AOAOGA FA'APITOA - IA GAFATAULIMA E LE TAGATA LONA GASEGASE TUMAU:


O i latou uma na auai fa'atasi ma o latou faia'oga i lenei aoaoga fa'apitoa "Ia gafataulima e le tagata lona gasegase tumau!" E tasi le vaiaso atoa o lo'o faia ai le aoaoga lea. [ata: Leua Aiono Frost]

O sui mamalu mai Samoa, o i latou o nafa ma le tele o tima'iga o tagata lautele ina ia mafai e le tagata lava ia ona gafataulima lona gasegase tumau, ua auai mai ina ia fefa'asoa'i ma sui na auai i le aoa'oga fa'apitoa a le CDC ma le Stanford University ina ia fa'aaogaina le tusi ua mae'a fa'aliliuina i ai lesona ma ta'iala fa'asamoa ia fa'aofi ma nofogofie i finagalo o tagata o atumotu nei ta'iala uma. O nei sui ua auai mai e aofia ai: Fonoti E. Nee; Dr Maria Talaitupu Kerslake, Talaleomalie Pritchard mai Mulifanua, ma le sui mai le WHO Kolisi Viki. O lo'o ua i ai fa'atasi i latou ma sui mai le LBJ/DOH i lenei ata. [ata: Leua Aiono Frost]

O lo'o ua pa'aga lelei le World Health Organisation ma le vaega a le CDC /DOH a le tatou Malo nei, ina ia fa'ataunu'u le aoaoga fa'apitoa e a'oa'o ai nisi sui e to'atele o Samoa na Lua e fa'ailoa i ai ta'iala ma lesona ua mae'a lomia i se Lomiga Fa'asamoa o le Tusi - "Gafataulimaina o Gasegase Tumau."

 

O lea taumafaiga atoa, 'Ia taumafai ona avatu le fautuaga ma ta'iala e gafataulima ai gasegase tumau, i ala e taliagofie i mafaufau ma lagona o tagata atumotu, e fa'afaigofie ona ofi nei ia fe'au taua i loto ma agaga o nai o tatou tagata, ma fa'aaoga ai e i latou fautuaga ma ta'iala uma e fa'atatau i gasegase tumau ua maua ai."

 

O le fa'aliliuina o le Tusi o Lesona po'o Ta'iala sa totogia e le CDC po'o le Ofisa Tutotonu o le Puipuiga o Gasegase Tumau. Ua mae'a fa'aliliuina lea tusi atoa e sikola o le Gagana Samoa, o alo o Samoa o lo'o faigaluega fa'afoma'i fa'atasi ma Fomai fa'apitoa o gasegase tumau i le Iunivesite o Stanford na galulue ai i lena galuega aoga.

 

I se fa'amatalaga a le tama'ita'i o Farrah Lesa o le DOH, "O le taua o lenei tusi, ua tusia ma ua mafai fo'i ona fa'amalamalama a'ia'i o tatou tagata i mea e tapenapena i ai, ia gafataulima o latou gasegase e i latou lava, ae le tau togafitia so'o i vaila'au."

 

O Farrah Lesa ma Daphne Fale, e aoao fa'apitoa ina ia avea ma sui Faia'oga, e fa'aaogaina lea Tusi mo aoaoga i le lautele o le tatou atunu'u.

 

I aoaoga nei ua fa'atautaia nei, ua le fa'aaogaina ai lava ni folasaga e fa'aaoga ai ni meafaigaluega fa'aonapo nei, ua mana'omia ona toe fefa'asoa'i tagata i ala o le talatalanoa vavalalata ma saili auala sa masani ai ona togafitia fa'afitauli i va o aiga. O ala fo'i ia ua masani ai o tatou tagata ona fa'afo'ia o latou gasegase.

 

I le ulua'i aso o lenei Semina, o le aso Gafua na fa'asoa ai nei sui faia'oga le polokalama atoa ua folasia i totonu o le Tusi ua fa'asamoaina. Ua fa'aaogaina nei fo'i iinei i luga o le Laisene ua fa'atagaina mai e le CDC mo i tatou, ae le mafai ona taua'ao atu i se isi atunu'u e pei o Samoa.

