Ads by Google Ads by Google

Avea ‘ava malosi ma fa’apogai tele o solitulafono eseese


[ata: SN]
ausage@samoanews.com

E foliga mai o le ‘ava malosi le fa’apogai o le tele o solitulafono eseese o lo o mafua ai ona molia ni isi o tagatanu’u ma tutula’i ai i luma o le Fa’amasinoga.

 

Mai i le silia i le to’a 10 i latou na taofia e Leoleo ma tutula’i ai i luma o le Fa’amasinoga Fa’aitumalo i le vaiaso nei i solitulafono eseese, o le to’a 8 o i latou nei sa a’afia le ‘ava malosi i le taimi na fa’atinoina ai a latou solitulafono.

 

VINCENT AUKUSITINO

 

Na taofia mai e Leoleo le ali’i o Vincent Aukusitino i le moliaga o le tu fua i le fanua o le isi aiga faapea ai ma le faatupu vevesi i nofoaga faitele. Na ‘ona Aukusitino i le taimi na tula’i mai ai le fa’alavelave e pei ona tu’uaia ai o ia e le malo.

 

O se fiafia a se aiga sa faia i Leone i le vaiaso na te’a nei, na tula’i mai ai se vevesi ma taofia faapagota ai loa e Leoleo ia Aukusitino. Na taua e le aiga i Leoleo e fa’apea, ao fa’aauau le fiafia o le aso fanau, na fa’afuase’i ona afe atu le ua molia e fia auai, ma sa faapea fo’i ona talia e le aiga le auai atu o le ua molia.

 

A o fa’agasolo le fiafia o le aso fanau, na fa’afuase’i ona faatupu e le ua molia le vevesi, ma faatonuina ai loa o ia e alu ese ma le fanua. Na tuua e le ua molia le fanua peita’i na toe fo’i ane ma amata loa ona ia fa’atupu ni gaioiga e save’u ai le nonofo filemu o le aiga, ma logo ai loa e le aiga Leoleo mo se fesoasoani.

 

E $500 le ua faatulaga e totogi ona faatoa mafai lea ona tatala le ua molia. Afai e mafai ona tatala le ua molia, ua faasa ona ia toe tu i le fale poo le fanua o le aiga na a’afia. Ua faasa fo’i ona ia toe tagofia le ‘ava malosi pe na te toe soli se tulafono a le malo.

 

TU’UAIA SE ALI’I I LONA FA’AOOLIMA I LONA TO’ALUA

 

O le ali’i lea na tu’uaia i lona fa’aoolima i lona to’alua, ua poloaina e le fa’amasinoga o ia e aua ne’i toe alu i le fale o loo latou nonofo ai ma lona to’alua ma lana fanau, a ia saili se isi nofoaga e nofo ai mo le taimi nei ao fa’agasolo taualumaga o lana mataupu.

 

O le vevesi na tula’i mai i Utulei i le faaiuga o le vaiaso na te’a nei, ina ua ‘ona atu le ua molia ma fa’aoolima i lona to’alua i luma o lana fanau. O le faalogoina ai e aiga tuai o le vevesi, na latou logoina ai loa Leoleo ma mafua ai ona taofia le ua molia i le toese.

 

Na taua e le fafine na a’afia i Leoleo, e le o se taimi muamua lea ua faia ai e lona to’alua lenei gaioiga ia te ia, o le fasi o ia i soo se taimi e ‘ona atu ai i le fale.

 

Na avea le ita o le ua molia ina ua manava atu e leai se meaai ma itu na tauupu ai ma lona to’alua, seia oo lava i lona aapa atu ma futi mai lona ulu ae tatu’i ona foliga i luma o lana fanau. Na taumafai le fafine e sola ese peita’i na taofi e le ua molia o ia ae fa’aauau pea ona ia faaoolima ia te ia.

 

Na teena e le ua molia moliaga o le faaoolima i le tulaga tolu ma le faatupu vevesi i totonu o lona aiga ua molia ai o ia e le malo, ma ua toe faatulaga lana mataupu e valaau i le masina fou.

 

O ni isi o tuutuuga ua tatala ai o ia i tua, o le fa’asa lea ona toe nofo i le latou fale ma lona aiga, faasa ona ia toe tagofia le ‘ava malosi pe toe soli se tulafono a le malo, a ia avea o ia ma tagatanu’u e tausisi i tulafono a le malo.