Ads by Google Ads by Google

AOTELEGA A'OA'OGA FA'APITOA TAPENA AI - CYBER SECURITY AS


O ali'i faia'oga na malaga mai Antonio Watson ma Devalle Clay ua pu'ea le latou ata ma Tafaimamao Lefu Tua Tupuola o le ASCC i le fonotaga mo le taumafaiga e fa'atula'i se Cyber Security a le tatou Malo i le Potu fono o le ASHLS i Tafuna. [ata: Leua Aiono Frost]

Ona ua leva ona fa'aaogaina e Amerika Samoa le tautua o feso'ota'iga fa'a-Initeneti, ua tatau ai ona tatou mataituina ona a'afiaga eseese, pe afai e sofa'i e se tasi le saogalemu o fa'amaumauga uma, e tupito i le Malo, Kamupani ma Tagata Taito'atasi ua mae'a fa'amautu i faila eseese i totonu o latou masini Komipiuta a'o feso'ota'i i le Initeneti.

 

O lea saogalemu e le mafai ona taofia le sofa'i mai e se tasi, ua manatu ina ia avea ou fa'amaumauga e fai ma ala o se soligatulafono 'tau le ave fa'agaoi o ou fa'amaumauga. ma fa'aaoga e pei lava o oe o lo'o faia nei soligatulafono. Lona lua o le ave'esea ai o tupe mai totonu o au teugatupe e pei lava o oe, ae le o oe.'

 

O se fa'ata'ita'iga o lena ituaiga solitulafono, lea na tupu i le vaiaso na te'a ma ua avea ai se peimeni a le Malo mai lana teugatupe ma totogi ai se pili i fafo. Na fa'afoliga mai o le Kamupani sa tatau ona totogia i ai e le Malo lana pili, ae leai o se tagata ua fa'aigoaina o le "sofa'i' po'o le hacker.

 

E to'alua sui iloga mai le TEEX, kamupani ua fa'akonekarate e le FEMA e fa'atautaia ana a'oa'oga fa'apitoa, e la te faia le a'oa'oga lea i le Matagaluega o le Puipuiga o le Saogalemu Lautele.

 

E amata le a'oa'oga, ae tupu mai lea fa'aletonu, ma sa fa'aaoga loa mo le fa'aa'oa'oga i lea vasega taua. O sui uma o lo'o mautu ia i latou fa'amaumauga taua a le Malo, ma i ai fo'i le malosi'aga latou te totogia ai pili i fafo e ala i so'otaga o le initeneti, e ao ina auai i vasega tau Cyber Security e faia i le tatou nei malo, aua o i latou ia e fa'aaogaina i aso ta'itasi lea ituaiga o tautua.

 

O le aoga lea  o nei a'oa'oga, ina ia malu puipuia fa'amaumauga taua uma a le Malo, ia le maua e i latou e osofa'ia laina o so'otaga e fia maua atu tatou fa'amaumauga e fa'auia mai ai latou osofa'iga.

 

O i latou sa auai, o sui uma lava o lo'o ia i latou le aotelega, fa'amaumauga ma le fa'atula'ia, o mea uma tau i matagaluega taitasi o le Malo. Peita'i, e le'i auai sui nei o Matagaluega taitasi o le malo. O nisi ua le oo atu sui e fa'aautu i ai lea galuega a matagaluega, ma ua avea ma avanoa e le mautu ai se tu'ufa'atasiga o se Cyber Security a le Malo.

 

"E mana'omia ona auai mai uma tagata o lo'o galulue IT i matagaluega ta'itasi e avea ma totino o le Vaega e fa'atula'ia le Cyber Security, aua e ao ina galulue fa'atasi i latou ma fefa'asoa'i i mea o loo latou mataituina o a'afia ai le so'otaga fa'ainiteneti a le Malo atoa." O se saunoaga lea a le ali'i faia'oga Antonio Watson.

 

"E ese mai le latou fa'afesoa'i i faamaumauga, ae fefa'asoa'i fo'i latou lagona o se mea o tau olioli mai e ono tupu, fa'ato'a fa'ailoa ai i ta'ita'i e nofouta i ai, ma faia aga'i i ai se latou fa'aiuga tatau. Afai la ae le feso'ota'i sui  nei mai vaega eseese o le Malo, e le mafai ona fa'atula'ia se Cyber Security o le Malo o Amerika Samoa." O se toe fa'aauau lea o le saunoaga a Watson.

 

Na amata mai le aoaoga i ala o fa'amaumauga, ma le saogalemu o au fa'amaumauga e ao ina teu i lau masini komipiuta. Afai e le so'otaga lau masini i le Initeneti, o lo'o mausali lava lau masini mai nei osofa'iga i luga o laina nei. Peita'i, afai e te fa'aaogaina le Facebook, Twitter ma Imeli mo au talanoaga i taimi uma, o se tamau lea o lo'o e feso'ota'i i luga o nei laina.

 

O faamaumauga e te manatu ina ia avatu i se tasi i luga o laina nei, ia faia ma toe 'aveese vave. Afai fo'i e te fa'aaogaina e pasi atu ai au fa'amaumauga i lau fanau ma isi e tatau ona e avea i ai, ia vave ona toe 'ave'esea. O ala fo'i na e tatau ona faia e tagata uma e feso'ota'i i laina o Initeneti.

