Amata fa’agasolo galuega mo le fa’aleleia o auala i le atunu’u


Le sui faatonusili o le Ofisa o Galuega Lautele a le malo, Fa’alava’i Ta’ase ma le Pule Sinia o tulaga o Galuega ia Luki Tuitasi i le taimi na molimau ai i luma o le Komiti o Galuega a le maota o sui i le vaiaso nei. [ata AF]
ausage@samoanews.com

O le iloiloga a le Komiti o Galuega Lautele a le maota o sui, ma sui o le Ofisa o Galuega Lautele a le malo i le vaiaso nei, ua manino mai ai le amata fa’agasolo o tauofoga mo le fa’atinoina o galuega e fa’aleleia ai auala i ni isi o afioaga i le atunu’u.

 

O ni isi o ia afioaga e aofia ai Nuuuli; Leone; Malaeloa; Failolo; Aloau, Fagaima ma le auala o lo o taoto i totonu o le Industrial Park i Tafuna.

 

O le autu o le iloiloga, lea na taitaia e le afioga i le tama’ita’i faipule ia Vui Florence Saulo, o ia fo’i lea o le ta’ita’i o le Komiti o Galuega Lautele a le maota o sui, o le fia maua lea o se tulaga ua i ai galuega o auala ua leva ona fuafua mai e le Ofisa o Galuega a le malo.

 

E le i auai le Fa’atonusili o le Ofisa o Galuega ia Faleosina Voigt, ona o lo o malaga i fonotaga i fafo, se’i vagana ai le sui fa’atonusili ia Fa’alava’i Ta’ase ma le sui sinia o le Ofisa ia Luki Tuitasi na auai i le iloiloga.

 

O se tasi o mataupu na fesiligia e Faipule mai Tualauta, afioga Vui ma Samuel Ioka Meleisea, o le tulaga i le galuega mo le fa’aleleia o le auala i Ottoville, le vaega o lo o masani ona to’a ai le vai pe a malosi lologa i soo se taimi o le tausaga.

 

Na taua e Ta’ase le amata fa’agasolo o galuega mo le fa’aleleia o le auala i Ottoville. O tulaga i le tele o isi galuega mo auala i totonu o le itumalo o Tualauta, o lo o taumafai pea e saili se vaega tupe e fa’atino ai - se’i vagana auala ua leva ona tu’u i totonu o le ata fa’ataoto a le Ofisa mo le 5 tausaga, lea fo’i o lo o fa’atupe mai e le Vaega a le Feterale o lo o fa’atupeina galuega o auala tetele - pau ia o auala e mautinoa lava e maua le vaega tupe e fa’atupe ai.

 

Na soisoi ni isi o afioga i Faipule ina ua latou fa’afofoga i le molimau a le sui fa’atonu, o lo o tau sailia pea ni vaega tupe e fa’atupe ai le tele o galuega o auala.

 

Na taua e Kitara Vaiau mai le itumalo o Saole e fa’apea, o se tasi o mafua’aga o lo o tele ai le tupe a le Ofisa o Galuega a le malo o lo o alu i galuega o auala, o le leai lea o ni a latou masini e fa’atino ai le galuega - ma tula’i mai ai loa le fa’afitauli o le tu’u atu o galuega i konekarate tua latou te fa’atinoina.

 

Na faafetaia e le Faipule mai Fofo, afioga Fagaoatua D. Salave’a ma le isi Faipule mai Itumau, afioga Sataua Dr. Mataese Samuelu le auaunaga a le Ofisa o Galuega mo le fa’aleleia o auala i le atunu’u, peita’i o lo o matua mana’omia pea le fa’aleleia o le tele o auala i le atunu’u, ina ia fesoasoani i feoaiga a le atunu’u.

 

Saunoa Vui e fa’apea, o le latou asiasiga talu ai nei ma sui o le Ofisa o Galuega a le malo, ua mafai ai ona iloa le tele o auala tua i totonu o lona itumalo o Tualauta e matua mana’omia le fa’aleleia, ona o le tele o nei auala tua o lo o to’atele aiga o le itumalo o lo o alala ai.

 

Na lagolagoina e le afioga a Gafatasi Afalava le fautuaga a le afioga i le ali’i faipule mai Saole ia Vaiau, i le tatau lea ona i ai ni masini e fa’aaoga e le Ofisa o Galuega e fa’atino ai a latou galuega, aemaise lava i le fa’ataina o le auala.

 

Na fa’amanino e molimau e faapea, ua mafua ona taofia galuega mo le fa’ataina o ni isi o vaega o le auala, ona ua gau le masini e vili ai le ta a le kamupani a le Paramount Builders sa latou fa’aaogaina.

 

Mo le galuega o le fausiaina o le taligalu i le auala i Leloaloa, i le vaega e sosoo ma le kamupani i’a, ua manumalo ai le konekarate a le Happy Trucking - e le o toe mamao se taimi ae amata aloaia lea o le galuega.

Comment Here