Amata fa’agasolo suesuega mo meatotino sa fa’aleagaina i le ‘afa Gita


Se vaaiga i se ali’i laititi o lo o nofo i le nofoa i luga o le fola o le latou fale na malepe i le ‘afa o Gita i le fa’aiuga o le vaiaso na te’a nei, a o fesoasoani ai isi ali’i talavou i le tau tapenaina o mea totino ua fa’aleagaina i Pago Pago. [ata AF]
ausage@samoanews.com

O le aso ananafi na amata fa’agasolo ai su’esu’ega a se Vaega Faapitoa a le malo e Suesueina meatotino sa fa’aleagaina i le ‘afa o Gita (EOC Damage Assessments), mo le asia lea o mea uma sa fa’aleagaina i le ‘afa, e aofia ai maota ma laoa, meatotino po o ni soifua fo’i na ma’imau i lenei fa’alavelave fa’alenatura.

 

A o feagai ai le atunu’u ma tapenaga mo mea sa fa’aleagaina i le ‘afa, ua fa’alauiloa mai e le Fa’atonusili o Aoga a le malo ia Dr. Ruth Matagi-Tofiga, le tapunia lea o aoga uma a le malo mo le vaiaso atoa lenei, ona o lo o fa’agasolo galuega mo le toe fa’aleleia o vaega sa fa’aleagaina i le ‘afa.

 

E fa’apena fo’i i aoga uma a le Ekalesia Katoliko, o le a tapunia uma aoga i le vaiaso atoa lenei, ona o galuega mo le toe fa’aleleia o faleaoga ma tulaga uma e tua i ai fanau aoga.

 

Se’i vagana faiaoga ma tagata faigaluega a le Ofisa o Aoga, o le a fa’aauau pea ona galulue i latou i le aso Gafua e oo atu i le aso Faraile o le vaiaso nei.

 

Ua fa’alauiloa mai fo’i le tapunia o aoga mo ni isi o Aoga Tumaoti i le atunu’u mo lenei vaiaso.

 

Ae i le fa’agasolo ai o suesuega a le malo mo meatotino sa fa’aleagaina i le ‘afa, na taua ai e le pepa o matalaga mai le EOC e fa’apea, o le fa’aiuga o lenei suesuega, o le a iloa tonu ai poo fea polokalame a le feterale e agava’a i ai tagatanu’u ua mafatia, po o le polokalame a le FEMA lea e fesoasoani ai i tagata ta’ito’atasi (IA - Individual Assistance), po o le polokalame fo’i e fesoasoani ai mo tagata lautele (PA - Public Assistance).

 

O le polokalame a le IA o le a aofia ai le suesueina o meatotino sa faaleagaina a tagata ta’ito’atasi e aofia ai fale ma isi uma meatotino. Ae mo le fesoasoani a le PA, o le a suesueina ai meatotino sa fa’aleagaina mai le malo faapea ai ma Faalapotopotoga eseese.

 

O le a galulue le vaega suesue a le malo i le sailia lea o nofoaga uma sa faaleagaina i totonu o Tutuila, Manu’a ma Aunu’u. O le aso Faraile o le vaiaso nei lea ua faamoemoe e mae’a ai lea suesuega, ma tu’uina atu loa lea o le ripoti mo vaega uma sa fa’aleagaina.

 

Afai e i ai ni isi fa’amatalaga e fia malamalama atili i ai le atunu’u, fa’afesootai le telefoni (684) 699-3800 poo le imeli o le: eoc@asdhs.as.gov.

 

O le aso Sa na te’a nei na fa’alauiloa aloaia ai e le Peresetene o Amerika ia Donald J. Trump, le i ai o si o tatou teritori o Amerika Samoa i tulaga pagatia ona o mala fa’alenatura, ma ua ia poloaina ai loa le tatau lea ona oo mai fesoasoani mai vaega eseese uma a le Feterale, mo le tuuina mai o fesoasoani mo aiga ua pagatia i lenei fa’alavelave.

 

Ua poloaina e le ali’i peresetene le Matagaluega o le Puipuiga o le Saogalemu Lotoifale a le malo tele, faapea ai ma le FEMA e galulue fa’atasi mo le tu’uina mai o fesoasoani uma e moomia e tagatanu’u o Amerika Samoa ua pagatia.

 

E pei ona taua i se pepa o fa’amatalaga mai le ECO, o le 75% o le fa’atupeina o meatotino sa fa’aleagaina, o le a fa’atupe mai lea e le feterale, ae o le 25% e fa’atupe mai e le faigamalo a Amerika Samoa.

 

Ua lapataia fo’i le atunu’u ina ia logo le Matagaluega o Fefa’atauaiga ma Alamanuia, pe afai e molimauina ni faleoloa ma pisinisi ua latou si’i i le 10% tau o a latou oloa i le taimi o lo o pagatia ai le atunu’u i lenei fa’alavelave.

 

I lalo o le Tulafono i lona Ulutala 27 Mataupu 9, o lo o aiaia ai le fa’asa lea i se faipisinisi ona sii le tau o soo se oloa o loo manaomia i le taimi o loo pagatia ai le atunuu e pei o vai, kesi, mea faufale ma isi.

 

O le aso Sa na te’a nei na molimauina ai e le to’atele o le atunu’u le va’alele a le vaega a le US Coast Guard - C130 o lo o felelea’i solo i luga o le atunu’u, mo le mata’ituina o vaega sa fa’aleagaina i le ‘afa.

Comment Here