 

O nisi o nei tagata e osofa'ia le saogalemu i laina o feso'ota'iga o Initeneti, o lo'o latou mataituina ala e mafai ai ona osofa'ia le atunu'u atoa, po'o terorisi, tagata fa'atupu fa'alavelave, o le ala lea e ao ai ina a'otauina tatou tagata faigaluega i nei feso'ota'iga, ia le faigofie ona osofa'ia i tatou e tagata solitulafono.

 

I le taimi nei e le o i ai se tulafono a le tatou Malo ua fa'atulaga e fa'asalaina ai i latou o faia nei soligatulafono i feso'ota'iga tau Initeneti. Ua le mafai fo'i la ona tatou iloa i latou o lo'o osofa'ia tatou laina o feso'ota'iga initeneti ma ave tatou fa'amaumauga.

 

"Ina ua amatalia le a'oga lenei, ua va'aia ma iloa ai, tafefe i le tele o mea o a'afia ai i tatou, ma ono lamatia ai le soifua saogalemu o le atunu'u atoa, ae le o tatou iloa lava! Lea ua atagia mai, matua tele le saogalemu o fa'asaoina ai i tatou e le Atua, ae le o iloa lava e i tatou ona taofiofi fa'amaumauga e ono lamatia ai lo tatou saogalemu atoa." O se tala lea a Esther Savusa Savini, se tasi o le aufaigaluega lautogia a le ASHLS.

 

O ala e mafai ai ona fa'aleaga lou mafaufau, ma vane mai ai le fa'amaumauga mai ia te oe, e ala i talanoaga ma se isi i luga o feso'ota'iga tau emeli, facebook ma isi, o se tasi lea o vala o le a'oa'oga tele sa feagai ai ma sui tofia o matagaluega taitasi na auai i aso e lua.

 

O isi ala ua fa'asese ai le to'atele, ona ua fai mai o ia o se tasi o lou aiga, ae leiloa o fa'amaumauga a lea sui o lou aiga, ua ia fa'aaogaina maia, a'o le tagata sofa'i lea e talanoa mai.

 

O le fa'atula'ia fo'i o se Cyber Security mo le tatou Malo, e matua le mafaia lava ona faia e se tasi e to'atasi, e ao ina faia e sui uma mai matagaluega ta'itasi ma Ofisa eseese e auga uma i le tautua a le malo, fa'atasi ai ma le feso'ota'i o nei sui ma fefa'asoa'i fa'amaumauga.

 

"Afai e le mafai ona fefa'asoa'i fa'amaumauga ma galulue fa'atasi uma matagaluega e le mafai ona fa'atula'ia se polokalama faapitoa e fa'amautu ai le saogalemu o feso'ota'iga tau initeneti a le Malo po'o se Cyber Security." O se tala lea a le ali'i faia'oga Devalle  Clay mai le TEEX/FEMA.

 

I lea lava a'oa'oga, ua fa'ao'o mai ai i sui nei laina eseese e mafai ona siakia ai e sui nei pe ua osofa'ia lau laina o so'otaga tau initeneti a tagata taito'atasi, matagaluega, pisinisi ma fa'alapotopotoga. E le gata i lea ua fa'ailoa mai fo'i laina e mafai ai ona mataituina a'o le'i e fa'aaogaina se so'otaga o tautua mai luga o le initeneti, e siakia ai lena so'otaga pe o se so'otaga o lo'o ua mae'a osofa'ia.

 

Ua mae'a nei ona a'oa'oina sui uma sa i ai, i ala e mafai ai ona fa'atula'ia se Cyber Security a le tatou malo. O lona uiga, ua tatau ona amatalia ona tu'ufa'atasia fa'amaumauga ma mataituina laina saogalemu e faia ai feso'ota'iga a matagaluega uma o le Malo, ma ia mataituina nisi o lo'o tau sofa'ia maia le tatou lea saogalemu.

 

O le fia fa'atula'ia o se Cyber Security a Amerika Samoa, aua o lenei le vaitau, ua amata aoina fa'amaumauga e fuafua ma fa'ataoto ai osofa'iga a le 'au fa'atupu fa'alavelave. Ua mataituina fo'i i lea a'oa'oga, o le tele o ala e fa'aosofia ai nei ituaiga o osofa'iga e afua lava i le soifua maloloina o tagata o le atunu'u, ona soso'o ai lea ma tupe a se malo.

 

E ui ina e la'ititi le tatou malo, ae o le vaega o le Malo tele o Amerika ua sili ona ma'ale'ale lona saogalemu aua e le'i mautu se tatou tali atu i osofa'iga tau feso'ota'iga tau laina o le initeneti ma ona so'otaga e le ma faitauina vave e se tasi.

 

"Ua le toe tele le lalolagi ua tatou ola ai nei, ua matua laititi lava aua ua aofia atunu'u uma i laina o feso'ota'iga tau initeneti, ma ua mafai lava e le tagata osofa'i saogalemu i luga o nei laina o feso'ota'iga ona fa'apa se pomu o lo'o taoto i so'o se malo tele, po'o le fa'aosofia afi ma nisi mea e fa'aulu i le suavai taumafai i se isi malo mamao ese mai, ona o ala o nei feso'ota'iga ua gafatia ai." O se tala lea a le ali'i faia'oga Antonio Watson o le TEEX/FEMA.