Ads by Google Ads by Google

Amatalia Fonotaga Lona 39th APNLC - Maota o Tina Kanana Fou


O se va’aiga i le ali’i foma’i mai New York sa avea ma fofoga fa’apitoa mo le tauaofiaga lona 39 a le APNLC lea o lo’o fono i le vaiaso atoa i le Maota o Tina i Kanana Fou. [ata: Leua Aiono Frost]

O se va’aiga i le fiafia o tama’ita’i tausimai lea ua aufa’atasia i le Maota o Tina i Kanana fou, sa latou fa’alogo i le lauga a le susuga le foma’i Dr Barry Smith ma latou iloa lelei ai le uiga taua o le upu “NURSE.” [ata: Leua Aiono Frost]

O se va’aiga i le aufaipese sa latou usuina vi’iga o le Atua i le tauaofiaga lona 39 o le fonotaga fa’aletausaga a le APNLC lea ua tatou talimalo ai. O le fa’ato’a toe o’o mai lea ia i tatou o lea fo’i manuia. [ata: Leua Aiono Frost]

O le taeao o le aso Gafua na tatala aloa’ia ai le fonotaga lona 39 a le “Asosi a Tausima’i o Teritori ma Setete o Amerika i le Pasefika” ma o le fa’alua ai lenei ona talimalo le tatou Asosi a Tamaita’i Tausima’i i lenei fonotaga. O le latou taligamalo na tuana’i atu  o le tausaga 2007.

 

O le Sosaiete a Asosi Tausima’i a Teritori o Amerika i le Pasefika, o lo ua latou naunauta’i ina ia fa’ataua, ma ia aoga le agava’a o Tama’ita’i ma Ali’i Tausima’i i le fa’aleleia atili o le auaunaga mo le tausiga o le soifua Maloloina o tagatanu’u ma e soifua i atunu’u fa’ateritori ma setete o Amerika i le Pasefika.

 

O le fonotaga o lo’o faia i le Maota o Tina i le Lotoa a Kanana Fou mo le vaiaso atoa lenei. Na amata fa’ato’ai mai le au usufono i le aso Faraile na te’a, ma amatalia ai le ulula’i fonotaga a sui tofia i le afiafi o le aso Sa na te’a nei.

 

O le aso Gafua, na feiloa’i aloa’ia ai loa le Taiulu o le faigamalo, le afioga le Sui Kovana Lemana Peleti Mauga fa’apea ma le Fa’atonusili o le Matagaluega o le Soifua Maloloina Motusa Tuileama Nua, ma nisi o sui mamalu sa auai le tatalaga aloa’ia o lea fonotaga.

 

O le tatalo amata mo le sauniga sa si’itia e le Faife’au Pr Uili Solofa o le Ekalesia SDA i Iliili, ma sa fa’afofogaina fo’i folasaga fa’afeiloa’i a le Asosi a Tamaita’i Tausimai a Amerika Samoa, Peresetene Tofiga Tufele Li’amatua. O ia lea sa na fa’afeiloa’ia sui e to’a 16 ua mafai ona fa’atasi mai mo lenei tauaofiaga.

 

Ua fa’ao’o mai fo’i le tusi fa’anoi a le Peresetene o lo’o tula’i i lea tofiga Rosa Tudela o se sui tofia mai le Asosi a Tausimai mai le CNMI. Ona o lea tulaga ua tutula’i ai le Sui Peresetene o le APNLC, Lele Ah Mu e ta’ita’ia le fonotaga lenei. O le tausaga fou o le a talimalo ai Guam.

 

O le ‘au’au o le fonotaga lenei, ua fa’ailoa mai, “O le Galulue Fa’atasi o Pa’aga e Fa’aitiitia ai Lu’iga o lo’o Feagai ma le tausiga o le Soifua Maloloina i le Kelope!”

 

O lea le fa’amoemoe na fa’amamafaina e le folasaga a Tofiga Tufele. “Ia tatou galulue ia autasi i o tatou faiva fa’atino i aso uma, aua ua tatou iloa lelei, ua pau lea o se mea e mafai ai ona sao atu le auaunaga i o tatou tagata ua mo’omia le tausiga lelei i o tatou malo fa’a-atumotu.”

 

Na ia saunoa fo’i e tusa o le faigata tupito o tumamao ese mai i nofoaga o lo’o gaosia ma auina mai ai vaila’au mo togafitiga, po’o le taumafaiga fo’i ina ia o’o mai ni Foma’i fa’apitoa mo siakiga ma togafitiga o gasegase tuga i atumotu.

 

“E le faigofie ona o’o mai i latou ua agatonu latou agava’a ma gasegase o lo’o gafatia ai le to’atele o tatou tagata i atumotu, e leai fo’i se foma’i e fia sau e nofo mau i tatou atumotu ma galulue ai i ituaiga totogi o ofoina atu, ua vava mamao i tatou ma le malo tele o lo’o gaosia ma auina mai ai vaila’au mo togafitiga. O mea nei a fai e te oo i ai, ona e iloa lelei lea, o oe o lo’o alaala i le atumotu, ma o lou aiga moni lava!”