 

E tusa ai ma le fa'amatalaga a le tama'ita'i o lo'o fai ma sui o le WHO i Samoa, Kolisi Viki, sa ia fa'ailoa ai, "O lenei tusi ua mae'a fa'asamoaina mo tagata Samoa ia malamalama lelei i ala e mafai ai ona ia gafataulima lona gasegase tumau, o se tusi sa matua fia maua mai i le tatou gagana. Fa'afetai i lea galuega ua mae'a faia e nisi o sui o le tatou atunu'u ua fa'asamoa mai. O lea ua maua le avanoa e auai ai sui mamalu mai le Matagaluega o le Soifua Maloloina Amerika Samoa e a'oa'o mai ai, lea ua pale ai fo'i ma si tatou motu tuaoi o Samoa, ina ia fa'asoa mai i ai le sosia o lea lava tusi ta'iala aoga."

 

E ui o le a le mafai ona taua'aoina se tusi mo nei sui mai Samoa ona aiaiga o le Laisene o faia ai lenei a'oa'oga, ae o le mea taua, ua a'otauina sui iloga nei e to'atolu na malaga mai: Fonoti E Nee o le Ministry of Health a Samoa, Dr Maria Talaitupu Kerslake ma Talaleomalie Togia Pritchard mai le falema'i itumalo o Foailolo'o, Mulifanua.

 

O i latou nei o le a avea ma 'ave fe'au taua, e fa'ao'o le tele o le sosia ua fa'amautu i lenei tusi, ina ia faia nisi a'oa'oga faapenei i Samoa ma fa'afesoa'i ai o tatou tagata nu'u ina ia mafai ona gafataulima e le tagata lava ia i lona gasegase tumau o feagai ma ia, po'o le tausia lelei fo'i o lou soifua laulelei, ia le po'ia i gasegase tumau ua matele ina maua ai le to'atele i lenei vaitau.

 

O le aso Lua ananafi, ua amata ai ona fa'ao'o mai vaifofo e mafai ona e gafataulima ai lou gasegase tumau, atoa ma lou tagata atoa, ia tonu lou mafaufau mo au fa'ai'uga lelei e ao ina faia, e tausia ai lou soifua maloloina i aso ta'itasi.

 

O le 'auga o le Lesona muamua - Fa'amalositino Tatau.

 

O le faia'oga o Farrah Lesa, ma ua va'aia fo'i ua avea o ia ma se fa'aa'oa'o lelei, aua o ia lea sa matele ina matua mamafa ae ua va'aia ua tele le suiga i lona tino va'aia, ua ia fa'aaogaina lana a'oa'oga sa malaga atu, lea ua fa'asoa mai. O lona uiga, ua avea lava o ia, ma fa'atinoga o le a'oa'oga ua mae'a tusia i le tusi o ta'iala - Ia gafataulima lou gasegase tumau!

 

"Ia muamua talanoa i lou tagata atoa, o le tino, o le mafaufau ma le agaga! Ia galua'i i le ola fiafia, aua le ola taotaomia ou lagona. Ia ave'ese le ita ma lou ola e i ai lagona o le maasiasi. Ia tele le taimi e te fa'aalu e faia ai au fe'au e fa'amatagofie ai lou si'omaga i lou lotoifale, ma ia fa'avasega sou taimi mo oe lava! Ia e fa'amalositino." O le tele lea o nisi o fa'asoa na va'aia ma talanoaina i le taimi o le lesona.

 

O nisi o mea na fa'aleo e afua ai ona le o'o sau fa'amalositino i aso ta'itasi, ua lisia mai e le vasega e to'a 20+ tagata na auai, "Ua leai se taimi, ua e le loto lava e faia se fa'amalositino ona o le fa'apalapala. Ua faia sau fa'anoi ae ua le manatu mamafa i lou soifua maloloina. Ua ma e va'ai mai nisi o manaia o latou tino, ua e taumafai e faapa'e'e atu lou tino puta na'ua. Ma isi lava mea uma na fa'aalia.

 

O vaega na auai i lenei vasega e aofia Sui e to'avalu mai le TAOA, o sui e to'afa mai le Hope House i Fatuoaiga ae maise o le Sui mai le LBJ Medical Center i le vaega a le Gasegase o le Suka.

 

Ua fa'ailoa mai o le lona tolu ai lea o vasega ua fa'atautaia e sui nei ua mae'a laisene mai e le CDC ma le Stanford University ina ia fa'atautaia a'oa'oga fa'apitoa nei, e fa'aaogaina ai Ta'iala mai le tusi, "Ia gafataulima lou Gasegase Tumau."

 

E faia lea a'oa'oga se'ia o'o i le aso Faraile nei, ona tufatufaina lea o tusi pasi mo i latou ua agava'a mo le fa'aauauina o lea fo'i galuega tima'i mo le mamalu lautele o le atunu'u.

Comment Here