Amata aloaia le poloka masani a Leoleo mo le fa’aiuga o le tausaga


Le afioga i le Komesina o Leoleo ia Save Liuato Tuitele, ma le Sui Komesina ia Vaimaga Maiava. [ata AF]
ausage@samoanews.com

O le vaiaso nei lea na amata aloaia ai le poloka masani a le Matagaluega o Leoleo mo le umi e 2 vaiaso, mo le fa’amalosia lea o tulafono i luga o le alatele aemaise ai o le puipuia o le saogalemu o le atunu’u atoa, a o alo atu ai le atunu’u i le fa’amanatuina o aso fiafia o lenei tausaga.

 

E pei ona fa’atinoina ai i aso fiafia o le Kerisimasi ma le Tausaga Fou i tausaga ta’itasi, o le poloka masani lenei a le Matagaluega o Leoleo, e galulue ai ali’i ma tama’ita’i Leoleo i sifi e 2 e ta’i 12 itula le umi, ona o le naunau lava ina ia puipuia le saogalemu o le atunu’u atoa ao feagai ai ma aso fiafia i le fa’aiuga o le tausaga.

 

E masani lava ona mae’a le poloka a le Matagaluega o Leoleo i le aso 2 o Ianuari pe a mae’a le fa’amanatuina o le tausaga fou, ae talu ai o le tausaga ese lenei i polokalame fa’ataoto a le malo, ona o le aso 3 lea ua fa’amoemoe e faia ai le fa’auuga o le Kovana ma le Lutena Kovana mo le la nofoaiga fou, atoa ai ma le fa’auuga o afioga i Senatoa ma Faipule i le aso lava lea, ua manatu ai loa le Matagaluega o Leoleo, fa’atoa mae’a la latou poloka i le aso 4 Ianuari 2017.

 

“O le agaga atoa o le afioga i le ali’i Komesina o Leoleo ma le Matagaluega, ia fa’amuamua lava le saogalemu o le atunu’u atoa, e le gata ia i latou o loo fa’atautaia ta’avale ae o i latou fo’i o lo o auai i fiafiaga i nofoaga eseese, ina ia mautinoa e fo’i ma le saogalemu i latou i o latou aiga i aso fiafia o lenei tausaga”, o le saunoaga lea a le Sui Komesina o Leoleo ia Vaimaga Maiava i se fa’atalatalanoaga ma le Samoa News i le vaiaso nei.

 

O le poloka masani a Leoleo e pei ona amataina nei, o le a siakiina ai vaega uma lava e aofia ai totonu o le ta’avale mo ave ta’avale uma e laasia le vaega faapitoa o le a faia ai le poloka, ina ia mautinoa e le o tagofia e le ave ta’avale le ‘ava malosi poo fualaau fa’asaina, ma ia mautinoa fo’i o lo o saogalemu le ta’avale mo feoaiga a le mamalu o le atunu’u.

 

“O le fautuaga masani lava a le Matagaluega o Leoleo mo le atunu’u i vaitau fiafia lenei o le tausaga, afai e te tagofia le ‘ava malosi, fa’amolemole, nofo lelei i le fale ma taumafa lau ‘ava malosi, aua ete uliina se ta’avale, e le fa’atagaina i le tulafono ona e uliina se ta’avale ao e tagofia le ‘ava malosi”.

 

“Mo i latou o le a feagai ma fiafiaga o le aso fiafia e pei o Matagaluega a le malo, Ofisa eseese faapea ai aiga e faia a latou fiafia ma tagofia ai le ‘ava malosi, ia tausisia pea tulaga o le filemu, aua le soona malomaloa pe pisapisao fo’i pe afai ua e tagofia le ‘ava malosi, ina ne’i a’afia ai le nonofo filemu o isi tagata, afai fo’i ua e ‘ona tele ma ua mana’omia se auala e malaga ai i le fale, vili mai le Ofisa o Leoleo, o le isi lena matou tautua, o le momoliina lea o oe i lou aiga ina ia mautinoa, e te taunu’u saogalemu i lou aiga”.

 

“E talosaga atu fo’i i matua uma lava o fanau talavou ina ia mata’ala i gaioiga o le a fa’atinoina e fanau, ia iloa poo fea e aga’i ai i latou i le ao ma le po, ma ia mautinoa fo’i e le o tagofia e i latou le ‘ava malosi, ona o le isi lea fa’afitauli ua molimauina i le taimi nei, o le tagofia lea e fanau talavou o le ‘ava malosi i taimi o fiafiaga a aoga poo fale faigaluega”.

 

Na taua e le afioga a Maiava le galulue uma o Ta’ita’i o le Matagaluega o Leoleo e fesoasoani i le poloka a le matagaluega ua amataina nei, ona o le naunau lava i le puipuia o le saogalemu o le atunu’u.

 

Sa ia taua i le fa’aiuga o lana saunoaga le fa’anaunautaiga o le Komesina ma le Matagaluega, ia aua ne’i i ai se soifua e ma’imau poo se tasi e manu’a ona o fiafiaga o le a alo atu i ai le atunu’u i le fa’aiuga o lenei tausaga.

 

“Avea ai foi lene avanoa e momoli atu ai fa’amanuiaga a le afioga i le Komesina ma le matagaluega atoa o Leoleo i le atunuu, ina ia tatou maua se fa’aiuga o le tausaga i le fiafia ma le manuia, ma ia fa’amuamua pea le tulaga o le saogalemu i taimi uma”, o le saunoaga lea a Maiava.

Comment Here