 

“O tausima’i, ua avea ma so’otaga o foma’i mo togafitiga, ma le sui o lo’o fa’agasegasea. E mafai ona fa’amama avega o ia i le gasegase, e mafai fo’i ona fa’amama o ia i le avega o le taumafai a le foma’i e fa’ao’o atu se togafitiga i e gasegase. Ia tatou faia ma le alofa le tatou faiva, aua o i tatou e sili ona taua la tatou galuega tausoa fa’atasi ma Foma’i mo tagata lautele.”

 

Saunoa Lele Ah Mu e fa’ailoa le itu a le APNLC, “O le fonotaga lenei e matua fa’amausali atili ai ni ala o le a fesoasoani malosi ai le APNLC mo le auaunaga a le Tausimai i lona lava malo o galue ai. Ua tapena fo’i ni polokalama tima’i a Asosi ta’itasi e 10 ina ia fa’ailoa mai ni fua o latou galuega fa’atino i o latou malo, ma ia taumafai atili e fa’aleleia le auaunaga i ona itu uma.”

 

Na ia fa’afeiloa’ia le vasega o sui o Amerika Samoa ua latou amana’ia le usugafono a le APNLC. Na soso’o lea ma le avanoa sa tu’uina atu i le fofoga fa’apitoa o le aso, ma o se ali’i doma’i lauiloa fo’i i le setete o Niu Ioka. O lana fa’amalosi’au fo’i na matua iloga ona matagofie.

 

O Dr Barry Smith, o le foma’i MD, PhD, President /CEO o le Rogosin Institute, Professor of Clinical Surgery, Attending Physician o le New York Presbyterian Weill Cornell Medical Center.

 

Ma na saunoa o ia i le taua o le galuega fa’a-Tausima’i i le tausiga o le soifua o e ua gasegase, fa’afaileleina o le soifua ma’ale’ale o le fanauiti se’ia o’o ina matutua ma soifua saogalemu ona o lo’o atoatoa le tausiga lelei i tui puipuia ma fautuaga e fa’ailo ai le soifua laulelei o tagata.

 

“O tausima’i o le ta’imua lea i galuega tima’i mo tagata uma i le tausiga o le soifua maloloina. O i latou e fa’amoemoe i ai Foma’i ina ia fa’ao’o togafitiga ma fa’afailele le soifua o tagata o gasegase ia toe malolosi. I taimi faigata o le olaga o tagata uma, e latou te mana’omia ai le tausiga lelei a Tausima’i i nofoaga o le a fa’ao’o i ai latou mo togafitiga.”

 

Na ia sipela mai le upu “Nurses” ma sa ia fa’ailoa fa’apea:

 

N - Need - Mana’oga tupito, e matua mo’omia e tagata uma mana’oga tupito mo togafitiga o latou gasegase. O Amerika o lo’o tulaga 42 i le lalolagi i le tele o mana’oga e togafitia ai gasegase e le o maua atoatoa.

 

U - Useful Knowledge - Mo’omia lava le tomai fa’apitoa e ao ina a’o’oga lelei ai ma pasia su’ega fa’apitoa mo le avea ai ma Tausima’i Pasi e mafai ai fa’aletulafono ona e tausia se tasi ua fa’agasegasea.

 

R - Resoures - Mea faigaluega ma le aofai o tagata Tausima’i i totonu o le tunu’u atoa. E mautinoa e le o taitai ona lava lea tulaga. E tatau ona fa’ateleina atili.

 

S - Sacred Trust - Agaga i le galuega ina ia mautinoa e gasegase e te gafatia ona faia ou tiute ona ua ia te oe le a’oa’oga fa’apitoa, le loto e faia ai le galuega, fa’apea ma lou fa’amaoni i ou tiute.

 

E - Education - E mo’omia ona fa’alautele atili lou atamai i lea matata e tautuaina ai tagata uma ina ua e mataala e fa’atino ou tiute, ma ia e iloa lelei togafitiga tatau mo gasegase eseese. A sasi se mea itiiti e ono afaina le soifua o le gasegase ona e le’i lava le a’oa’oga.

 

S - Special Opportunities - Ia fai sou sao i ituaiga Asosi Eseese ua fa’aautu i le fa’aleleia atili o lou tomai i le galuega, fa’ailoa ia te outou ala fou ua fa’aopoopo mai i le fa’atautaiga o tiute ma togafitiga ua fa’atulaga mo gasegase ta’itasi. A maua avanoa lelei, ma fa’aaoga tatau.

 

O se isi lu’iga sa tu’uina mai i le au usufono ae maise nisi sa masi’i atu ina ia fa’alogologo toto’a i le fonotaga o lenei tausaga, ma tapena ai pea latou soifua tautua fa’atausima’i, na fa’alogo i le saunoaga a Dr. Smith, “O ai lava ua i ai sana fuafuaga fa’ataoto mo so’o se aula e fa’aleleia atili ai le auaunaga, pe fa’aosofia ai le fiafia o tausima’i e faia pea latou tiute, e mafai ona ou sailia le ala e fa’atupe ai lenei galuega fa’atino. Ia i ai sau fuafuaga amata o sau galuega fa’atino mo a outou tausima’i, a’o le’i mae’a le vaiaso o fonotaga lenei ua usuia.”

 

E i ai foi fa’amalositino e tova ai vaega ta’itasi o le fonotaga.