Ads by Google Ads by Google

Amata aloaia fa’amasinoga autu o se ali’i tu’uaia faia uiga mataga

ausage@samoanews.com

O le taeao ananafi na amata aloaia ai le fa’amasinoga autu o se Tama matua o lo o tu’uaia i lona faia o uiga mataga i se teineititi e 15 tausaga le matua, o le tama teine lea a le fafine sa fai ma ana pa’aga.

 

E to’a 4 ali’i ae to’a 2 tama’ita’i o le Laulau Fa’amasino ua mae’a ona tofia latou te iloiloina se fa’aiuga o le mataupu a Mamona Unasa, lea o lo o tu’uaia e le malo i moliaga mamafa e 4, e mafua mai i ni fa’alavelave se 2 sa tutupu i le tausaga na te’a nei atoa ai ma le tausaga lenei.

 

O moliaga o lo o tu’uaia ai Unasa e aofia ai le moliaga o le faia o uiga fa’asotoma, faia o gaioiga fa’afeusuaiga, ma moliaga e lua o lona tagofia lea o itutinosa o se teineititi e laititi i lalo o le tulafono.

 

E pei ona taua i fa’amaumauga a le fa’amasinoga, o le masina o Tesema o le 2015 ma le masina o Fepuari o le 2016, o taimi eseese ia e lua o lo o tu’uaia Unasa na ia faia ai uiga mataga i le teineititi na a’afia, i le taimi a o nofo ai o ia i le fale o le teineitiiti na a’afia ma lona Tina.

 

O le gaioiga muamua a ali’i fa’amasino ina ua valaau le mataupu ananafi, o le tu’uina atu lea o le fa’atonuga i molimau uma a le malo ua sauni e tu’uina atu a latou molimau fa’atauto e uiga i lenei mataupu, ina ia mautinoa e leai se isi o i latou e nofo i totonu o le potu fa’amasino i le taimi atoa o taualumaga a le fa’amasinoga, se’i vagana ua valaau e molimau.

 

O le mae’a ai ona poloaina e le afioga i le ali’i fa’amasino ia Michael Kruse o molimau e to’a 5 a le malo e fa’atatau i ta’iala o le a fa’afoe ai le fa’amasinoga, na ia liliu atu ai loa ma tu’uina atu fa’atonuga tomua i ali’i ma tama’ita’i iloilo iuga, i auala ma le tulafono o le a fa’atautaia ai taualumaga o lenei mataupu, atoa ai ma fa’atonuga e fa’atatau i o latou tiute fa’a fa’amasino.

 

O ni isi o fautuaga, o le fautuaina lea o i latou ina ia fa’afofoga toto’a lelei i fa’amatalaga tauto uma o le a tu’uina atu e molimau a itu e lua, atoa ai ma fa’afinauga a loia e fa’atatau i lenei mataupu.

 

Sa ia fautuaina fo’i i latou ina ia aua ne’i o latou fa’atalatalanoaina lenei mataupu ma ni isi o aiga, uo, poo isi fo’i ali’i ma tama’ita’i iloiloga, aua ne’i o latou faitau i ni tusitusiga e fa’asalalau e nusipepa po o ripoti mai luga o le leitio, a ia fa’afofoga pea ma le toto’a i taualumaga uma o le mataupu, ona fa’atoa faia ai loa lea o le latou fa’aiuga i le taunuuga e tatau ona i ai lenei mataupu, i le taimi e aga’i atu ai i totonu o le potu mo le talanoaina o se latou fa’aiuga fa’ai’u.

 

O le mae’a ai o fa’atonuga tomua a le fa’amasinoga sa tu’uina atu i ali’i ma tama’ita’i iloilo iuga, na maua ai le avanoa o le loia a le malo ia Jerard Murphy mo le fa’aleoina o lana ulua’i folasaga, ina ia fa’ataoto ai le fa’ava’a atoa o le mataupu e pei ona tu’uaia ai Unasa.

