Taluai sa sainia e Peresetene Obama le tulafono ia Tesema 2015 e suia ai le faiga sa sau a'i a'oa'oga a le Iunaite Setete mai le "NO Child Left Behind” i le faiga fou ua fa'aofi mai nei - ESSA po'o le "Every Student Succeed Act" lea e tatau ai ona manuia tutusa taumafaiga a tamaiti a'oga uma, ua tatau fo'i la ona fa'atautaia e le Matagaluega o Aoga a le malo o Amerika Samoa le fa'agasologa o galuega e tusa o le fa'atulagaga o lea faiga fou.

Ua tu'uina mai le avanoa ina ia fa'ataoto le auivi e fai ma ta'iala o le latou galulue fa'atasi e tusa o aiaiga o le ESSA, ae maise ia fai le sao o vaega ta'itasi o le Matagaluega o A'oga, ina ia tamau le autu ma le agavaa ai o le Matagaluega e tusa o le usita'ia o le ESSA lea ua mataituina.

"O lenei fa'amoemoe, e tatau ma e mafai ona vave tu'ufa'atasia. E le tele na'ua ni mea e suia i le faiga sa sau a'i le matagaluega, peita'i a galulue fa'atasi vaega uma o le matagaluega, e mafai ona vave mae'a tu'ufa'atasia le auivi e avea ma ta'iala e toe siakia ai sao o vaega ta'itasi o le matagaluega, ia ausia le agavaa o le ESSA,” o se saunoaga lea a Lisa Peau, Ofisa o Tautua Eseese mo Fanau A'oga a le Matagaluega o A'oga a malo.

O fonotaga i aso e lua - Oketopa 18-19 - na amata fono ai ta'ita'i o vaega ta'itasi o le ASDOE, ina ia fa'ailoa ia i latou soalaupule i suiga e ao ina faia, ala e fa'atino ai, ma le aotelega o le sao o vaega ta'itasi i le suiga e ao ina faia e maua'a ai le ESSA e fa'atautaia ai le matagaluega.

I le taimi muamua e le'i i ai se auala e siakia ai sao o vaega ta'itasi ina ia tautuaina fanau a'oga ma a'oga ina ia mae'a a'oa'oga a fanau uma o le atunu'u, ae ua agava'a mo se galuega e galue ai. Peita'i o le faiga fou a le ESSA, ua fa'ataoto ai nei lea faiga e tu'ufa'atasia ai sao o vaega ta'itasi o le Matagaluega, po'o faia, po'o vaivai, pe o fea fo'i e ao ina fa'aulu i ai ni suiga e fa'aleleia atili ai ia ausia le sini o le ESSA, ia manuia tutusa taumafaiga fanau a'oga uma.

O tautua mo fanau fa'apea ma a'oga ina ia ausia lea sini maualuga, o le ala lea o le soalaupule o fa'auluuluga o vaega ta'itasi o le ASDOE, fa'atasi ai ma le fonotaga a Pule A'oga uma i le aso lona lua o le fonotaga, aua o i latou nei e fa'auluina le suiga lenei ua fa'atulafonoina.

"Ua matauina e ta'ita'i o vaega eseese o le Matagaluega o A'oga e le tele ni suiga i nisi o vaega o le polokalama taoto, ae o nisi vaega e feololo suiga e faia i ai, ae o nisi fo'i vaega e tetele suiga e faia i ai, ae o le fa'afetai, e leai ma se vaega o le polokalama fou ua fia fa'aulu e fa'aaoga, o ela mai sao o vaega ta'itasi o le Matagaluega," o se tala lea a Peau.

O le gafatia ona fa'atula'ia o lenei aotelega o sao o vaega uma o le matagaluega ina ia tautuaina le fanau a'oga fa'atasi ma a'oga i le atunu'u e agava'a ai i le ESSA, o se mea fou, a'o se mea lelei fo'i mo le matagaluega ma ana tupe maua mai tupe toina mai le USDOE mo le Matagaluega o A'oga.

I le ulua'i fonotaga ma ta'ita'i o vaega eseese o le ASDOE, na tofu fa'aalia manatu ina ia fa'afaigofie atili ona fa'aulufale ma fa'amautu le ESSA i totonu o a'oga. Ua matauina, o le a tele le sao e fa'atino e pule a'oga ma o o latou sui pule.

E fa'amaumau uma galuega patino i faia'oga i totonu o potu a'oga, lo latou taimi fa'aalu i le aoaoga o fanau, ia o gatusa ma le fa'atulagaga o a'oa'oga a fanau ua mae'a fa'ataoto ai e le Matagaluega mo i latou e ausia i lea aso ma lea aso.

Ua mae'a ausia nei le tulaga a'oa'oga mo faia'oga ina ia mafai ona fa'atino le galuega tau faia'oga, peita'i, o lo'o i ai pea lava le fa'afitauli, omiga i le va o le tu'ua e le tamaititi a'oga o a'oga tulaga muamua ae ulufale i a'oga maualuluga, ma le va fo'i o a'oga maualuluga i lona ulufale atu i le kolisi. O lo'o toe tau'avea e le fanau a'oga maualuluga ua papasi kosi ELI i le kolisi, po'o Igilisi maulalo sa tatau ona pasia e i latou i a'oga maualuluga. Aisea?

O mea na e toe siakia i le faiga fou lenei, ia tu'ua e le tama'ititi le a'oga maualuga, ae ua agava'a i se galuega, po'o le fa'aauau o a'oga i le Kolisi ma Iunivesite. E i ai i latou o lo'o ausia, ae to'atele atu i latou e le o ausia ma o se fua lena e fa'atatau i ai le galuega o lo'o faia nei. Ua togia fa'atasi le fanau a'oga fapaea ma a'oga uma, po'o ausia matati'a mo'omia a le ESSA.