Ads by Google Ads by Google

Aoaoga faaopoopo mo ali’i ma tama’ita’i Leoleo a le malo


Leoleo o le malo i le aso o le fa’auuga e aloaia ai lo latou tauaveina o fana. [ata AF]
ausage@samoanews.com

O le masina o Mati o le tausaga fou lea ua fa’atulaga e faia ai le la’asaga lona lua o aoaoga faapitoa mo ali’i ma tama’ita’i Leoleo o le malo, mo le a’oa’oina lea o i latou i le isi la’asaga o le latou auaunaga fa’aleoleo.

 

E pei ona taua e le Faiaoga o le a gafa ma le fa’atinoina o nei aoaoga, susuga Ernie Haleck e fa’apea, o le la’asaga lona lua o aoaoga mo ali’i ma tama’ita’i Leoleo o le a sauni atu i ai i le tausaga fou, o le a’otauina lea o i latou ina ia iloa tali atu i taimi e tutupu mai ai fa’alavelave mata’utia i totonu o le atunu’u, e aofia ai ma fa’alavelave fa’aterorisi.

 

Na fa’ailoa e Haleck e fa’apea, e taua tele le aota’uina o ali’i ma tama’ita’i Leoleo ina ia iloa tali atu i soo se taimi e tutupu mai ai fa’alavelave matuia fa’apenei, ona o le tulaga tau mamao o Amerika Samoa mai le setete o Hawaii e mafai ona maua mai ai se fesoasoani mai le vaega Suesue Faapitoa a le Feterale (FBI).

 

“E tatau ona lava sauni ali’i ma tama’ita’i Leoleo a le malo e tali atu i taimi e tutupu mai ai fa’alavelave mata’utia i totonu o le atunu’u, e aofia ai fa’alavelave e afua mai i fafo atu o Amerika Samoa,” o le saunoaga lea a Haleck.

 

“O le fa’alavelave o lo o i ai i le taimi nei, e fai lava sina mamao o le nofoaga e maua mai ai e Amerika Samoa se fesoasoani faapitoa mai le Vaega a le FBI i le aai i Honolulu, ae afai e aoaoina Leoleo i auala e tali atu ai i fa’alavelave fa’apenei, ona mafai lea ona maua se fesoasoani mo le atunu’u i taimi e fetaia’i ai ma fa’afitauli fa’apenei.”

 

E to’a 41 le aofa’i o ali’i ma tama’ita’i Leoleo a le malo ua aloaia nei lo latou fa’aaogaina o a’upega i soo se taimi e fa’atino ai a latou galuega i le atunu’u. O i latou nei na filifilia e le Komesina o Leoleo ia Le’i Sonny Thompson e auai i le vasega faapitoa o Leoleo e a’ota’uina mo le fa’aaogaina o a’upega i taimi e fa’atino ai a latou tiute.

 

E pei ona taua e Le’i i se fa’atalatalanoaga ma le Samoa News e faapea, e le o Leoleo uma a le malo e fa’a a’upegaina, se’i vagana ai se vaega faapitoa o le a mafai ona aoaoina ma fa’amaonia le gafatia ona latou tauaveina a’upega.

 

O ni isi o i latou na faamaonia mai e Le’i o le a latou tauaveina fana e aofia ai Leoleo sinia, faapea ai Leoleo ua tofia i le Vaega Faapitoa o loo sailia fualaau fa’asaina. E o o lava fo’i i le Komesina ua ia tauaveina fo’i le laau malosi talu mai le taimi na mae’a ai aoaoga i le 3 vaiaso talu ai.

 

Sa ia faailoa i le Samoa News e fa’apea, talu ai ni isi o fa’alavelave ua tutupu i le atunu’u, ua mana’omia ai le tatau lea ona tauave e ali’i ma tama’ita’i a’upega, e fesoasoani ai i le fa’atinoina o a latou galuega.

 

O ni isi o ia fa’alavelave e pei ona saunoa Le’i, e aofia ai le fa’alavelave e fa’atatau i le ali’i Leoleo Suesue ia Det. Lusila Brown lea na tagatavaleina i le lata i le 10 tausaga talu ai, o le faalavelave na tafana ai le Ofisa o Leoleo i Leone, atoa ai ma le fa’alavelave lea na manu’a ai fo’i foliga o se ali’i Leoleo i se pulufana.

 

E ui i faasea mai le atunu’u e tusa ai o le mataupu lea ua fa’a a’upegaina ai Leoleo, ae na saunoa Le’i e fa’apea, ua o o i le taimi ua tatau ai ona fa’aa’upegaina Leoleo o le malo.