Ads by Google Ads by Google

Ave fa’amuamua Leoleo i le aveesea fualaau fa’asaina totonu aoga


Le Komesina o Leoleo ia Le’i S. Thompson ma le afioga i le Mauputasi ia Mauga Tasi Asuega i le iloiloga e fesiligia ai faafitauli o fualaau fa’asaina i totonu o aoga sa faia i luma o le Senate i le masina o Aperila na te’a nei. [ata AF]

Vasega lona 25 a Leoleo lea ua fa’amoemoe e fa’auuina i se taimi o le masina fou o Iuni. [ata AF]
ausage@samoanews.com

A saili se isi vaega ua manatu le afioga i le Komesina o Leoleo e ave i ai le fa’amuamua a le Matagaluega o Leoleo i le taimi nei, o le taumafai lea e faia gaioiga uma ina ia aveese mai ai fualaau fa’asaina mai totonu o aoga eseese uma i le atunu’u.

 

I se fa’atalatalanoaga ma le tofa Le’i Sonny Thompson i lona Ofisa i le vaiaso na te’a nei, na fa’aalia ai e le Komesina o Leoleo i le Samoa News lona fa’anaunauga ina ia foia muamua le fa’afitauli e fa’atatau i fualaau fa’asaina i totonu o aoga.

 

“E le o taitai lava Leoleo e fa’atinoina le galuega i le taimi nei, ae o le sini autu lea ua ou manatu e ave i ai le fa’amuamua, o le taumafai lea ina ia aveesea mai fualaau fa’asaina mai totonu o aoga, ma ua i ai fo’i fuafuaga ua uma ona fa’ataoto e foia ai lea tulaga”, o le saunoaga lea a Le’i.

 

O fuafuaga e pei ona saunoa le Komesina o Leoleo, e aofia ai le tofu o Leoleo ma le Aoga Maualuga e tiute ai i aso ta’itasi, ina ia mafai ai ona fesoasoani i le tau foiaina o fa’afitauli o lo o tutupu i totonu o aoga ma a’afia ai fanau aoga.

 

“E i ai Leleo e to’a 8 e tofia mai i le Vasega lona 25 a Leoleo o loo fa’agasolo i le taimi nei, e galulue i aoga eseese i le atunu’u ina ia foia ai le fa’afitauli e fa’atatau i fualaau fa’asaina, e le o taitai lava Leoleo o lo o i ai e fa’atinoina le galuega, ae fa’afetai i le tofa a Leseiau Laumoli ma lona Ofisa mo le vaega tupe ua mafai ai ona fa’atupe le Vasega lona 25 a Leoleo o loo fa’agasolo i le taimi nei, peita’i ua i ai le fuafuaga matou te toe talosaga i ai mo se isi tupe e fa’atupe ai le Vasega lona 26 a Leoleo i se taimi e le o toe mamao”, o le saunoaga lea a Le’i.

 

O le Ofisa o loo Puipuia Tulaga Tau Solitulafono (CJPA) lea o lo o avea ai le tofa a Laumoli ma Fa’atonusili, o iina o lo o auala mai ai le alagatupe lea o lo o fa’atupe ai le Vasega lona 25 a Leoleo.

 

I le tulaga o fualaau fa’asaina, na taua e le Komesina le le toe i ai lea o ni isi tala poo ni fesili e tau su’esu’e ai le fa’afitauli ua i ai, ae ua oo i le taimi ua tatau ai ona faia se gaioiga e foia ai le fa’afitauli.

 

“Ua leva ona i ai le fa’afitauli tau i fualaau fa’asaina i totonu o aoga, ma ua matou malamalama fo’i i ai i le tulaga lena, pau la matou fa’amatalaga i le atunu’u, e le o se tau fa’afefe, ua matou galulue e saili i latou uma o lo o faia lea tulaga i fanau aoga ina ia molia ma fa’asalaina e tusa ai ma le tulafono”, o le saunoaga lea a Le’i.

 

“E taua tele le momoli atu o le feau lenei i le atunu’u, ae maise lava i latou o lo o faia lenei galuega le alofa o le tu’uina atu o fualaau fa’asaina i fanau aoga. E taua tele i le atunuu fanau aoga aua o le lumana’i lea o aiga ma le malo, afai e afaina o latou mafaufau i fualaau fa’asaina, o le a afaina fo’i le lumana’i o aiga ma le malo, o le tiute la o Leoleo o le puipui o fanau mai le a’afia i nei faiga le alofa”, o le saunoaga lea a Le’i.

 

E lei mamao atu nei se fa’alavelave na tula’i mai i le aoga maualuga i Fagaitua, ina ua tu’uaia le maua o vaega o fualaau fa’asaina i ni isi o fanau aoga, ae ina ua fesiligia e le Senate Pule Aoga o Aoga Maualuluga uma i se iloiloga faapitoa sa faia, po o i ai le fa’afitauli o fualaau fa’asaina i totonu o latou aiga, na tau fai saunoa ai i latou, “ioe o lo o i ai le fa’afitauli o fualaau fa’asaina i totonu o latou aoga, ma o se fa’afitauli fo’i ua tele tausaga o i ai”.

 

I le fa’aa’upegaina o ali’i ma tama’ita’i Leoleo i le tomai e su’esu’eina ai mataupu e fa’atatau i fualaau fa’asaina, ua talia e le Ofisa o Leoleo i Honolulu se talosaga sa tu’uina atu e le Komesina o Leoleo a le atunu’u, mo ni o latou sui e malaga mai e fa’atautaia ni aoaoga e fa’atatau i le sailiina atoa ai ma le aveese mai o fualaau fa’asaina i totonu o aoga fa’apea ai luga o le alatele ma le atunu’u atoa.

 

Na fa’amaonia mai e Le’i i le Samoa News, e le o toe mamao ae taunu’u mai sui o le Ofisa o Leoleo a Honolulu mo le fa’atinoina o lea aoaoga i le atunu’u.