaiga i totonu lava o le itumalo i le taimi nei, ina ua tele ta’avale a Ofisa o le malo aemaise ai ni isi o aiga e fesoasoani ai i aiga lima vaivai e pei o lo’u aiga e le o maua se ta’avale”.

 

Ae ina ua fesiligia Ale i sona finagalo e fa’atatau i le galuega tele lea fa’atoa tatalaina i le vaiaso nei i Faleasao, e fa’aaoga ai le malosi o le La e gaosi mai ai le eletise mo le Faletolu i Manu’a, na tutulu le Tina ma saunoa e fa’apea, “O ai ea Manu’a ua manatu mai ai le malo ma ona ta’ita’i. Ou te iloa e le faigofie lenei atina’e, o se galuega fo’i ua vavala mai ai se tasi o fa’amama avega mo aiga Manu’a, ona o lea ua maua tala o le a fa’aitiitia ai i lalo le tau o le eletise, ma ua saga faigofie ai lava le olaga i le Itumalo”.

 

Ae ina ua toe fesiligia e le Samoa News le Tina ia Ale mo sana fautuaga i tagata o le itumalo o Manu’a o lo o alala ma aumau i Tutuila, na soisoi le Tina ma ia saunoa e fa’apea, “O lea ua aumai e le malo atina’e uma o lo o maua i Tutuila na mafua ai ona outou tuua aiga, nu’u ma lo tatou fa’asinomaga mai le Atua, ona o le fia maua o atina’e nei o aiga ma fanau, o la’u fautuaga, tagata Manu’a uma, ia toe fo’i mai e tausi fa’apelepele lo tatou itumalo na aumai e le Atua, o lo tatou fa’asinomaga fo’i lea”.

 

O ni isi o suiga na molimauina e le Samoa News i le Faletolu i Fitiuta, Ta’u ma Faleasao, ina ua maua le avanoa e auai i le tatalaina o le galuega tele a le ASPA i Faleasao i le vaiaso nei, o le tele o ta’avale a Ofisa eseese o le malo ua i ai nei i Manu’a, e fesoasoani i le tautuaina o tautua mo tagata o le itumalo, ma o ni isi o nei ta’avale o lo o mafai ona fesoasonai mo tagata o le itumalo, e pei ona taua e ni isi o taulele’a mai Faleasao.

 

“O le tulaga masani lava lenei ua leva ona sau ai Manu’a mai le tele o tausaga ua mavae, o ai lava le Ofisa a le malo e i ai la latou ta’avale iinei i Manu’a, o le ta’avale lava lena e fesoasoani ai i soo se tagata Manu’a e fia maua se fesoasoani, o lea fo’i la ua tele mai isi ta’avale fa’aopoopo, e le o mafai ai lava ona taofia lea galuega lelei a le malo mo Manu’a, aua e talitonu tagata Manu’a, o i matou uma lava o le aiga e tasi, e sili atu nai lo o se itumalo”, o le molimau lea a se tasi o taule’ale’a mai Faleasao.

 

E le gata i Tama ma Tina matutua sa latou fa’aalia le agaga fiafia ona o suiga tetele ua vaaia i Manu’a i le taimi nei, ae na o o lava fo’i i ni isi o Tupulaga fa’apea ai Talavou a le Itumalo, sa latou fa’aleoina fo’i le agaga fiafia ma le fa’afetai i le malo, ina ua mafai ona si’itia tulaga tau i le atina’e i Manu’a.

 

Na taua e se tasi o ali’i le tele o suiga ua mafai ona latou molimauina i totonu o le itumalo i le taimi nei, talu ona fausia le tele o atina’e ma galuega tetele i Manu’a.

 

“O le ola a le “WIFI” i Manu’a nei e le fesiligia, pei lava o lo o e fealua’i i Tutuila poo isi fo’i setete o le malo tele, tofu telefoni le to’atele o tupulaga toe maua fua le “wifi” mai ni isi o Ofisa a le malo iinei, ma ua atili faigofie ai le olaga i Manu’a”, o le sagisagi fiafia mai lea a le ali’i o Faletolu Viliamu ma lana molimau.

 

Na taua e se tasi ali’i faigaluega a le ASPA sa auai i le fausiaina o le galuega tele lea ua tatalaina nei i Faleasao e fa’apea, o le taua o lenei galuega ua mafai ai ona fausia se sootaga vavalalata i le va o tagatanu’u o le Faletolu ma sui o le konekarate mai Amerika sa matou fausia le galuega, faapea ai i latou sa fesoasoani i le fausiaina o lenei galuega.

 

Na taua e le pule o le konekarate o le Solar City sa fausia lenei galuega tele, susuga Jon Yoshimura e fa’apea, “O le galuega ua tatalaina nei i le Faletolu i Faleasao, Ta’u ma Fitiuta, o le galuega sa fausia lava e tagatanu’u o le Faletolu, o le latou malosi sa fausia ai lenei galuega, o le latou tomai na tu’u fa’atasia ai lenei galuega, e ala i le fesoasoani a le aufaigaluega a le Solar City”.