 

“O le mataupu o le a outou fa’afofoga i ai i lenei vaiaso, o le mataupu e fa’atatau i se teineititi laititi e na o le 15 tausaga le matua, ma se Tamaloa matua na ia faia ni uiga mataga i lea teineitiiti, a o avea ai o ia ma pa’aga a le Tina o le teineititi na a’afia”, o le saunoaga lea a Murphy.

 

O le taimi nei, ua atoa le 16 tausaga o le teineititi na a’afia, ma o ia le isi molimau a le malo o le a valaauina i luga o le nofoa molimau, a o fa’agasolo ai taualumaga o lenei mataupu i le vaiaso nei.

 

Na fa’amanino e Murphy e fa’apea, i le po na tula’i mai ai le fa’alavelave, sa momoe ai le teineititi na a’afia ma se tasi o ona tei laititi, ae talu ai o lo o vevela le tino o le ali’i laititi lea ma ma’i (fever), na fai ai loa lona Tina i le teineititi na a’afia, e alu e moe i luga o lona moega, ae alu atu o ia (Tina) e momoe ma le ali’i laititi o lo o ma’i.

 

E le i umi ona taoto le teineititi na a’afia i luga o le moega a lona Tina, ae ona fa’alogoina loa le tago atu o se tagata ma toso ese lona mitiafu, sosoo ai ma le kisi atu i lona ua ma lona papatua, ae ina ua ia faliu i tua, sa ia vaaia ai, o le uo tama a lona Tina o lo o ia faia nei uiga mataga ia te ia.

 

Na taua e Murphy e fa’apea, ina ua fa’alogoina e le teineititi uiga mataga o lo o fai atu e le ua molia, sa ia taumafai e soso ese, peita’i sa fa’aauau pea ona soso atu i ai le ua molia ma tago atu ona lima i ona itutinosa, e aofia ai lona fatafata ma lalo o lona ofu o lo o ofu i le taimi lea.

 

Na taua atili e le loia a le malo e fa’apea, o le fefe o le teineititi i le ua molia na mafua ai ona leai sona pisa, se’i vagana ai le tagi.

 

“E fa’atolu ona taumafai le teineititi na a’afia e soso mamao ese mai le ua molia, ae sa fa’atolu fo’i ona taumafai pea le ua molia e soso atu pea i le teineititi, ina ia mafai ai ona fa’atino uiga mataga sa ia faia ina ia fa’amalie ai ona lagona tu’inanau o lo o i ai”, o le saunoaga lea a Murphy i luma o le vaega iloilo iuga.

 

Na fa’aalia fo’i e le loia a le malo, fa’amatalaga tusitusia sa tu’uina atu e Unasa i Leoleo ina ua fesiligia o ia i lenei mataupu, lea sa ia fa’amaonia ai lona tagofia o itutinosa o le teineititi na a’afia.

 

E pei ona taua i fa’amaumauga a le fa’amasinoga, o lo o taua ai e Unasa i Leoleo e fa’apea, sa fa’apea lava o ia o lana pa’aga lea sa ia tago atu i ai i luga o le moega, ae na fa’ateia o ia ina ua ia iloa ane, e le o lana pa’aga, o le tama teine a lana pa’aga.

 

O le itula e 9:00 i le taeao nei lea ua fa’amoemoe e toe fa’aauau ai taualumaga o lenei mataupu, ma ua fa’atali le loia a Unasa ia Michael White fa’atoa tu’uina atu lana folasaga i le taimi e mae’a ai ona fesiligia molimau a itu e lua, ma sauni atu ai loa ali’i ma tama’ita’i iloilo iuga mo le sailia o sa latou fa’aiuga e uiga i lenei mataupu.

 

O le afioga i le ali’i Fa’amasino ia Mamea Sala Jr ma Fa’amausili Pomele o lo o lagolagosua i le afioga i le fa’amasino sili i le fa’afoeina o taualumaga o lenei mataupu.