Ads by Google Ads by Google

Amata aoga ae tula’i mai fa’aletonu i ni isi o pasi aoga

ausage@samoanews.com

O le toe a’e ai o aoga a le malo i le taeao ananafi mo le amataina o le tausaga aoga fou 2017/2018, ua molimauina ai tulaga fa’aletonu i pasi aoga mo ni isi o itumalo i le atunu’u,  e pei ona fa’ailoa i luma o le maota o sui i le taeao ananafi.

 

Na taua e le afioga i le ali’i faipule mai le itumalo o Ituau ia Manumaua Wayne Wilson, le molimauina o se fa’aletonu i le tautua a pasi aoga mo le aoga tulaga muamua a Manulele Tausaga i le taeao ananafi, ma avea ai ma mafua’aga o le tuai o le to’atele o fanau aoga i le faleaoga.

 

Ae ina ua fesiligia le Pule o le Vaega o Pasi Aoga, sa fa’ailoa ane ai e fa’apea, o le pasi aoga lea e tautuaina le aoga a Manulele Tausala, na ave lava e fa’aleleia ni isi o vaega sa fa’aletonu ina ua fa’atoa tuua aoga i le masina o Me, e oo mai lava i le taimi nei o lo o tulaga fa’aletonu pea vaega o le pasi.

 

Na fa’aalia atili atu e le Ofisa o Pasi Aoga ia te ia, o le masina fou lea o lo o fa’amoemoe e taunu’u mai ai isi pasi aoga fou e 4 mo le Matagaluega o Aoga, peita’i o lea fuafuaga e le o mautinoa i le taimi nei.

 

Na talosagaina e Manumaua le ta’ita’ifono o le Komiti o Aoga a le maota o sui, ina ia silasila toto’a i le tulaga fa’aletonu e pei ona tula’i mai i le aoga a Manulele Tausala.

 

Saunoa le fofoga fetalai ia Savali Talavou Ale e fa’apea, o se tulaga fa’anoanoa le fa’atoa amata o aoga a le fanau ae tula’i mai tulaga fa’aletonu i pasi aoga, ma o se fa’aletonu fo’i e masani lava ona alia’e mai i le taimi tonu lenei e a’e ai aoga.

 

Na taua e Savali lona talitonuga o lo o i ai, e le na o le itumalo o Ituau o lo o a’afia i le fa’aletonu lenei, ae foliga mai o lo o a’afia ai le tele o itumalo i le atunu’u. Ae o le itu e sili ai ona leaga, e lelei itumalo latalata mai i le taulaga e laugatasi auala ma lelei i le feoa’i a fanau aoga, ae o itumalo i nu’u i tua, e fai lava si fa’aletonu o auala mo nai fanau aoga pe a savavali.

 

Ua ia talosagaina le ta’ita’i o le komiti o aoga a le maota ina ia silasila i le mataupu e pei ona fesiligia, ae lelei fo’i pe a valaau se iloiloga ma le Fa’atonusili o le Ofisa o Aoga a le malo e fa’amanino ai lenei mataupu.

 

I le talanoaina ai o mataupu e fa’atatau i le Ofisa o Aoga, o le vaiaso na te’a nei na fa’aleo ai e le afioga i le ali’i faipule ia Faimealelei Anothony Allen le agaga fa’afetai aga’i i le Fa’atonusili o Aoga ma le matagaluega atoa, ona o polokalame matagofie sa mafai ona fa’amanuiaina ai le to’atele o faiaoga i le vaiaso na te’a nei.

 

Na taua e Faimealelei le agaga fa’afetai na mafai ona fa’ailoa atu e faiaoga mai le aoga tulaga muamua i Aua, i le matagofie o mataupu sa mafai ona a’oa’oina i le Semina sa faia mo faiaoga uma i le atunu’u, lea na fa’atautaia i le Fale Laumei i Utulei mo le umi e 3 aso.

 

O le itu e sili ona taua ai aoaoga nei e pei ona saunoa Faimealelei, ua maua ai le avanoa o matagaluega eseese a le malo latou te talanoa ai ma fa’ailoa fa’afitauli o lo o tutupu i totonu o aoga, e tatau ona silafia e faiaoga, e pei o le Ofisa o Leoleo, Ofisa o Auaunaga ma Tautua Eseese, lea sa latou talanoaina ai auala e mafai ai ona iloa fanau ua a’afia i fualaau fa’asaina, o faiga mataga e a’afia ai fanau, atoa ai ma auala e mafai ai ona foia nei fa’afitauli.

 

Na taua e ni isi o faiaoga sa auai i lenei aoaoga i le Samoa News, le tele o aoaoga fou sa mafai ona latou maua mai i le polokalame sa fa’agasolo i le vaiaso na te’a nei, ua fesoasoani malosi ai i auala eseese e saili ai ituaiga amioga ua amata ona amio ai fanau aoga.

 

Na lagolagoina e le afioga i le ali’i faipule ia Toeaina Faufano Autele le agaga fa’afetai i le tulaga ua i ai aoaoga mo faiaoga a le malo i lenei tausaga, peita’i i lona talitonuga, ua tatau ona silasila toto’a le Fa’atonusili o Aoga i se auala e fa’aleleia atili ai le tautua a le Ofisa o Aoga i le atunu’u.

 

Mo se faata’ita’iga, o le tele o faiaoga na i’u mai ma fa’ailoga tetele o lo o nonofo i totonu o le Ofisa ma fa’atino galuega fa’a Ofisa, ae o i latou ia sa tatau ona vaaia i totonu o le potu aoga mo le a’oa’oina o fanau aoga.

 

I lana fautuaga, ua tatau ona silasila le Fa’atonusili o Aoga i se auala e tapunia ai isi auaunaga a le Ofisa o Aoga, lea o lo o galulue ai le to’atele o faiaoga lelei, e pei o le auaunaga a le Vaega o le “Teacher’s Quality Division’, ae aumai faiaoga o lo o galulue i lea vaega e saili ni potu aoga e galulue ai mo le a’oa’oina o fanau aoga.

 

I le avea ma faiaoga mo le tele o tausaga, e talitonu Toeaina, afai e lelei faiaoga e a’oa’oina fanau aoga, e lelei fo’i fa’aiuga o suega a fanau aoga.

 

I se iloiloga sa faia a le maota maualuga ma le sui fa’atonusili o aoga a le malo i le masina o Iulai na te’a nei, na fautuaina ai e afioga i Senatoa sui o le ofisa o aoga, i ni polokalame fou e a’oa’oina ai faiaoga ina ia latou iloa auala e mafai ai ona foia fa’afitauli o lo o alia’e mai i totonu o aoga eseese.

 

Na taua e le afioga i le ali’i senatoa ia Fa’amausili Mau Jr ma Paepae Iosefo Fai’ai i le iloiloga e fa’apea, afai e sui ituaiga aoaoga e fa’asoa atu e le matagaluega o aoga i faiaoga, ona maua ai fo’i lea e faiaoga o metotia eseese e mafai ai ona fesoasoani e foia fa’afitauli o lo o tutupu mai i totonu o aoga, lea o lo o a’afia ai ni isi o fanau aoga e pei o fualaau fa’asaina, atoa ai ma le faia o uiga mataga i fanau aoga.