Ads by Google Ads by Google

Aoaoga faapitoa mo Leoleo atunu’u mai sui fa’apitoa o le Pasefika (PTCN)


Le taimi na feiloa’i atu ai le Komesina o Leoleo a Samoa ia Fuiavailiili Egon Keil i sui o le Ofisa o Leoleo a le atunu’u, fa’atasi ai ma le Loia a le Fono Faitulafono, ao lumana’i ai le tatalaina o se aoaoga faapitoa mo Leoleo a Amerika Samoa i le taeao ananafi. [ata AF]
ausage@samoanews.com

O lo o fa’agasolo i le vaiaso nei i le potu fono a le Faletalimalo o le Sadies by the Sea i Utulei se a’oa’oga fa’apitoa mo ali’i ma tama’ita’i Leoleo a le atunu’u, i lalo o se faiga paaga ma sui o le Vaega e tete’e atu i solitulafono i le Pasefika (Pacific Transnational Crime Network (PTCN) e aofia ai ma Amerika Samoa, e fesoasoani ai i le fetufaina o metotia ma auala e fa’amalosia atili ai aoaoga i le atunu’u ma le pasefika, aemaise lava i auala e puipuia faiga fa’asolitulafono e a’afia ai atumotu o le pasefika.

 

O le Ta’ita’ifono o le PTCN, o ia fo’i lea o le Komesina o Leoleo a Samoa, afioga Fuiavailiili Egon Keil na saunoa i le tatala aloaiaina o lenei aoaoga i le taeao ananafi, ma ia fa’afetaia ai le avea o Amerika Samoa ma totino o lenei Fa’alapotopotoga i le fa’aiuga o le tausaga na te’a nei.

 

O le afioga i le Lutena Kovana ia Lemanu Palepoi Peleti Mauga na fai ma sui o le atunu’u e fa’afetaia ai sui o le PTCN o loo i ai i le atunu’u mo lenei aoaoga, atoa ai ma le saunoaga mai le Komesina o Leoleo a le atunu’u, tofa Le’i Sonny Thompson e fa’afeiloaia ai le au valaaulia fa’apea ai i latou ua malaga mai mo lenei aoaoga.

 

I le avea ai o ia ma leoleo ua malolo litaea mai i le Ofisa o Leoleo i Los Angles (LAPD), na taua ai e Fuiavailiili le taua tele o le galuega fa’aleoleo i Samoa ma le pasefika, ona e galulue malosi mo le fa’atinoina o galuega sa a’oa’oina i latou e galulue ai, atoa ai ma le fa’atinoina o le mea sa’o ma le mea moni.

 

Na ia fa’atula’i se lu’itau mo Leoleo a Amerika Samoa e fa’apea, o se tasi o itu taua o le galuega fa’aleoleo o loo latou fa’atinoina i Samoa, o le fa’alogo lea i leo ma manatu o tagata lautele, ona o i latou ia o loo pito sili ona lava lo latou silafia ma le iloa i mea o loo tutupu i le si’osi’omaga o le atunu’u.

 

Sa ia fa’ailoa atili fo’i e fa’apea, i le avea ai o ia ma Komesina o Leoleo o le malo o Samoa, o ia o se tagata e naunau e fai le mea sa’o, fa’atino lana galuega ua mae’a ona fa’atauto o ia e fa’atino, ma ua le fefe e fesili mo se fesoasoani.

 

Sa ia taua atili lo latou galulue fa’atasi ma le vaega o le FBI a Amerika, Matagaluega o le Puipuiga o le Saogalemu Fa’alotoifale a le malo tele, atoa ai ma le Ofisa o Leoleo i Hawaii. E masani fo’i ona ia valaau i le Ofisa o Leoleo a Niu Sila ma Ausetalia mo se fesoasoani, i soo se taimi na te mana’omia ai se fesoasoani.

 

“O se lagona fiafia ia te a’u le avea o Amerika Samoa ma totino o lenei Fa’alapotopotoga, ma o se auala lelei lea e mafai ai ona tatou fetufaa’i i auala e mafai ai ona foia solitulafono i Samoa ma le Pasefika”, o le saunoaga lea a Fuiavailiili.

 

Na tomua le saunoaga a Lemanu i lona fa’amalulu lea i le auvalaaulia, ina ua taunu’u atu ua leva ona amata le polokalame, peita’i o se lagona fiafia i le afioga i le ali’i Kovana ia Lolo Matalasi Moliga le avea o Amerika Samoa ma totino o le Vaega a le PTCN, lea o le a mafai ai ona galulue faatasi ma isi atumotu o le pasefika i le fetufaa’i lea o fa’amatalaga e fa’atatau i auala e puipuia ai solitulafono eseese i le pasefika.

 

Saunoa atili Lemanu e fa’apea, afai e i ai se isi galuega e tatau ona galulue fa’atasi ai atumotu o le pasfika atoa ai Samoa e lua, o le vaavaai lea i auala e puipuia ai solitulafono e aafia ai tagatanu’u, atoa ai ma le manuia o loo malupuipuia tuaioi mai le ono osofaia e tagata ese.

 

O le tausaga lenei e atoa i ai le 13 tausaga talu ona fa’agasolo mai aoaoga nei a le PTCN, e pei ona taua e le tofa Le’i i lana saunoaga, ma ua atili ai le fa’amanuiaina o Amerika Samoa i lenei tausaga, e le avea ua avea ma totino o le PTCN mo le ulua’i taimi, ao lea fo’i ua faia mai i ona laufanua aoaoga e fesoasoani ai i le puipuia o solitulafono e aafia ai ona tagata, e pei o solitulafono i le faia o sauaga i fanau tama’ita’i, fualaau fa’asaina, aemaise ai ma le fa’apologaina o tagatanu’u.

 

Sa ia fa’afetaia fo’i le sao taua o le Ofisa o Leoleo a Ausetalia, Niu Sila atoa ai ma le Matagaluega o le Puipuiga o le Saogalemu Fa’alotoifale a le malo tele, lea ua mafai ai ona fa’amalosia atili lenei polokalame mo le puipuiga o atumotu o le pasefika ma ona tagatanu’u.

 

“O le taua o lenei polokalame ua mafai ai ona tatou galulue fa’atasi, o le a mafai ai e atunuu eseese o le pasefika ona fetufaa’i fa’amatalaga e fesoasoani ai i le fa’aleleia atili o le galuega fa’aleoleo atoa ai ma le puipuiga i le pasefika”, o le saunoaga lea a le tofa Le’i.

 

O loo fa’agasolo pea lava i le vaiaso nei lenei aoaoga, ma ua fa’amoemoe e aoaoina ai auala eseese e foia ai fa’afitauli ma solitulafono o loo alia’e mai i nofoaga eseese i totonu o le atunu’u.