Ads by Google Ads by Google

Asia Ta’ita’i malo gasegase o loo i le falema’i i Fagaalu


Le afioga i le Lutena Kovana ia Lemanu Peleti Mauga i le taimi na ia asia ai se Tama o loo taofia i le falema’i i Fagaalu i le aso Lulu na te’a nei, na ofo atu i ai se meaalofa ma upu faamalosiau e fai ai o ia ma sui o le afioga i le ali’i kovana ia Lolo Matalasi Moliga. [ata AF]

Se tasi o Tina matua sa ia fa’aleo ana fa’amanuiaga i le faigamalo mo le toe tula’i mai i le ta’ita’iina o le malo mo le isi 4 tausaga, i le taimi na asia ai o ia e le afioga i le Lutena Kovana ia Lemanu Peleti Mauga i le aso Lulu na te’a nei, i le taimi o le asiasiga masani a le malo i le falema’i i vaitau fa’ai’u lenei o le tausaga. [ata AF]
ausage@samoanews.com

O le taeao o le aso Lulu na te’a nei na fa’ataunu’uina ai le asiasiga masani a Ta’ita’i o le malo i nofoaga o loo ai i latou o loo a’afia i gasegase o le tino, e pei o le nofoaga o le Hope House i le Fatuoaiga i Tafuna, faapea ai ma le falema’i i Fagaalu, ma ofo atu i ai meaalofa atoa ai ma upu fa’alaeiau e fa’amalosia ma fa’alototele ai i latou o loo a’afia i gasegase o le tino.

 

O le itula e 8:00 na amata mai ai le asiasiga a le malo i le Hope House, sosoo ai loa ma le falema’i o le LBJ i Fagaalu, i lalo o le ta’ita’iga a le afioga i le Lutena Kovana ia Lemanu Peleti Mauga ma le Faletua o le alii kovana ia Cynthia Moliga, fa’atasi ai ma ni isi o sui o le Kapeneta fa’apea ai tagata faigaluega a le malo.

 

Na muamua asia le potu o loo taofia ai fanau laiti, sosoo ai loa ma le potu o loo taofia ai tagata matutua, ma fa’asolo atu ai loa isi potu eseese o loo taofia ai isi gasegase e pei o le potu failele, potu o loo taofia ai gasegase tigaina (ICU) ma le potu fa’amama toto.

 

Na vaaia le talisapaia e le mamalu o tagata gasegase o le malaga asiasi atu o le afioga a Lemanu ma Cynthia i le taimi e ulufale atu ai i totonu o potu ta’itasi o loo taofia ai i latou.

 

“E te le tau saunoa mai i se upu, pau le agaga ua mafua ai ona oo mai, e fai ai i maua ma Cynthia ma sui o le afioga i le ali’i kovana ia Lolo Matalasi Moliga, e ofo alofa ma fa’amanuia atu ai le Kerisimasi ma le tausaga fou, ma ia maua le onosa’i ao feagai ai ma ma’i o le tino”, o ni isi ia o saunoaga a Lemanu e fai i gasegase i le taimi latou te feiloa’i ai ma tauaao atu ato meaalofa.

 

Na molimauina e le Samoa News le tofu uma o gasegase ma meaalofa na tauaaoina atu i ai. E le gata i meaalofa mo gasegase ae sa fa’apea fo’i ona foa’i atu e le malo meaalofa mo foma’i ma tausima’i i potu ta’itasi o loo galulue ai i latou.

 

“O le agaga o le afioga i le ali’i kovana, ia i ai se taimi e oo atu ai i tua le malo e asia i latou o loo feagai ma ma’i tiga o le tino, ma ofo atu i ai sina meaalofa fa’apea ai ma se upu fa’amalosi, ina ia lagona ai e le tagata le lototele e feagai ma ona tiga”, o le saunoaga lea a Lemanu i le Samoa News.

 

Sa ia taua atili fo’i e fa’apea, o le fa’anaunauga lava lea o le afioga i le ali’i kovana, ia fai Ta’ita’i o le malo ma le atunu’u ma fa’ata’ita’iga lelei i tagata lautele, ina ia tausolomua i latou ona faia fa’ata’ita’iga lelei ma fai fo’i ma auauna, ina ia tutupu a’e fanau ma tupulaga talavou ma latou mulimuli i ai.

 

Na taua e le Ta’ita’i o Tausima’i a le LBJ ia Simamao Tuatoo i le Samoa News lona fa’afetaia o ta’ita’i o le malo faapea ai faalapotopotoga ma tagata uma o le atunu’u o loo alolofa atu ma foa’i atu meaalofa mo gasegase i le tele o aso.

 

“Faafetai i le malo ona o le manatu mai i le mamalu o le atunu’u o loo fa’ataotolia i le maota gasegase, e le gata ua latou foa’i meaalofa ae ua maua fo’i le avanoa e feiloa’i atu ai i fanau ma tagata matutua, lea fo’i ua maua ai le malosi fou e feagai ai ma tiga o le tino”, o le saunoaga lea a le faletua ia Simamao i le Samoa News.