Avea Amerika Samoa ma sui Ofisa fa’asoaina fa’amatalaga Pasefika


Le taimi na tauaao atu ai e le Komesina o Leoleo a Samoa, afioga Fuiavailiili Egon Keil, o ia fo’i lea o le Taitaifono o le Fa’alapotopotoga e faia aoaoga i auala e taofia ai solitulafono i le pasefika (PTCN) se meaalofa i le Lutena Kovana ia Lemanu Palepoi Mauga, i le mae’a ai lea ona tatala aloaia o le Ofisa e fa’asoaina fa’amatalaga (AS Transnational Crime Unit Office) a le atunu’u, lea na tatalaina i le taeao ananafi i Fagatogo. [ata AF]

Komesina o Leoleo a Samoa ma Amerika Samoa ia Fuiavailiili Egon Keil ma le tofa ia Le’i Sonny Thompson, fa’apea ai ma sui o le Ofisa o Leoleo i Amerika Samoa, aemaise ai le Faatonusili o le Matagaluega o le Puipuiga o le Saogalemu Faalotoifale ia Samana Semo Ve’ave’a, fa’apea ai le sui o le Ofisa o Leoleo mai Ausetalia ia Philip Eagles. [ata AF]
ausage@samoanews.com

O le tatala aloaia ai o le Ofisa o le Transnational Crime Unit Office (TCU) a Amerika Samoa i le taeao ananafi, i lona nofoaga autu i Fagatogo, le fale o loo sosoo ma le Ofisa autu o Leoleo, ua aloaia ai le avea o Amerika Samoa ma sui o Fa’alapotopotoga o atumotu o le Pasefika o loo galulue i le fetufaa’iina o fa’amatalaga e fesoasoani ai i le puipuia o solitulafono e aafia ai atumotu ma tagatanu’u.

 

O le tatalaina ai o le Ofisa o le TCU a Amerika Samoa i le taeao ananafi, e le gata ua atoa i ai lala o le TCU ua tatalaina i atumotu eseese e 16 i le Pasefika, ae ua aloaia ai loa fo’i le avea o Amerika Samoa ma totino o lenei Fa’alapotopotoga a le Pasefika (PTCN).

 

O le afioga i le Lutena Kovana a le malo ia Lemanu Palepoi Mauga na saunoa e fa’afetaia le avanoa ua avea ai Amerika Samoa ma totino o lenei Fa’alapotopotoga, atoa ai ma lona ootiina o le lipine e aloaia ai le tatalaina o lenei Ofisa taua.

 

Ao lumana’i ai le ootiina o le lipine, na fa’afetaia e Lamanu le avanoa ua mafai ai ona tatalaina le lala o le Ofisa o le TCU i Amerika Samoa, aemaise ai o le avanoa ua mafai ai ona avea Amerika Samoa ma totino o lenei Faalapotopotoga taua.

 

“Ia aoga lenei Ofisa e mafai ai ona faia gaioiga uma e puipuia ai le saogalemu o tagatanu’u o Samoa aemaise ai o le pasefika”, o le saunoaga lea a Lemanu ma ia ootiina loa le lipine.

 

E to’alua tama’ita’i Leoleo o loo galulue i le fa’atautaia o le Ofisa o le TCU a Amerika Samoa, lea e aofia ai Sgt. Jackie Lagai o loo avea ma Ta’ita’i, ma lona fesoasoani ia Det. Gaui Seanoa.

 

O masini ua mafai ona fa’aaogaina e fa’atino ai galuega a le Ofisa e aofia ai computers, sa fa’atupeina uma mai e le Ofisa o Leoleo a Ausetalia (Australia Federal Police - AFP), e pei ona fa’amaonia mai e le sui o le AFP sa i ai i le taimi o le sauniga e tatala aloaia ai lenei Ofisa, susuga Phil Eagles.

 

Na taua e le afioga i le Komesina o Leoleo o le malo o Samoa, afioga Fuiavailiili Egon Keil, o ia fo’i lea o le Taitaifono o le Faalapotopotoga a atumotu o le Pasefika e tete’e atu i faiga fa’asolitulafono fa’asaga i tagatanu’u o le pasefika (PTCN), o le tausaga e 2002 na tatalaina ai le ulua’i lala o le TCU i Fiti, ma fa’asolo mai ai lava seia oo mai i le tausaga e 2007 na suia mai ai loa le Ofisa Tutotonu o le TCU i Apia, Samoa, lea e oo mai lava i le taimi nei o loo i ai pea i Samoa.

 

O le taimi nei, ua atoa le 16 o atumotu o le Pasefika ua tatalaina ai lala o le TCU e aofia ai ma Amerika Samoa, ae ua tusa nei ma le 22 le aofa’i o lala o le TCU ua tatalaina i le Pasefika, ma o ni isi o atunu’u e ta’i 3 lala o le TCU o loo tatalaina ai e pei o Ausetalia, Fiti ma Vanuatu.

 

Saunoa Fuiavailiili e fa’apea, o le auau ua mafua ai ona tatalaina lala o le TCU i le pasefika, ina ia mafai ai ona fetufaa’i e Ofisa o Leoleo fa’amatalaga e fa’atatau i tulaga tau solitulafono, ina ia mafai ai ona vave gaioiga mo le puipuiga o le fa’atuputeleina o nei solitulafono.

 

O se tasi o lu’itau o loo fetaia’i ma le Ofisa o Leoleo i Samoa e pei ona saunoa Fuiavailiili, o le taumafai lea e fa’aitiitia le tele o faiga fa’asolitulafono e aofia ai fualaau fa’asaina o loo alia’e mai i nofoaga i nu’u i tua i Samoa.

 

“E tele naua mataupu e tatau ona tatou fetufaa’i ma talanoaina i luga o le polokalame lenei, aemaise lava i mataupu e fa’atatau i le saogalemu o le pasefika atoa, o le mafua’aga lena e taua ai lenei ofisa, ua mafai ai ona vave fesootaiga i le tufatufaina o fa’amatalaga taua ma le aoga mo le puipuiga o le ola ma le saogalemu o tagata”, o le saunoaga lea a Fuiavailiili.

 

“O loo i ai le fa’amoemoe e tatalaina isi lala fou o le TCU i isi vaega o le pasefika e pei o Guam ma Niu Kaletonia, ma o loo fa’aauau pea ona matou galulue ma le lala o le puipuiga a le malo tele o Amerika i le tau fa’amautuina o nei fuafuaga uma”, o le saunoaga lea a Fuiavailiili.

Comment Here